ஒன்றிய அரசு பணியாளர்கள் ஒருங்கிணைந்த ஓய்வூதியத் திட்டத்தில் இணைய ஆர்வம் காட்டவில்லையா?

ஒன்றிய அரசு பணியாளர்கள் ஒருங்கிணைந்த ஓய்வூதியத் திட்டத்தில் இணைய ஆர்வம் காட்டவில்லையா - ஏன்?

ஒன்றிய அரசு ஊழியர்கள், கடந்த ஆண்டு ஆகஸ்ட் மாதம் ஒன்றிய அமைச்சரவையால் அங்கீகரிக்கப்பட்டு, இந்த ஆண்டு ஏப்ரல் 1 முதல் நடைமுறைக்கு வந்த ஒருங்கிணைந்த ஓய்வூதியத் திட்டத்தைத் (UPS) தேர்வு செய்ய செப்டம்பர் 30 வரை அவகாசம் உள்ளது என அறிவிக்கப்பட்டுள்ளது. 

ஓய்வூதியம் மற்றும் ஓய்வூதியதாரர்கள் நலத்துறை அளித்த தகவலின்படி, திங்கட்கிழமை (செப்டம்பர் 15) நிலவரப்படி, தேசிய ஓய்வூதியத் திட்டத்தின் (NPS) கீழ் உள்ள சுமார் 23.94 லட்சம் ஊழியர்களில் 40,000 பேர் மட்டுமே இந்தத் திட்டத்தைத் தேர்ந்தெடுத்துள்ளனர்.

செப்டம்பர் 2 அன்று, ஒன்றிய சிவில் சேவைகள் (தேசிய ஓய்வூதியத் திட்டத்தின் கீழ் ஒருங்கிணைந்த ஓய்வூதியத் திட்டத்தை செயல்படுத்துவதற்கான) விதிகள், 2025-ஐ வெளியிட்டது. இதன் மூலம் ஒருங்கிணைந்த ஓய்வூதியத் திட்டத்தை (Unified Pension Scheme) தேர்ந்தெடுக்கும் ஒன்றிய அரசு ஊழியர்களின் பணி தொடர்பான விஷயங்களை இந்த விதிகள் ஒழுங்குபடுத்துகின்றன.

 ஒருங்கிணைந்த ஓய்வூதியத் திட்டம் என்றால் என்ன?

ஒருங்கிணைந்த ஓய்வூதியத் திட்டம் அறிவிக்கப்படுவதற்கு முன்பு, ஜனவரி 1, 2004-க்கு முன் பணியில் சேர்ந்த ஒன்றிய அரசு ஊழியர்கள், பழைய ஓய்வூதியத் திட்டத்தின் (OPS) கீழ் நிலையான ஓய்வூதியத்தைப் பெற்று வந்தனர். ஜனவரி 1, 2004-க்கு பின் பணியில் சேர்ந்தவர்கள் தேசிய ஓய்வூதியத் திட்டத்தின் (NPS) கீழ் சந்தை சார்ந்த ஓய்வூதியத்தைப் பெற்றனர்.

 NPS சந்தாதாரர்கள் மற்றும் ஊழியர் சங்கங்கள் அனைவருக்கும் பழைய ஓய்வூதியத் திட்டத்திற்குத் திரும்ப வேண்டும் என்று தொடர்ந்து வலியுறுத்தி வந்த நிலையில், கடந்த ஆண்டு ஆகஸ்ட் மாதம் ஒன்றிய அரசு ஒருங்கிணைந்த ஓய்வூதியத் திட்டத்தை அறிவித்தது.

தேசிய ஓய்வூதியத் திட்டம் (NPS) ஜனவரி 1, 2004-க்கு பின் பணியில் சேர்ந்த அனைத்து ஒன்றிய அரசு ஊழியர்களுக்கும் கட்டாயமானது. ஆனால் ஒருங்கிணைந்த ஓய்வூதியத் திட்டம் (UPS) கட்டாயமில்லை. இந்தத் திட்டத்தின் கீழ், ஓர் ஊழியர் குறைந்தபட்சம் 25 ஆண்டுகள் பணி செய்திருந்தால், ஓய்வு பெறுவதற்கு முந்தைய 12 மாதங்களில் பெற்ற சராசரி அடிப்படை ஊதியத்தில் 50% உறுதியான ஓய்வூதியமாக வழங்கப்படுகிறது. ஓய்வூதியதாரர் இறந்த பிறகு, அவரது துணைவருக்கு ஓய்வூதியதாரர் பெற்ற ஓய்வூதியத்தில் 60% வரை உறுதியான ஓய்வூதியம் கிடைக்கும்.

 ஒருங்கிணைந்த ஓய்வூதியத் திட்டத்திற்கும் தேசிய ஓய்வூதியத் திட்டத்திற்கும் உள்ள வேறுபாடுகள்

கட்டாயமா, விருப்பமா?

தேசிய ஓய்வூதியத் திட்டம் (NPS) கட்டாயமானது, ஆனால் ஒருங்கிணைந்த ஓய்வூதியத் திட்டம் (UPS) விருப்பமானது. விதிகளின்படி, செப்டம்பர் 30-க்குள் இந்தத் திட்டத்தைத் தேர்ந்தெடுக்கும் ஊழியர்களுக்கு, ஒருமுறை மீண்டும் தேசிய ஓய்வூதியத் திட்டத்திற்கு (NPS) மாற ஒரு வாய்ப்பு வழங்கப்படும். இந்த வாய்ப்பை ஓய்வு பெறுவதற்கு ஒரு வருடம் முன்பு அல்லது விருப்ப ஓய்வூதியத் திட்டத்தைத் (VRS) தேர்வு செய்வதற்கு மூன்று மாதங்களுக்கு முன் பயன்படுத்தலாம். ஒருமுறை இந்தத் தேர்வு செய்யப்பட்டால், மீண்டும் ஒருங்கிணைந்த ஓய்வூதியத் திட்டத்திற்கு (UPS) மாற முடியாது. இந்த மாற்றம் "சந்தாதாரர்களுக்கு அதிக நெகிழ்வுத்தன்மையை வழங்கும்" என்று அந்தத் துறை கூறியுள்ளது.

பங்களிப்பு: தேசிய ஓய்வூதியத் திட்டத்தின் கீழ் (NPS), ஊழியரின் ஓய்வூதிய கணக்கில் நிரந்தர ஓய்வூதிய கணக்கு எண் (PRAN) மூலம் அடிப்படை ஊதியம் மற்றும் அகவிலைப்படி (DA) ஆகியவற்றில் ஊழியர் 10% மற்றும் ஒன்றிய அரசு 14% பங்களிக்க வேண்டும். ஆனால் ஒருங்கிணைந்த ஓய்வூதியத் திட்டத்தில் (UPS), ஊழியர் மற்றும் அரசு ஆகிய இருவரும் அடிப்படை ஊதியம் மற்றும் அகவிலைப்படியில் தலா 10% பங்களிக்க வேண்டும்.

 உறுதிப்படுத்தப்பட்ட தொகை:

 ஒருங்கிணைந்த ஓய்வூதியத் திட்டத்தில் (UPS) 25 ஆண்டுகள் பணி முடித்த பிறகு, கடைசி 12 மாதங்களின் சராசரி அடிப்படை ஊதியத்தில் 50% உறுதியான ஓய்வூதியம் வழங்கப்படுகிறது. தேசிய ஓய்வூதியத் திட்டத்தில் (NPS) எந்தவொரு உறுதியான தொகையும் இல்லை; அது மொத்தமாக திரட்டப்பட்ட நிதியைப் பொறுத்தது.

கூடுதல் அம்சங்கள்: 

ஒருங்கிணைந்த ஓய்வூதியத் திட்டத்தில் (UPS), அரசு அடிப்படை ஊதியம் மற்றும் அகவிலைப்படியில் 8.5% பங்களிப்புடன் ஒரு பொதுவான நிதி உருவாக்கப்படும். மேலும், 10 ஆண்டுகள் பணிக்குப் பிறகு குறைந்தபட்சம் மாதத்திற்கு ரூ.10,000 ஓய்வூதியம் உறுதியளிக்கப்பட்டுள்ளது.

 பணியிலிருந்து நீக்கப்படும் ஊழியர்களுக்கு இந்த உறுதியான ஓய்வூதியம் கிடைக்காது. தேசிய ஓய்வூதியத் திட்டத்தில் (NPS) மொத்தமாக ஒரு பெரிய தொகை (lump sum payment) இல்லை. ஆனால் ஒருங்கிணைந்த ஓய்வூதியத் திட்டத்தில், ஒவ்வொரு ஆறு மாத கால சேவைக்கும் கடைசி அடிப்படை ஊதியம் மற்றும் அகவிலைப்படியில் பத்தில் ஒரு பங்குத் தொகையை மொத்தமாகப் பெறலாம்.

 ஒருங்கிணைந்த ஓய்வூதியத் திட்டம் ஏன் மெதுவாக உள்ளது?

ஏப்ரல் 1 முதல், ஒன்றிய அரசு ஊழியர்களுக்கு இந்தத் திட்டத்தைத் தேர்வு செய்ய முதலில் ஜூன் 30 வரை அவகாசம் வழங்கியது. பின்னர், "கோரிக்கைகள்" காரணமாக செப்டம்பர் 30 வரை கால அவகாசம் நீட்டிக்கப்பட்டது. ஓய்வூதியத் துறை இந்தத் திட்டம் குறித்து விழிப்புணர்வை ஏற்படுத்தி வருகிறது. செப்டம்பர் 9 அன்று, செயலாளர் வி.ஸ்ரீனிவாஸ் அனைத்து அமைச்சகங்களுடனும் கூட்டம் நடத்தி, தகுதியான ஊழியர்களிடையே தகவல்களைப் பரப்பி, அவர்கள் நன்கு அறிந்த ஒரு தேர்வை மேற்கொள்ள வலியுறுத்தினார். இருப்பினும், இதுவரை இந்தத் திட்டத்தைத் தேர்ந்தெடுக்கும் ஊழியர்களின் எண்ணிக்கை குறைவாகவே உள்ளது.

 சில ஊழியர்கள், பழைய ஓய்வூதியத் திட்டத்திற்கான (OPS) தங்கள் கோரிக்கை இன்னும் நிலுவையில் உள்ளதாகவும், ஒருங்கிணைந்த ஓய்வூதியத் திட்டம் (UPS) அதே நன்மைகளை வழங்கவில்லை என்றும் தெரிவித்தனர். கடந்த ஆண்டு ஒருங்கிணைந்த ஓய்வூதியத் திட்டம் (UPS) அங்கீகரிக்கப்பட்ட பிறகு, ஆயிரக்கணக்கான ஒன்றிய செயலக சேவை ஊழியர்களைப் பிரதிநிதித்துவப்படுத்தும் ஒன்றிய செயலகச் சேவை அமைப்பு (Central Secretariat Service Forum), இரண்டு திட்டங்களும் ஊழியர்களுக்குப் பயனுள்ளதாக இல்லை என்றும், அனைவருக்கும் பழைய ஓய்வூதியத் திட்டத்திற்குத் திரும்ப வேண்டும் என்று தொடர்ந்து கோரிக்கை வைப்போம் என்றும் கூறியிருந்தது.