>>>மகனின் எம்.பி.பி.எஸ்., கனவை நிறைவேற்றிய "ஏழை தந்தை'

குடும்ப வறுமையிலும், மகனின் எம்.பி.பி.எஸ்., கனவை, தந்தை நிறைவேற்றியது, கவுன்சிலிங்கில் பங்கேற்றவர்களை நெகிழவைத்தது.

புதுச்சேரி, இன்ஜினியரிங் கல்லூரி வளாகத்தில் அமைந்துள்ள, சென்டாக் அலுவலகத்தில், நேற்று நடந்த சிறப்பு கவுன்சிலிங்கில், பிம்ஸ் மருத்துவ கல்லூரியில், ஏற்கனவே கிடைத்த, எம்.பி.பி.எஸ்., சீட்டை, மாணவர் அரவிந்த்குமார், "சரண்டர்' செய்து விட்டு, அரசு மருத்துவக் கல்லூரியில், எம்.பி. பி.எஸ்., சீட்டை தேர்ந்தெடுத்தார். இதனால், பிம்ஸ் மருத்துவக் கல்லூரியில், ஒரு காலியிடம் ஏற்பட்டது. அந்த இடத்தைத் தேர்வு செய்யும் வாய்ப்பு, அரசு பொறியியல் கல்லூரி, பி.டெக்., படிக்கும் மாணவர், பாலசுந்தரத்திற்குக் கிடைத்தது. ஆனால், எம்.பி.பி.எஸ்., சீட்டை எடுக்க அவர் தயக்கம் காட்டினார்.

இதனைக் கண்ட சென்டாக் அதிகாரிகள், " பிம்ஸ் மருத்துவ கல்லூரியில் எம்.பி.பி.எஸ்., சீட் எடுத்தால், ஏற்கனவே அரசு பொறியியல் கல்லூரியில் சேர்ந்த இன்ஜினியரிங் சீட்டை, "சரண்டர்' செய்ய வேண்டும். மேலும் பொறியியல் கவுன்சிலிங்கில் கலந்து கொள்ள முடியாது. மெடிக்கல் சீட் வேண்டுமா, இன்ஜினியரிங் சீட் வேண்டுமா என்பதை, நீயே சீக்கிரம் முடிவு செய்து கொள்' எனக் கூறி, பதிலுக்காகக் காத்திருந்தனர். ஐந்து நிமிடமாகியும் மாணவனிடமிருந்து பதில் வரவில்லை; மாறாக, கண்களில் கண்ணீர் பெருகியது.

இதைக் கண்ட, அவர் தந்தை ராசு, "அவனுக்குச் சின்ன வயதில் இருந்தே, எம்.பி.பி.எஸ்., படிக்க வேண்டும் என்பதே ஆசை. நான், "பஸ் செக்கர்' பதவியில் இருக்கிறேன். குடும்ப பொருளாதார சூழல், கண்முன் நிற்கிறது; யோசிக்கிறான். நீங்கள், எம்.பி.பி.எஸ்., சீட்டை‌யே கொடுங்கள். என் உழைப்பின் மீது எனக்கு நம்பிக்கை இருக்கிறது. அவனை டாக்டருக்குப் படிக்க வைப்பேன்.இவ்வாறு அவர் கூறவே, மகன் முகத்தில் மகிழ்ச்சி பொங்கியது. குடும்ப வறுமையிலும், மகனின் எம்.பி.பி.எஸ்., கனவை தந்தை நிறைவேற்றியது உருக்கமாக இருந்தது.

>>> மின்தடை சீராக என்ன வழி?

தமிழக மின் பற்றாக்குறைக்கு, காற்றாலை மின்சார உற்பத்தி குறைவு மட்டுமல்லாமல், தென் மண்டல மின் தொகுப்பில் ஏற்பட்டுள்ள மின் சுமை மற்றும் அதிர்வெண் கட்டுப்பாடும், மிக முக்கிய காரணங்களாக அமைந்திருக்கின்றன. நகர்ப்புறங்களில், சென்னையைத் தவிர மற்ற பகுதிகளில், பகலில் ஐந்து மணி நேரமும், இரவில் நான்கு மணி நேரமும் மின் வெட்டு இருப்பதாகக் கூறப்படுகிறது.காற்றாலை உதவி:தமிழகத்தின் தற்போதைய தேவை, 12 ஆயிரத்து 500 மெகாவாட். ஆனால், 8,000லிருந்து, 9,000 மெகாவாட் வரையில் மட்டுமே உற்பத்தி செய்யப்பட்டு வருகிறது. காற்றாலை உதவியால் மட்டுமே, இதுவும் சாத்தியமடைந்து வந்தது.ஆனால், தற்போது காற்றாலை மின்சாரத்தின் உற்பத்தி அளவு குறைந்ததையடுத்து, அதிக மின் வெட்டு அமல்படுத்தப்பட்டு வருவதாக, தொடர்ந்து பலபகுதிகளில் இருந்து புகார் கூறப்படுகிறது. அதே நேரத்தில், மின் வெட்டு பிரச்னைக்கு, மின் தொகுப்பில் தற்போதுள்ள கட்டுப் பாடும், மற்றொரு காரணமாக மின்வாரியத்தால் கூறப்படுகிறது. இதனால், போதுமான அளவிற்கு மின்சாரம் பெறுவதில், சிக்கல் நிலவி வருவதாக, அவர்கள் தெரிவிக்கின்றனர். தமிழகம், கேரளா, ஆந்திரா, கர்நாடகா, புதுச்சேரி மாநிலங்கள் தென்மண்டல மின் தொகுப்பின் கீழ் வருகின்றன. தற்போது, இந்த மின் தொகுப்பில் மின்சாரம் வரவேண்டிய தொடரில் ஏற்படும் மின் சுமை காரணமாக, தமிழகம் உட்பட மற்ற தென் மாநிலங்களிலும் பற்றாக்குறை நிலவி வருகிறது.

தவிப்பு:கடந்த மாத நிலவரப்படி, அதிகபட்ச தேவையின் மின்பற்றாக்குறை ஆந்திராவில், 26 சதவீதமாகவும், கர்நாடகாவில், 19.5 சதவீதமாகவும், தமிழகத்தில், 18 சதவீதமாகவும் இருந்தது. இந்த நிலை தற்போது அதிகரித்து உள்ளது.மேலும், மண்டல மின் கட்டமைப்பை, நாட்டின் மற்ற மின் கட்டமைப்புகளுடன் இணைக்க, மின் தொடர்கள் அமைக்கும் பணிகள் முடியாமல் இருப்பதும் இதற்கு காரணமாகக் கூறப்படுகிறது.இதனால், குஜராத் மற்றும் வடமாநிலங்களில் இருந்து, தினமும் 855 மில்லியன் யூனிட்டிற்கு பதில், 232 மில்லியன் யூனிட்கள் மட்டுமே மின்சாரம் பெறப்பட்டு வருகிறது.

கொள்முதல்:

மேலும், தமிழக மின்சார ஒழுங்குமுறை ஆணையத்தின் விதிமுறைகளின் படி, கொள்முதல் அளவு மற்றும் வாங்கப்படும் மின்சாரத்தின், விலைக்கு வரம்பு விதிக்கப்படவில்லை. ஆகவே, மின்சாரம் கொள்முதல் செய்ய முடியாமல் தமிழக மின்வாரியம் தவித்து வருகிறது.இதற்கு அடுத்தபடியாக, மின் கட்டமைப்பின் அதிர்வெண் பிரச்னை ஒரு காரணமாகக் கூறப்படுகிறது. மத்திய எரிசக்தி ஒழுங்குமுறை ஆணையம்,இந்திய மின் கட்டமைப்பின் அதிர்வெண்ணை, 49.5 ஹெர்ட்சில் இருந்து, 49.7 ஹெர்ட்ஸ் என்ற அளவில் இயக்கவும்,திட்டமிடா மின் பரிமாற்றத்திற்கான நிர்ணயக் கட்டணத்தை அதிகரித்தும், புதிய மாற்றங்களைக் கொண்டு வந்தது.இது மாநிலங்கள் வரன்முறையின்றி, மின் தொகுப்பில் இருந்துஅதிக மின்சாரத்தை எடுத்து,அதனால் எல்லா இடங்களிலும் இருள் சூழும் நிலை ஏற்படுவதைத் தடுக்கும் .நிர்ணயக் கட்டணம் கூடுதல் நிதிச்சுமை ஏற்படுத்தும் என்பதால், இதை தற்காலிகமாக நிறுத்தி வைக்குமாறு, முதல்வர் ஜெயலலிதா, பிரதமரை கேட்டுக் கொண்டார். ஆனால், இதில் நடவடிக்கை இல்லாததால், தமிழ்நாடு மின் உற்பத்தி மற்றும் பகிர்மானக் கழகம், ஐகோர்ட்டை நாடியது.

ஆனால், மின் உற்பத்திமற்றும் பகிர்மான முறையில், மத்திய ஒழுங்குமுறை ஆணைய வழிகாட்டுதலில், மின்வாரியம் செயல்பட ஐகோர்ட் உத்தரவிட்டது.இதற்கிடையில் வடக்குமண்டலத்தில் ஏற்பட்ட பிரச்னையைக் காரணம் காட்டி, அதிர்வெண் விவகாரத்தில் கடந்த மாதம், 16ம் தேதி முதல், இயக்க அதிர்வெண், 49.5 ஹெர்ட்ஸ் அளவிற்கு கீழ் செல்லும் போது, மின் தொடரை தானாகத்துண்டிக்கவும், மீறும் மாநிலங்களின் மீது, கடும் தண்டனை விதிக்கவும் அதற்கேற்ற வாறு நடைமுறை கொண்டு வரப்பட்டது.வட மாநிலங்கள் இருளில் மூழ்கிய சம்பவம், மற்ற மாநிலங்களில் இந்த நிகழ்வு வராதபடி மேற்கொள்ளப்பட்ட செயலாகும்.அதே சமயம், தமிழகம் உட்பட தென் மாநிலங்கள் வரம்பை மீறி "கிரிட்' எனப்படும், தொகுப்பில் இருந்து அதிக மின்சாரத்தை எடுத்து குழப்பம் ஏற்படுத்தியது இல்லை.தற்போது மத்திய மின்தொகுப்பு மின்சாரத்தைக் கையாளுவதில், மின்வாரியம் நம் தேவைக்கு ஏற்ப தொகுப்பில் இருந்து எடுத்துக்கொள்ளும் நடைமுறையை ஏற்படுத்த வேண்டும்.தவிரவும், அதே சமயம் உச்ச பட்ச பயன்பாட்டு நேரத்தில், நமது தேவையும், சப்ளையும்சீரமைக்கப்படுவதன் மூலமே திடீர் திடீரென மின் வெட்டுஏற்படுவதைத் தடுக்க முடியும்.

மின் தடை ஏன்? வாரியம் விளக்கம் :

தமிழ்நாடு மின் உற்பத்தி மற்றும் பகிர்மானக் கழக செய்திக்குறிப்பு:தமிழகத்தில் காற்றாலை மின்சாரத்தில் ஏற்ற இறக்கம் அதிகம் உள்ளது. மத்திய மின் தொகுப்பில் இருந்து பெறப்படும் தமிழகத்தின் பங்கான, 2,950 மெகாவாட், 1,850 மெகாவாட்டாக குறைந்துள்ளது. நீர் மின் தேக்கங்களில் தண்ணீர் குறைவாக இருப்ப தால், மின்சாரம் அங்கிருந்தும் கிடைக்கவில்லை. கடந்த, 17ம் தேதி முதல், மத்திய ஒழுங்குமுறை ஆணையம், மின் கட்டமைப்பு இயக்க விதிகளை கடுமையாக அமல்படுத்தியதால், மின் கட்டமைப்பில் இருந்து, மின்சாரம் பெறுவது முற்றிலும் தடைபட்டு உள்ளது. எனவே, மின் கட்டமைப்பு பாதுகாப்பு கருதி, காற்றாலை மின்சாரம் குறையும் போது, கூடுதல் மின்தடை அமல்படுத்தப்படுகிறது.வெளிமாநிலங்களில் இருந்து, 1,200 மெகாவாட் மின்சாரம் கொள்முதல் செய்ய உத்தரவு அளித்திருந்தும், மத்திய மின் கட்டமைப்புக் கழகம் மற்ற மாநிலங்களில் இருந்து போதிய அளவு மின்பாதை அமைக்காததால், 1,000 மெகாவாட் அளவிற்கு கூட, தமிழகத்திற்கு மின்சாரம் கிடைக்கவில்லை.இதனால், சென்னை தவிர மற்ற இடங்களில், எட்டு மணி முதல் 10 மணி நேரம் வரையில் மின்தடை செய்ய நேரிட்டது.

>>>உடம்பை உடைக்கும் புத்தக பை

 

பள்ளி செல்லும் குழந்தைகளுக்கு சுமை, அங்கு நடத்தப்படும் பாடம் மட்டுமல்ல. அவர்கள் சுமந்து செல்லும் புத்தக பையும் தான். காலையில், புத்தக பையை மாட்டிக்கொண்டு பள்ளி செல்லும் குழந்தையை பார்த்தால் ஒரு நிமிடம் நின்று அவர்களை பார்க்கத் தோன்றும். அந்தளவு அழகாக இருக்கும். குழந்தை, பெரிய பையை கொண்டு செல்கிறார்கள் என சில பெற்றோரும் பெருமையாக நினைக்கின்றனர்.

உண்மையில் நடப்பது என்ன தெரியுமா? அளவுக்கு அதிகமான பாடப் புத்தகங்களை சுமந்து செல்லும் குழந்தைகளுக்கு முதுகு வலி, கழுத்து வலி உள்ளிட்ட பல்வேறு பாதிப்புகள் வருகின்றன என ஆய்வு முடிவுகள் எச்சரிக்கின்றன. குழந்தைகளுக்கு மட்டுமல்லாமல், கல்லூரி மாணவர்கள், மார்க்கெட்டிங் செய்வோர், கம்ப்யூட்டர் இன்ஜினியர்கள் ஆகியோர் அதிக எடை கொண்ட பையை சுமந்து செல்கின்றனர். இவர்களுக்கு முதுகு வலி, கழுத்து வலி, தண்டுவடம் பாதிப்பு, கூன் விழுதல் போன்ற பாதிப்புகள் ஏற்படுகின்றன என டாக்டர்கள் எச்சரிக்கின்றனர். உலக சுகாதார நிறுவனம் வெளியிட்டுள்ள அறிக்கையில், உலக மக்கள் தொகையில் 40 - 80 சதவீதம் பேருக்கு முதுகுவலி பாதிப்பு இருப்பதாக தெரிவிக்கப்பட்டுள்ளது. பணிச் சுமை, ஒரே இடத்தில் அதிக நேரம் உட்காருதல், உடல் உழைப்பு இல்லாமை, எடை அதிகரிப்பு ஆகிய காரணங்களாலும் இன்றைய இளைஞர்கள் முதுகுவலியால் அவதிப்படுகின்றனர்.

எங்கு பாதிப்பு அதிகம்:

இது குறித்து பெங்களூரு தனியார் அமைப்பு நடத்திய ஆய்வில் தெரிவிக்கப்பட்டுள்ளதாவது : "குழந்தைகள் சுமக்கும் "பை'களால் கழுத்து மற்றும் முதுகில் மேல் பகுதியில் கடும் வலி உண்டாகிறது. முதுகின் மேல் பகுதி (40 சதவீதம்), கழுத்து ( 27 சதவீதம்), தோள் பட்டை ( 20 சதவீதம்), முன் கை மணிக்கட்டு (7 சதவீதம்), முதுகின் கீழ் பகுதி (6 சதவீதம்)யில் வலி உண்டாகிறது'. இப்பிரச்னையில் இருந்து தப்பிக்க, தேவையான புத்தகங்களை மட்டும் குழந்தைகள் எடுத்துச் செல்ல ஆசிரியர்கள் அறுவுறுத்த வேண்டும். சில பள்ளிகளில் அனைத்து புத்தகங்களையும் எடுத்துவரச் சொல்கின்றன. இதற்கு பதில், பள்ளிகளிலேயே மாணவர்களுக்கான "லாக்கர்களை' ஏற்டுத்த பள்ளி நிர்வாகங்கள் முன்வர வேண்டும். இவ்வாறு ஆய்வு முடிவில் கூறப்பட்டுள்ளது.

இளைஞர்களுக்கு:

பைக்கில் அதிக தூரம் செல்ல வேண்டி இருந்தால் பைகளை தோளில் தொங்க விடாமல், பைக்கின் முன்பகுதியில் வைத்துச் செல்லலாம். ஒரே இடத்தில் அதிக நேரம் உட்காரவோ, நிற்கவோ கூடாது. இதற்கு பதில், சிறிது நேரம் ஓய்வு அல்லது வாக்கிங் அல்லது ரன்னிங் போகலாம். மன அழுத்தம் உடலின் தசைகளுக்கு பாதிப்பை ஏற்படுத்தும். எனவே, இச்சமயத்தில் சிறிது நேரம் மூச்சுப் பயிற்சி செய்யலாம். புகை பிடிப்பது முதுகெலும்பில் பாதிப்பை ஏற்படுத்தும். அப்பழக்கத்தை அறவே விட்டொழியுங்கள். முறையான தலையணைகளை பயன்படுத்துவதன் மூலம், கழுத்து வலியில் இருந்து தப்பிக்கலாம்.

எப்படி இருக்க வேண்டும் புத்தக பை:

* தோளில் தொங்க விடப்படும் பை, நன்கு அகலமாக, பட்டையாக இருக்கு வேண்டும்.
* ஒற்றை பட்டையை தவிர்க்க வேண்டும்.
* குழந்தையின் எடையில், 10 - 20 சதவீத எடைக்கு மேல் பையின் எடை இருக்கக் கூடாது.
* புத்தக பையுடன் நடக்கும் போது, சாய்ந்தவாறு நடக்கக்கூடாது.
* படத்தில் உள்ளது போல, புத்தக பை, சரிந்து இருக்குமானால், பையின் எடை அதிகரித்து குழந்தை முதுகுத் தண்டு பாதிக்கப்படும்.
* பையின் அளவு, குழந்தையின் முதுகின் அளவை விட, அதிகமாக இருக்கக்கூடாது.
* "பை'யின் பின்புறம் கீழே "பிடி' இருப்பது நல்லது.
* தேவையில்லாத புத்தகம், நோட்டுகளை எடுத்துச்செல்ல வேண்டாம் என குழந்தைகளுக்கு அறுவுறுத்த வேண்டும்.

>>>செப்டம்பர் 22 [September 22]....

• ஆட்டோமொபைல் இல்லா தினம்
• மாலி விடுதலை தினம்(1960)
• இந்திய-பாகிஸ்தான் போர் முடிவுக்கு வந்தது(1965)
• அமெரிக்காவில் தயாரிக்கப்பட்ட ஆட்டோமொபைல் முதன் முதலில் காட்சிப்படுத்தப்பட்டது(1893)

>>>புதிய 100 ரூபாய் நோட்டு விரைவில் வெளியீடு

புதிய நூறு ரூபாய் நோட்டை, ரிசர்வ் வங்கி விரைவில் வெளியிடுகிறது. இதுகுறித்து, ரிசர்வ் வங்கி வட்டாரங்கள் தெரிவித்ததாவது: மகாத்மா காந்தி உருவம் பொறிக்கப்பட்டு வெளியிடப்படும், நூறு ரூபாய் நோட்டில், கூடுதலாக, "ஜி' என்ற எழுத்து சேர்க்கப்பட்டிருக்கும். அத்துடன், ரிசர்வ் வங்கி கவர்னர் சுப்பாராவின் கையெழுத்தும், ரூபாய் நோட்டு, அச்சடிக்கப்பட்ட ஆண்டின் விவரங்களும் இருக்கும். தற்போது, நடைமுறையில் உள்ள, நூறு ரூபாய் நோட்டுகளைப் போலவே, இப்புதிய ரூபாய் நோட்டுகளும் இருக்கும்.
இவ்வாறு, ரிசர்வ் வங்கி வட்டாரங்கள் தெரிவித்துள்ளன.

>>>டி.இ.டி., தகுதித்தேர்வு ஒத்திவைப்பு

ஆசிரியர் தகுதித்தேர்வு அக்டோபர் 14ம் தேதிக்கு ஒத்திவைக்கப்பட்டது. கடந்த சில நாட்களுக்கு முன்னர் ஆசிரியர் தகுதித்தேர்வு நடைபெற்றது. இதில் குறைந்த அளவிலேயே தேர்ச்சி பெற்றனர். இதனையடுத்து மீண்டும் அக்டோபர் 3ம் தேதி நடைபெறும் எனவும், புதிதாக யாரும் விண்ணப்பிக்க முடியாது என அறிவிக்கப்பட்டது. இதனை எதிர்த்து சென்னை ஐகோர்ட்டில் வழக்கு தொடரப்பட்டது. இந்த வழக்கு இன்று விசாரணைக்கு வந்தது. அப்போது ஆசிரியர் தகுதி தேர்வு அக்டோபர் 14ம் தேதி நடைபெறும் என ஆசிரியர் தகுதி தேர்வு வாரிய தலைவர் சென்னை ஐகோர்ட்டில் கூறினார். புதிதாக விண்ணப்பிப்பவர்கள் வரும் 24ம் தேதி முதல் 28ம் தேதி வரை விண்ணப்பிக்கலாம் என அறிவிக்கப்பட்டுள்ளது.

>>>உலகின் உடனடி தேவை: இன்று உலக அமைதி தினம்

அமைதி - இது எங்குள்ளதோ அந்த இடம் எவ்வித பிரச்னைகளும் இல்லாமல் மகிழ்ச்சியாக இருக்கும். அனைத்து பிரச்னைகளுக்கும், அமைதியே மருந்து. உலகில் அமைதியை வலியுறுத்தியும், நாடுகளிடையே போர் ஏற்படுவதை முற்றிலும் தடுக்கும் விதத்திலும் ஐ.நா., சார்பில் செப்., 21ம் தேதி, உலக அமைதி தினம் கடைபிடிக்கப்படுகிறது. 1981ல் முதன் முதலாக தொடங்கப்பட்ட இத்தினம், உலகில் வன்முறை அதிகரிப்பதை தவிர்த்து, அமைதி நிலவ, ஒவ்வொருவரும் பங்களிக்க வேண்டும் என்பதை வலியுறுத்துகிறது. இன்றைய சூழலில், ஒவ்வொரு நாடும் மற்ற நாட்டுடன் கல்வி, விஞ்ஞானம், விளையாட்டு, பொருளாதாரம் ஆகிய துறைகளிலும் போட்டி போடுகின்றன. இந்த போட்டி, ஆக்கபூர்வமாக அமைந்தால் பாராட்டுக்குரியது. மாறாக சில நாடுகள், மற்ற நாடுகளுடன் நட்பு பாராட்டுவதற்கு பதில், பகைமை உணர்வுடன் செயல்படுகின்றன.

பயங்கரவாதம் ஒழிய...: உலகில் ஏதாவது இரு நாடுகளிடையே சண்டை ஏற்பட்டால், அது அந்த நாடுகளை மட்டுமல்லாமல் மற்ற நாடுகளின் அமைதிக்கும் ஆபத்தை விளைவிக்கிறது. அனைத்து நாடுகளும், பிரச்னைகளை பேச்சுவார்த்தை மூலமே தீர்க்க வேண்டும் என ஐ.நா., சபை வலியுறுத்துகிறது. மாறாக வன்முறையை தேர்ந்தெடுத்தால், பிரச்னையும் தீராது, பொருளாதாரமும் வீழ்ச்சியடையும். பயங்கரவாதத்தை ஒழிக்க, அனைத்து நாடுகளும் உடனடியாக ஒருங்கிணைந்து செயல்பட்டால் ஒழிய, அமைதியான உலகை உருவாக்க முடியாது. உலகில் அமைதியை நிலைநாட்டுவதற்கு பாடுபட்டவர்களை பாராட்டும் விதமாக அமைதிக்கான நோபல் பரிசு மற்றும் ஐ.நா., வின் அமைதி பரிசு ஆகிய விருதுகள் ஆண்டுதோறும் வழங்கப்படுகிறது.