>>>மனசாட்சியுடன் பணியாற்ற உறுதியேற்க வேண்டும் : இயக்குனர் அறிவுறுத்தல்

"பள்ளி தலைமையாசிரியர்கள் மனசாட்சியுடன் பணியாற்றி, மாணவர்களின் தேர்ச்சிக்காக உழைக்க வேண்டும்,'' என, அனைவருக்கும் இடைநிலை கல்வி (ஆர்.எம்.எஸ்.ஏ.,) திட்ட இயக்குனர் இளங்கோவன் பேசினார்.

மதுரை, தேனி, திண்டுக்கல் மாவட்டங்களில், பத்தாம் வகுப்பு பொது தேர்வில், குறைந்த அளவு தேர்ச்சி விகிதம் பெற்ற பள்ளிகளின் தலைமையாசிரியர்களுக்கான சிறப்பு பயிற்சி முகாம், மதுரை வேலம்மாள் பள்ளியில் நேற்று நடந்தது. இதில், இளங்கோவன் பேசியதாவது: மாணவர்களின் தேர்ச்சி விகிதத்தில் தலைமையாசிரியர்களின் பங்கு முக்கியம். பத்தாவது மற்றும் பிளஸ் 2 தேர்ச்சி என்பது மாணவர்களின் எதிர்காலத்தை நிர்ணயிக்கும். இதில் தோல்வி ஏற்படும் போது மாணவரின் வாழ்க்கை திசைமாறி செல்ல வாய்ப்புள்ளது. ஆசிரியர்கள் மாணவர்களின் "ரோல் மாடல்'. இதை புரிந்து ஆசிரியர்களின் செயல்பாடு அமைய வேண்டும். இதுவரை உங்களின் செயல்பாடுகளை சுயபரிசோதனை செய்துகொண்டு, இந்த பயிற்சிக்கு பின்னராவது "மாணவர்களின் முன்னேற்றத்துக்காக நல்ல விஷயம் செய்ய வேண்டும்' என்று, நீங்களே உறுதி எடுத்துக்கொள்ளுங்கள். மனசாட்சிப்படி மாணவர்களின் தேர்ச்சி விகிதத்தை அதிகரித்து, பள்ளிகளில் "ரிசல்ட்'டை அதிகரிக்க வேண்டும், என்றார்.

>>>அக்., 20ல் பல்கலை பட்டமளிப்பு விழா

மதுரை காமராஜ் பல்கலை பட்டமளிப்பு விழா, அக்.,20ல் நடக்கிறது. தமிழக கவர்னர் ரோசய்யா, உயர் கல்வி துறை அமைச்சர் பழனியப்பன் பங்கேற்கின்றனர். விழாவில், 85 பேருக்கு "டாக்டர்' பட்டங்களும், பல்வேறு துறைகளில் பல்கலை அளவில் "ரேங்க்' பெற்ற 80 பேர் உள்பட 35,000 பேருக்கு பட்டம் வழங்கப்படுகிறது. விழா ஏற்பாட்டை, துணைவேந்தர் கல்யாணி, பதிவாளர் (பொறுப்பு) பிச்சுமணி செய்துவருகின்றனர்.

>>>மதுரை மல்லிகைக்கு "புவிசார் குறியீடு': மலருக்கு கிடைத்த, "முதல் மரியாதை'

உலகளவில் தனித்துவம் வாய்ந்தது மதுரை மல்லிகை என்பதைக் குறிக்கும் வகையில், "புவிசார் குறியீடு' (ஜி.ஐ.,) கிடைத்துள்ளது,'' என, மதுரை விவசாயக் கல்லூரி டீன் வைரவன் தெரிவித்தார்.

மதுரை, திண்டுக்கல், தேனி, ராமநாதபுரம், சிவகங்கை, விருதுநகர் மாவட்டங்களை உள்ளடக்கிய, "பழைய மதுரையின்' மண்வளம், மல்லிகைக்கு ஏற்றது. இந்த மண்ணில் விளையும் மல்லிகைக்கு மட்டும் கூடுதல் மணம், வெண்மை உண்டு. இரண்டு நாட்கள் வரை பூக்கள் வாடமல் நன்றாக இருக்கும். பூவின் காம்பும், இதழ்களும் சம உயரத்தில் இருக்கும். மதுரை மல்லி வாசம் என்றே சிறப்புடன் காலம் காலமாக போற்றப்படுவதே, மதுரை மல்லிகைக்கு சிறப்பு. தமிழகத்தின் பல இடங்களில், பரவலாக மல்லிகைப் பூக்கள் விளைந்தாலும், மதுரையின் சிறப்பு வேறிடத்தில் இல்லை. மதுரை மார்க்கெட்டிற்கு மட்டும் பிப்ரவரி, ஏப்ரல் மாதங்களில் 15 முதல் 20 டன் பூக்கள் வரத்து இருக்கும். நவம்பர், டிசம்பரில் வேறெங்கும் பூக்கள் உற்பத்தி இருக்காது; மதுரையில் மட்டும் குறைந்தளவு உற்பத்தி இருக்கும். இந்த சிறப்புகளுக்காக, மதுரை மல்லிகைக்கு "புவிசார் குறியீடு' கிடைத்துள்ளது. நாட்டில் ஒரு பூவிற்கு "புவிசார் குறியீடு' கிடைத்தது, இதுவே முதல்முறை.

இதுகுறித்து டீன் கூறியதாவது:

இரண்டு ஆண்டுகளாக, மதுரை விவசாயக் கல்லூரி ஆராய்ச்சி நிலையம் சார்பில், மல்லிகைக்கு "புவிசார் குறியீடு' பெறும் முயற்சியில் ஈடுபட்டோம். தனிநபர் பெயரில் வாங்க முடியாது என்பதால், தானம் அறக்கட்டளை மூலம், ஆறு மாவட்ட மல்லிகைப்பூ உற்பத்தியாளர்களை ஒருங்கிணைத்து, சங்கம் அமைத்தோம்; இதில் 200 பேர் உறுப்பினர்களாக உள்ளனர்; தொழில்நுட்ப ரீதியான ஆவணங்களை, மார்ச் 2011ல், சென்னையில் உள்ள அலுவலகத்தில் சமர்ப்பித்தோம்; மீண்டும் சில ஆவணங்கள் தேவைப்பட்டதால், திருத்தப்பட்டு, மார்ச் 2012 ல், மீண்டும் விண்ணப்பித்தோம். இதற்கு ஒப்புதல் வழங்கப்பட்டுள்ளது. தற்போது "அறிவுசார் சொத்துரிமை' (ஐ.பி.ஆர்.,) இதழில், "மதுரை மல்லிகை'க்கு "புவிசார் குறியீடு' வழங்கப்பட்டுள்ளதாக, வெளியிடப்பட்டுள்ளது. தொல்காப்பியம், பரிபாடல், திருவிளையாடற் புராணங்களில் "மதுரை மல்லிகை' பற்றி கூறப்பட்டுள்ள ஆவணங்களை, திரட்டியுள்ளோம். வெளிநாடுகளுக்கு ஏற்றுமதி செய்யும் போது "பேக்கிங்' முக்கியம். அதற்கான தொழில்நுட்பத்தையும் விவசாயிகள், விற்பனையாளர்களுக்கு கற்றுத்தர உள்ளோம். நவம்பர், டிசம்பரில், உற்பத்தியை அதிகரிப்பதற்கான தொழில்நுட்பத்தை ஆய்வு செய்து வருகிறோம். இவ்வாறு அவர் கூறினார்.

தமிழ்நாடு தொழில் வர்த்தக சங்கத் தலைவர் என்.ஜெகதீசன்:

இதனால் பூ வர்த்தகம் இன்னும் அதிகரிக்கும். "மதுரை மல்லிகை' என்று பெருமையாக சொன்னாலும், நான்கு ஆண்டுகளில் உற்பத்தி 30 சதவீதம் குறைந்துவிட்டது. விளைநிலங்கள் மனையாகி விட்டன; பத்தியை மீண்டும் அதிகரிக்க வேண்டிய கட்டாயத்தில் இருக்கிறோம். தற்போது துபாய், கனடா, தென்கிழக்கு ஆசிய நாடுகளுக்கு, சென்னையிலிருந்து தான் ஏற்றுமதி செய்கிறோம். மதுரை விமான நிலையத்தில் பன்னாட்டு சேவை துவங்கினால், அதிகமாக ஏற்றுமதி செய்ய முடியும். அதற்கேற்ப உற்பத்தியை அதிகரிக்க ஏற்பாடு செய்யலாம்.

கலப்படம் செய்தால் "காப்பு'

* புவிசார் குறியீடு கிடைத்திருப்பதால், வெளிநாட்டு ஏற்றுமதிக்கு, குறிப்பிட்ட விலையை இனி நிர்ணயிக்க முடியும்.

* விவசாயிகளுக்கு நல்ல விலை கிடைக்கும்.

* இப்பெயரில், மற்ற பகுதிகளில் விளையும் மல்லிகைப் பூக்களை கலப்படம் செய்ய முடியாது. அப்படி செய்தால், 2 லட்சம் ரூபாய் அபராதம், ஐந்தாண்டு சிறை தண்டனை உண்டு.

"புவிசார் குறியீடு' என்றால் என்ன?:

ஒரு குறிப்பிட்ட இடத்தையோ (புவியியல்) அல்லது தோற்றத்தையோ, குறிப்பிடும் பொருளின் மீது பயன்படுத்தப்படும் பெயர் அல்லது சின்னம், "புவிசார் குறியீடு' (ஜியாகிரபிக்கல் இண்டிகேஷன்) எனப்படுகிறது. இக்குறியீடு, அந்த பொருளின் சொந்த இடத்தின் தரத்தையும், நன்மதிப்பையும் பறை சாற்றும் சின்னமாக விளங்கும். இந்தியாவில் பாரம்பரியம் மிக்க பொருட்களுக்கு, மத்திய அரசு அங்கீகாரம் அளித்து பாதுகாக்கிறது. இச்சட்டம் 1999ம் ஆண்டு அறிமுகப்படுத்தப்பட்டு, செப்.15, 2003ம் ஆண்டு அமலுக்கு வந்தது.

இதன்படி மத்திய அரசால் பதிவு செய்யப்பட்ட தமிழக பொருட்கள்:

* சேலம் பேப்ரிக்
* காஞ்சிபுரம் பட்டு
* பவானி ஜமுக்காளம்
* மதுரை சுங்குடி
* கோவை வெட் கிரைண்டர்
* தஞ்சாவூர் வண்ண ஓவியங்கள்
* நாகர்கோவில் கோவில் நகைகள்
* தஞ்சாவூர் கலை தகடுகள்
* ஈஸ்ட் இந்தியா லெதர்
* சேலம் வெண்பட்டு
* கோவை கோரா பட்டு
* ஆரணி பட்டு
* சுவாமிமலை வெண்கலப் பொருட்கள்
* ஈத்தாமொழி நெட்டை தென்னை
* தஞ்சாவூர் பொம்மை
* விருப்பாச்சி மலை வாழை
* சிறுமலை மலை வாழை
* தற்போது மதுரை மல்லி

>>>பி.எட் மற்றும் எம்.எட் மறுமதிப்பீடு முடிவு இன்று வெளியீடு

தமிழ்நாடு கல்வியியல் கல்லூரிகளுக்கான தேர்வு முடிவுகள் இன்று வெளியிடப்படுகின்றன. பி.எட்., மற்றும் எம்.எட்., மறு மதிப்பீட்டின் முடிவுகளும் இன்று வெளியாகின்றன.

இதுதொடர்பாக தமிழ்நாடு ஆசிரியர் கல்வியியல் பல்கலைக் கழகம் வெளியிட்டுள்ள செய்திக்குறிப்பில், தேர்வில் தவறிய மாணவர்கள், டிசம்பரில் நடக்கும் துணைத் தேர்வுக்கான விண்ணப்ப படிவங்களை, தாங்கள் படித்த கல்லூரி முதல்வரிடம் பெற்றுக் கொள்ளலாம்.

மேலும், ந்ந்ந்.ட்ன்டெஉ.இன் என்ற பல்கலைக்கழக இணையதளத்திலும் விண்ணப்பங்களை பதிவிறக்கம் செய்து கொள்ளலாம். பூர்த்தி செய்யப்பட்ட விண்ணப்பங்கள் கல்லூரி முதல்வர்கள் மூலம் வரும் 29ம் தேதிக்குள் அனுப்ப வேண்டும். அபராத கட்டணத்துடன் நவம்பர் 7ம் தேதி வ்ரை விண்ணப்பங்களை அனுப்பலாம் எனத் தெரிவிக்கப்பட்டுள்ளது.

>>>இந்திய மாணவர்களின் நலன் காக்கப்படுமா?

முறையான வசதிகள் இன்றி செயல்பட்டு வரும், 3 ஆஸ்திரேலிய தொழிற்கல்வி கல்லூரிகளை மூட, அந்நாட்டு அரசு முடிவு செய்திருப்பதால், 500க்கும் மேற்பட்ட இந்திய மாணவர்களின் எதிர்காலம் என்னாகும் என்ற ஐயம் ஏற்பட்டுள்ளது.

ஆனால் அதேநேரத்தில், இத்தகைய மூடுதல் நடவடிக்கையால், இந்திய மாணவர்களின் நலன், எந்தவிதத்திலும் பாதிக்கப்படாது என்று இந்தியாவிற்கான ஆஸ்திரேலிய தூதர் பீட்டர் வர்கீஸ் உறுதியளித்துள்ளார். Australian skills quality authority(ASQA) எனப்படும், ஆஸ்திரேலியாவின் தொழில்முறை கல்வி நெறிமுறை அமைப்பு, விக்டோரியாவில் 2 தொழிற்கல்வி கல்லூரிகளையும், நியூசெளத் வேல்ஸ்சில் 1 தொழிற்கல்வி கல்லூரியையும் மூட முடிவெடுத்துள்ளது.

இதுகுறித்து ASQA தரப்பில் கூறப்படுவதாவது, "பயிற்சி நிறுவனங்களின் தரமும், மாணவர்களின் எதிர்காலமும் மிகவும் முக்கியம். மேலும், குறிப்பிட்ட நிறுவனங்கள், தங்கள் மீது எடுக்கப்பட்ட முடிவுகளை, மறுபரிசீலனை செய்யும்படி கோரும் உரிமையைப் பெற்றுள்ளன".

The Ashmark group pty ltd, G plus G global trading pty ltd, Ivy group போன்றவையே அந்த 3 கல்வி நிறுவனங்கள். The Ashmark group pty ltd -ல் 400க்கும் மேற்பட்ட இந்திய மாணவர்களும், G plus G global trading pty ltd -ல் 100க்கும் மேற்பட்ட இந்திய மாணவர்களும், Ivy group  -ல் 30 இந்திய மாணவர்களும் படித்து வருகின்றனர்.

>>>தொழில்முறை படிப்புகளில் தமிழகம் இரண்டாமிடம்!

பொறியியல், மேலாண்மை, கட்டடக்கலை மற்றும் பார்மசி போன்ற தொழில்முறை படிப்புகளை வழங்குவதில், தமிழகம் 2ம் இடத்தைப் பிடித்துள்ளது.

மொத்தம் 33 மாநிலங்களில், பொறியியல், மேலாண்மை, கம்ப்யூட்டர் அப்ளிகேஷன், கட்டடக்கலை, ஹோட்டல் மேலாண்மை, டிப்ளமோ மற்றும் பார்மசி போன்ற தொழில்முறை படிப்புகளை வழங்குவதில் தமிழகம் 2ம் இடம் வகிக்கிறது. தமிழகத்தில், இதுபோன்ற படிப்புகளின் மொத்த மாணவர் சேர்க்கை 5,31,986. முதலிடத்தில், 6,91,237 மாணவர்களுடன், ஆந்திரா உள்ளது.

கடந்த ஆண்டு, மேற்கூறிய தொழில்முறை படிப்புகளில் 52,506 இடங்கள் அதிகரிக்கப்பட்டன. இதன்மூலம், அதிகளவு பொறியாளர்களையும், மேலாண்மை பட்டதாரிகளையும் உருவாக்கும் மாநிலங்களில், தமிழகம் இரண்டாமிடம் பெற்றது.

தமிழகத்தில், 516 பொறியியல் கல்லூரிகளும், 487 பாலிடெக்னிக் கல்லூரிகளும் உள்ளன. நாட்டில் வழங்கப்படும் ஒட்டுமொத்த தொழில்முறை கல்வியில், 15.4% பங்கை தமிழகம் கொண்டுள்ளது.

அதேசமயம், டெல்லி, அஸ்ஸாம், ஜம்மு காஷ்மீர், ஜார்கண்ட், மணிப்பூர், சத்தீஸ்கர் மற்றும் மிசோரம் ஆகிய மாநிலங்களில், தொழில்முறை படிப்புகளில் மாணவர்கள் சேர்வது குறைந்துள்ளது. மேலும், திரிபுரா, டாமன் அன்ட் டயூ, அருணாச்சல் பிரதேஷ், சண்டிகர் மற்றும் அந்தமான் நிகோபர் தீவுகள் ஆகியவற்றில், இப்படிப்புகளில் மாணவர் சேர்க்கை விகிதத்தில் எந்த மாற்றமுமில்லை.

>>>உதவி நூலகர் பணி வழங்க மறுப்பு: துணைவேந்தருக்கு நோட்டீஸ்

தகுதியானவருக்கு உதவி நூலகர் பணி வழங்காதது குறித்து விளக்கம் அளிக்க, மதுரை காமராஜ் பல்கலை துணைவேந்தர், பதிவாளருக்கு நோட்டீஸ் அனுப்ப மதுரை உயர் நீதிமன்றக் கிளை உத்தரவிட்டது.

மதுரையை சேர்ந்த மனோன்மணி, தாக்கல் செய்த மனுவில், நான், மதுரை காமராஜ் பல்கலை நூலகத்தில் உதவியாளராக சேர்ந்தேன். 18 ஆண்டுகளுக்கு பின் 2009ல் தொழில்நுட்ப உதவியாளரானேன். 2011 டிசம்பர் 27ல் நூலகப் பிரிவில் டாக்டர் பட்டம் பெற்றேன்.

எனக்கு உதவி நூலகராக தகுதியுள்ளது. 2008ல் ஆறு உதவி நூலகர் பணியிடங்கள் காலியாக இருந்தன. தகுதி இருந்தும் எனக்கு பதவி உயர்வு வழங்கவில்லை. 2011 பிப்ரவரி 3ல் நடந்த சிண்டிகேட் கூட்டத்தில், எனக்கு உதவி நூலகர் பணியிடம் வழங்க தீர்மானம் நிறைவேற்றப்பட்டது. இதன்படியும் பதவி உயர்வு வழங்கவில்லை.

இதுகுறித்து துணைவேந்தர், பதிவாளரிடம் முறையிட்டும் பயனில்லை. எனக்கு உதவி நூலகர் பதவியிடம் வழங்க உத்தரவிட வேண்டும், என கோரினார். நீதிபதி வினோத்குமார் சர்மா முன் இந்த மனு விசாரணைக்கு வந்தது. மனுதாரர் சார்பில் வக்கீல் ஒய்.கிருஷ்ணன் ஆஜரானார். இதுபற்றி விளக்கம் அளிக்க, மதுரை காமராஜ் பல்கலை துணைவேந்தர், பதிவாளருக்கு நோட்டீஸ் அனுப்ப நீதிபதி உத்தரவிட்டார்.