>>>வி,ஏ.ஓ. தேர்வு: 20 சதவீதம் பேர் எழுதவில்லை

தமிழகம் முழுவதும் நடைபெற்ற வி.ஏ.ஓ. தேர்வை 20% பேர் எழுதவில்லை. அதிகபட்சமாக சென்னை மாவட்டத்தில் 74.4 சதவீதம் பேர் மட்டுமே தேர்வு எழுதியுள்ளனர் என்று அதிகாரிகள் கூறினர். தேர்வு எழுதியவர்களில் 4.21 லட்சம் பேர் பெண்கள்.

தமிழகம் முழுவதும் 244 தேர்வு மையங்களில் 3,483 தேர்வுக்கூடங்களில் நேற்று வி.ஏ.ஓ. பணியிடத்திற்கான போட்டித் தேர்வு நடைபெற்றது. ஆயிரத்து 870 வி.ஏ.ஓ. பணியிடங்களுக்கு, தமிழ்நாடு பணியாளர் தேர்வாணையம் நடத்திய இந்த தேர்வில் பங்கேற்க 10ம் வகுப்பு படித்தவர்கள், பட்டதாரிகள், ஆசிரியர்கள், பொறியியல் முடித்தவர்கள் அதிகளவில் போட்டி போட்டு விண்ணப்பித்தனர்.

தேர்வுக் கூடங்களை மாவட்ட வருவாய் அலுவலர்கள் தலைமையில் பறக்கும் படையினர் தீவிரமாக கண்காணித்தனர். சென்னையில் நடந்த தேர்வை டிஎன்பிஎஸ்சி தலைவர் நட்ராஜ், செயலர் உதயசந்திரன், தேர்வு கட்டுப்பாட்டு அலுவலர் ஜெயகாந்தன் ஆகியோர் பார்வையிட்டனர். இந்த எழுத்து தேர்வில் வெற்றி பெறுவோர் நேரடியாக பணியில் நியமிக்கப்படுவார்கள்.

சென்னையில் எழும்பூர் மாநில மகளிர் மேல்நிலை பள்ளியில் நடந்த விஏஓ தேர்வை பார்வையிட்ட பின் டிஎன்பிஎஸ்சி தலைவர் நடராஜ் அளித்த பேட்டி:

தமிழகம் முழுவதும் விஏஓ தேர்வு எந்தவித பிரச்னை இல்லாமல் நடந்தது. அதிகபட்சமாக சென்னையில் 70 ஆயிரம் பேர், மதுரையில் 52 ஆயிரம், நெல்லை, சேலத்தில் 51 ஆயிரம் பேர் எழுதியுள்ளனர். தேர்வு மையங்களில் இருந்து விடைத்தாள்கள் அனைத்தும் உடனடியாக சென்னையில் உள்ள டிஎன்பிஎஸ்சி அலுவலகத்துக்கு கொண்டுவர உத்தரவிடப்பட்டுள்ளது.

அதன் பின்னர், விடைத்தாள் ஸ்கேன் செய்யப்படும். ஸ்கேன் செய்யப்பட்ட விடைத்தாள் ஒரு வாரத்தில் இணையதளத்தில் வெளியிடப்படும். தேர்வு எழுதியோர் அதனை பார்த்து கொள்ளலாம். தேர்வு முடிவுகளை ஒரு மாதத்தில் வெளியிட நடவடிக்கைகள் எடுக்கப்பட்டுள்ளது. இவ்வாறு அவர் கூறினார்.

விஏஓ தேர்வுக்கான வினா விடை டிஎன்பிஎஸ்சி இணையதளத்தில் (http://www.tnpsc.gov.in/answerkeys.html) வெளியிடப்பட்டுள்ளது. இந்த விடைகளில் தேர்வர்களுக்கு ஏதேனும் ஆட்சேபனை இருந்தால் 7 நாட்களுக்குள் டிஎன்பிஎஸ்சி அலுவலகத்துக்கு தகவல் தெரிவிக்க வேண்டும்.

அதன் பின்னர் நிபுணர் குழுவுடன் கலந்து ஆலோசித்து விடைகளில் திருத்தம் இருந்தால் அதுபற்றிய விவரம் இணையதளத்தில் மீண்டும் வெளியிடப்படும். அதன் பிறகே விடைத்தாள் திருத்தும் பணி தொடங்கும் என்று டிஎன்பிஎஸ்சி அதிகாரிகள் தெரிவித்தனர்.

>>>மூடு விழாவுக்கு தயாராகும் ஐ.டி.ஐ.கள்: கவனிக்குமா அரசு?

அரசு ஐ.டி.ஐ.களில் வேலைவாய்ப்புகள் அதிகமுள்ள புதிய பாடப்பிரிவுகள் தொடங்கியும், போதிய விளம்பரமின்மையால் மாணவர்கள் சேர்க்கை குறைவாகவே உள்ளது. வறுமைக் கோட்டிற்கு கீழ் வாழும் மக்கள் பயில்வதற்கு வாய்ப்பு அளிக்க, அரசு ஐ.டி.ஐ.,க்கள் மீது, அரசு கவனம் செலுத்த வேண்டும் என்ற கோரிக்கை எழுந்துள்ளது.

தமிழகத்தில் 62 அரசு ஐ.டி.ஐ.களும், 650 தனியார் ஐ.டி.ஐ.களும் இயங்கி வருகின்றன. வங்கிக்கடன் கிடைப்பதால் ஏராளமானோர் பொறியியல், மருத்துவம் படிப்பதையே விரும்புகின்றனர்.மிகக் குறைந்த மதிப்பெண்களும், வறுமைக் கோட்டிற்கு கீழ் வாழ்பவர்களும்தான் ஐ.டி.ஐ.,யில் சேர்ந்து பயிலும் நிலை உள்ளது.

ஆசிரியர்கள் பற்றாக்குறை:தமிழகம் முழுவதிலும் உள்ள ஐ.டி.ஐ.,களில் மாணவர்களுக்கு பயிற்சி அளிக்கக்கூடிய இளநிலை பயிற்சி அலுவலர்கள், உதவி பயிற்சி அலுவலர்கள் பணியிடம் 50 சதவீதம் காலியாக உள்ளது.

கடந்த 2000ம் ஆண்டில், பயிற்சி ஆசிரியர்கள் நியமனம் செய்ததோடு சரி. கடந்த 12 ஆண்டுகளாக இறப்பு, ஓய்வு பெற்ற பயிற்சி அலுவலர்களுக்கு பதிலாக புதிதாக பயிற்சி அலுவலர்கள் இதுவரை நியமிக்கப்படவில்லை.

அதன் காரணமாக தமிழகம் முழுவதும் 550 பயிற்சி அலுவலர்கள் பணியிடம் காலியாக உள்ளன.ஐ.டி.ஐ.,களில் மாணவர்கள் படித்து தெரிந்து கொள்வதை விட, பயிற்சி முறைகள் செய்து கற்றுக் கொள்ளக்கூடிய விஷயங்கள் அதிகம்.

செய்முறைக்காக, தேவையான பொருட்கள் வாங்க, ஐ.டி.ஐ., மாணவர்களுக்கு,  400 ரூபாய் நிதி ஒதுக்குகிறது அரசு. இது போன்ற காரணங்களால், மாணவர்கள், அரசு ஐ.டி.ஐ., களில் சேர ஆர்வம் காட்டுவதுஇல்லை. பி.பி.ஓ., படிப்பில் சேர ஆளில்லை. இதை சரி செய்ய, தமிழகத்தில் உள்ள அரசு ஐ.டி.ஐ.,களில், உலக வங்கி உதவியுடன், 15 ஐ.டி.ஐ., களும், மாநில அரசு நிதி உதவியில், நான்கு ஐ.டி.ஐ., களும் மொத்தம் 19 ஐ.டி.ஐ.,களில் வெளிநாடு மற்றும் உள்நாட்டில் வேலை வாய்ப்பு அளிக்கக்கூடிய சிறந்த "டிரேடுகள்' (திறன்மிகு மையம்) அறிமுகப்படுத்தப்பட்டு உள்ளன.

வேலைவாய்ப்பு: உதாரணமாக, தோல் பொருள் மற்றும் காலணி பிரிவு, கேன்டீன் டெக்னாலஜி, ஆட்டோமொபைல், பி.பி.ஓ., உள்ளிட்ட பல தொழில் பயிற்சிகள் இதில் அடங்கும்.பிளாஸ்டிக் சேர், வாகனங்கள் மட்கார்டு, கார்கள் என, அனைத்திலும் பிளாஸ்டிக் உபயோகம் அதிகரித்து விட்ட இந்த உலகில், பி.பி.ஓ., முடித்தவர்களுக்கு, தனியார் தொழிற்சாலைகளில், வேலை வாய்ப்பு அதிகம் உள்ளது.

போதியளவு விளம்பரம் இல்லாததால், இந்த படிப்பில் மாணவர்கள் சேர அதிகம் ஆர்வம் காட்டுவது இல்லை. 40 மாணவர்கள் இதன் காரணமாக, கடலூரில் உள்ள பி.பி.ஓ., பிரிவில் மொத்தமுள்ள 80 இடங்களில், 40 மாணவர்கள் மட்டுமே சேர்ந்துள்ளனர்.

நடப்பு ஆண்டில் இரண்டு முறை கவுன்சிலிங் நடத்தி, மாணவர்கள் சேர்க்கை நடத்திய போதும், 50 சதவீதம் மட்டுமே இதுவரை நிரம்பியுள்ளன.எனவே, வறுமைக் கோட்டிற்கு கீழ் வாழும் மக்கள் பயில்வதற்கு வாய்ப்பு அளிக்க, அரசு ஐ.டி.ஐ.,க்கள் மீது, அரசு கவனம் செலுத்த வேண்டும் என்ற கருத்து எழுந்து இருக்கிறது.

>>>குரூப் - 2 விடைத்தாள் வழக்கு: சி.பி.சி.ஐ.டி.யிடம் ஆவணங்கள் ஒப்படைப்பு

டி.என்.பி.எஸ்., குரூப்- 2 தேர்வு வினாத்தாள் வெளியான வழக்கை சி.பி.சி.ஐ.டி.,க்கு மாற்ற அரசின் ஒப்புதல் கிடைத்ததையடுத்து, வழக்கு தொடர்பான ஆவணங்கள் நேற்று சி.பி.சி.ஐ.டி.,யிடம் முறையாக ஒப்படைக்கப்பட்டன.

டி.என்.பி.எஸ்.ஸி., சார்பில் தமிழகம் முழுவதும், 3,631 பணியிடங்களுக்கு ஆகஸ்ட், 12ம் தேதி குரூப்- 2 தேர்வு நடந்தது. இதில், 6.40 லட்சம் பேர் எழுதினர்.தேர்வுக்கு முன்பே, ஈரோடு, அரூர் மையங்களில் வினாத்தாள் நகல் வெளியானதால், குரூப்2 தேர்வு ரத்து செய்யப்பட்டது.டி.என்.பி.எஸ்.ஸி., ஈரோடு வட்ட பொறுப்பாளர் லியாகத் அலிகான் கொடுத்த புகாரின் பேரில், ஈரோடு டவுன் போலீஸார் வழக்கு பதிவு செய்தனர்.

குமாரபாளைத்தை சேர்ந்த செந்தில், தனக்கொடி, திருச்செங்கோட்டை சேர்ந்த சுதாகர், கவுந்தப்பாடியை சேர்ந்த வரதராஜன் உள்ளிட்ட பத்து பேரை கைது செய்தனர்.முக்கிய குற்றவாளியான, சென்னையை சேர்ந்த பாலன் என்ற ஸ்ரீதர்ராஜிடம் நடத்திய விசாரணையில், திருவள்ளூரை சேர்ந்த தியாகராஜனிடம் இருந்து வினாத்தாள் வாங்கியதாக தெரிவித்தார்.

தியாகராஜன் கொடுத்த தகவலை அடுத்து, விசாகப்பட்டிணம் சென்ற போலீஸார், ஆந்திராவை சேர்ந்த ஆனந்தராவை கைது செய்து, கஸ்டடி எடுத்து விசாரித்தனர்.இதில், விசாகப்பட்டிணத்தைச் சேர்ந்த கக்கூன் என்பவர் பெயரை கூறியதால், அவர் தான் முக்கிய குற்றவாளியென முடி செய்தனர்.

இவ்வழக்கில், முக்கிய குற்றவாளிகள் ஒடிசா, கொல்கத்தா, ஆந்திரா என வெளிமாநிலங்களில் இருப்பதால், உள்ளூர் போலீஸாரால் முழுமையாக எடுத்துச் செல்ல முடியவில்லை. வழக்கை சி.பி.சி.ஐ.டி., வசம் ஒப்படைக்க நடவடிக்கை எடுக்கப்பட்டது.

தமிழக அரசின் ஒப்புதல் கிடைத்ததையடுத்து, ஈரோடு டவுன் போலீஸ் இன்ஸ்பெக்டர் வேலுமணி, கோவையில் சி.பி.சி.ஐ.டி., டி.எஸ்.பி., ராஜராஜனிடம், வழக்கு தொடர்பான முக்கிய ஆவணங்களையும் ஒப்படைத்தார். வழக்கு சி.பி.சி.ஐ.டி.,க்கு மாறியுள்ளதால், விசாரணை வேகமெடுத்து, விரைவில் முக்கிய குற்றவாளிகள் அனைவரும் பிடிபடுவர் என, எதிர்பார்க்கப்படுகிறது.

>>>அனுபவங்களின் பொக்கிஷம்-இன்று உலக முதியோர் தினம்

சுருங்கிய தோல்கள், மங்கிய கண்கள், நரைத்த முடி ஆகியவற்றுடன் அனைவரது குடும்பத்திலும் இருக்கின்றனர் முதியோர். வாழ்க்கைப் பயணத்தில் இவர்கள் பெற்ற குழந்தைகளுக்காக உழைத்து, முதிர்ந்த வயதில் தள்ளாடி நிற்கின்றனர். இவர்களின் உழைப்பு மற்றும் தியாகத்தை மறக்காமல், அவர்களிடம் அன்பு காட்டி அரவணைக்க வேண்டும் என்ற நோக்கத்தோடு ஆண்டுதோறும் அக்., 1ம் தேதி, சர்வதேச முதியோர் தினம் கொண்டாடப்படுகிறது.

இத்தினத்தில், தொண்டு நிறுவனங்களும், சமூக அமைப்புகளும் முதியோரை மகிழ்விக்கும் விதமாக பல்வேறு நிகழ்ச்சிகளை நடத்துகின்றன. இன்றைய சூழ்நிலையில் பெரும்பாலான இடங்களில், முதியோரின் நிலை பரிதாபமாக உள்ளது. பெற்ற பிள்ளைகள் இருந்தும், 60 வயதைத் தாண்டிய பின்னரும், ஓய்வெடுக்க முடியால், பசிக்காக உழைத்துக்கொண்டிருக்கும் நிறைய முதியோரை நாம் பார்க்க முடிகிறது. இவர்களின் அனுபவங்களை, பொக்கிஷமாக கருத வேண்டும்.

மூன்றில் ஒருவர்:உலக மக்கள்தொகையில் 10ல் ஒருவர் 60வயதுக்கு மேற்பட்டவராக இருக்கிறார். இது, 2050ல் ஐந்தில் ஒருவராகவும், 2150ல் மூன்றில் ஒருவராகவும் இருக்கும் என மதிப்பிடப்பட்டுள்ளது.

மனதால் குழந்தைகள்:

முதியோரும், குழந்தையும் மனதால் ஒன்று எனக் கூறுவர். ஞாபக மறதி காரணமாக, நம்மிடம் கேட்டவற்றையே திரும்ப திரும்ப கேட்பர். இதற்கு அவர்களிடம் கோபம் காட்டாமல், பரிவுடன் உதவ வேண்டும். முதியோரை இதுநாள் வரை, கவனிக்க மறந்து விட்டாலும், இத்தினத்தை ஒரு வாய்ப்பாக பயன்படுத்தி, அவர்களிடம் அன்பு செலுத்த முன் வரவேண்டும். நாமும் நாளை முதியோர் ஆவோம் என்பதை மனதில் நிறுத்துங்கள்.

ஏன் இந்த நிலை:

பிள்ளைகள் நல்ல வசதியோடு இருந்தும், பெற்றோர்களை பார்த்துக்கொள்ளாமல் முதியோர் இல்லங்களில் சேர்க்கும் கொடுமையும், நமது நாட்டில் நடக்கிறது. இவ்வாறு முதியோரை கவனிக்க மறுத்தவர்கள், அவர்களை திரும்பவும் வீட்டுக்கு அழைத்து வர முயற்சி எடுங்கள். முதியோரின் ஆசி இருப்பின், வாழ்க்கையில் உயர்ந்த நிலையை அடையலாம்.

>>>ராணுவ மருத்துவமனைகளில் செவிலியர் பயிற்சி

ராணுவ மருத்துவமனைகள் மூலம் நடத்தப்படும் செவிலியர் பயிற்சிப் பள்ளிகளில் இளநிலை நர்சிங் படிப்பு பயில விரும்புபவர்களிடம் இருந்து விண்ணப்பங்கள் அழைக்கப்பட்டுள்ளன.

அரசால் அங்கீகரிக்கப்பட்ட பள்ளியில், வேதியியல், இயற்பியல், உயிரியலில் 50 சதவீத மதிப்பெண்களுடன் 10ம், 12ம் வகுப்பு பயின்றவர்கள் விண்ணப்பிக்கலாம்.   திருமணமாக பெண்கள், விதவைகள் மட்டுமே விண்ணப்பிக்க முடியும். விண்ணப்பிப்பவர் 1988 ஆகஸ்ட் 1ம் தேதி முதல் 1996 ஜூலை மாதம் 31ம் தேதிக்குள் பிறந்தவராகவும், இந்தியராகவும்  இருக்க வேண்டும்.

உடல்தகுதி மற்றும் எழுத்துத் தேர்வின் அடிப்படையில் தேர்வு செய்யப்படுவர். A4 தாளில் தங்களது சுய விவரங்களை எழுதி அனுப்பி விண்ணப்பிக்கவும். 10ம்,12ம் வகுப்பு மதிப்பெண் சான்றிதழ், சாதிச்சான்றிதழ் 3 பிரதிகள் போன்றவற்றையும் விண்ணப்பத்துடன் இணைத்து அனுப்பவும்.

அக்டோபர் 8ம் தேதிக்குள் கிடைக்குமாறு விண்ணப்பங்களை அனுப்ப வேண்டும். Integrated Hq Of MoD(ARMY), DG Of Medical Services (ARMY)/DGMS-4B, AG&'s Branch, Room NO 45, &'L&' Block Hutments, New Delhi-110 001 என்ற  முகவரிக்கு விண்ணப்பங்களை அனுப்பலாம். மேலும் விவரங்களுக்கு www.indianarmy.nic.in, www.indianarmy.gov.in எனும் இணையதளங்களை அணுகலாம்.

>>>வி.ஏ.ஓ. தேர்வு முடிவு ஒரு மாதத்தில் வெளியீடு: நட்ராஜ்

தமிழகம் முழுவதும் சுமார் 3 ஆயிரத்து 500 தேர்வு மையங்களில் நடைபெற்ற வி.ஏ.ஓ தேர்வின் முடிவுகள் இன்னும் ஒரு மாத காலத்தில் வெளியிடப்படும் என டி.என்.பி.எஸ்.சி. தலைவர் நட்ராஜ் கூறியுள்ளார்.

தமிழ்நாட்டில் காலியாக உள்ள ஆயிரத்து 870 வி.ஏ.ஓ. பணியிடங்களுக்கு, தமிழ்நாடு பணியாளர் தேர்வாணையம் போட்டித் தேர்வு நடத்தியது. இந்த தேர்வில் பங்கேற்க 10ம் வகுப்பு படித்தவர்கள், பட்டதாரிகள், ஆசிரியர்கள், பொறியியல் முடித்தவர்கள் அதிகளவில் போட்டி போட்டு விண்ணப்பித்தனர்.

இவர்களுக்கு காலை 10 மணி முதல் மதியம் ஒரு மணி வரை எழுத்து தேர்வு நடந்தது. 3483 தேர்வு மையங்களில் பலத்த கண்காணிப்புக்கு மத்தியில் 9 லட்சத்து 72 ஆயிரம் பேர் தேர்வு எழுதினர்.

இந்த தேர்வு மையங்களுக்குள் செல்போன், கால்குலேட்டர் உள்ளிட்ட எலக்ட்ரானிக் பொருட்களை கொண்டு செல்ல தடை விதிக்கப்பட்டிருந்தது. மேலும் தேர்வு மையங்கள் வீடியோ கேமரா மற்றும் வெப்கேமரா மூலமும் கண்காணிக்கப்பட்டது.

இதுதவிர பறக்கும் படையினரும் தேர்வு மையங்களுக்கு சென்று கண்காணித்தனர். மாவட்ட வருவாய் அதிகாரிகள், தாசில்தார்கள் இதில் இடம் பெற்று இருந்தனர்.

வி.ஏ.ஓ. தேர்வில் வெற்றி பெறுபவர்களுக்கு நேர்முகத்தேர்வு கிடையாது. நேரடியாக வேலை கிடைத்து விடும். கடந்த ஆகஸ்டு மாதம் 12ம் தேதி ஆறரை லட்சம் பேர் தேர்வு எழுதிய குரூப்- 2 தேர்வின் போது விடைத்தாள் வெளியானதால் அந்த தேர்வு ரத்து செய்யப்பட்டது. அதுபோன்ற சம்பவம் வி.ஏ.ஓ. தேர்வில் நடந்து விடக்கூடாது என்பதற்காக கேள்வித்தாள் பலத்த பாதுகாப்புடன் கொண்டு வரப்பட்டு இருந்தது.

இன்று நடந்த தேர்வு குறித்து டி.என்.பி.எஸ்.சி. தலைவர் நடராஜ் கூறியதாவது: வி.ஏ.ஓ. தேர்வு முடிவுகள் ஒரு மாதத்தில் வெளியிடப்படும். தேர்வு விடைகள் இன்று மாலையே இணையதளத்தில் வெளியிடப்படும்.

தேர்வர்களின் விடைத்தாள் நகல்கள் ஒரு வாரத்தில் இணையதளத்தில் வெளியாகும். குரூப்- 2 தேர்வு முறைகேட்டில் ஈடுபட்ட அனைவரும் கைது செய்யப்பட்டு உள்ளனர். இனி டி.என்.பி.எஸ்.சி. தேர்வில் முறைகேடு நடக்க வாய்ப்பு இல்லை என்றார்.

>>>அக்டோபர் 01 [October 01]....

• உலக முதியோர் தினம்
• உலக சைவ உணவாளர்கள் தினம்
• தென்கொரியா ராணுவ தினம்
• சிங்கப்பூர் குழந்தைகள் தினம்
• இந்திய அஞ்சல் துறை ஏற்படுத்தப்பட்டது(1854)