>>>திறந்தநிலை பல்கலை துணைவேந்தர் தேர்வு செய்ய மூவர் குழு அமைப்பு

தமிழ்நாடு திறந்த நிலை பல்கலைக்கழக துணைவேந்தரை தேர்வு செய்ய, மூவர் குழு அமைக்கப் பட்டுள்ளது. தமிழ்நாடு திறந்த நிலை பல்கலைக்கழகத்தின் துணை வேந்தராக இருந்தவர், கல்யாணி. இவரது, பதவிக்காலம் கடந்த, ஏழு மாதங்களுக்கு முன்பே முடிந்தது. இந்நிலையில், புதிய துணைவேந்தரை தேர்வு செய்யும் பணிகள் நடந்து வருகின்றன. முதல்கட்டமாக, துணைவேந்தர் பதவிக்கு தகுதியான மூவரை தேர்வு செய்வதற்கான மூவர் குழுவை, கவர்னர் நியமித்துள்ளார். இக்குழுவிற்கு, கவர்னரின் பிரதிநிதியாக, போரூர் ராமச்சந்திரா பல்கலைக்கழக, இணைவேந்தரும், சென்னை பல்கலை முன்னாள் துணை வேந்தருமான தியாகராஜன், தலைவராக நியமிக்கப் பட்டுள்ளார். அரசு சார்பில், உடுமலைப்பேட்டை, ஸ்ரீ ஜி.வி.ஜி., விசாலாட்சி மகளிர் கல்லூரி முதல்வர், மஞ்சுளா; சிண்டிகேட் அமைப்பு சார்பில், காந்தி கிராம பல்கலைக்கழக, கணித துறை தலைவர், பாலசுப்ரமணியன் ஆகியோர், உறுப்பினராகவும் நியமிக்கப் பட்டுள்ளனர். இந்தகுழு, துணை வேந்தர் பதவிக்கு விண்ணப்பிப்பவர்களின் தகுதிகளை பரிசீலித்து, அதில் மூவரது பெயரை, கவர்னருக்கு பரிந்துரைக்கும். அதில் ஒருவரை, திறந்த நிலை பல்கலைக்கழக துணை வேந்தராக, கவர்னர் நியமிப்பார்.

>>>சிறப்பு ஆசிரியர்கள் 1,524 பேர் நியமனம்

ஆசிரியர் தேர்வு வாரியம் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:பள்ளி கல்வித் துறையில், உடற்கல்வி, ஓவியம், தையல் உள்ளிட்ட பிரிவுகளில், 1,524 சிறப்பு ஆசிரியர்கள்; அரசு பொறியியல் கல்லூரிகளில், 152 உதவி பேராசிரியர்கள்; அரசு, "பாலிடெக்னிக்' கல்லூரிகளில், 139 விரிவுரையாளர்கள் நியமிக்கப்பட உள்ளனர். இதற்கான, வேலைவாய்ப்பு பதிவு மூப்பு மற்றும் இன சுழற்சி அடிப்படையிலான தேர்வு பட்டியல், ஆசிரியர் தேர்வு வாரியத்தின் இணையதளத்தில் வெளியிடப்பட்டுள்ளது. இம்மாதம், 1ம் தேதி, ஐகோர்ட் பிறப்பித்த உத்தரவின்படி, முதுநிலை ஆசிரியர் பணியிடங்களும், நிரப்பப்பட உள்ளன.தேர்வு பட்டியலில் இடம் பெற்றோருக்கு, விரைவில் கடிதம் அனுப்பப்படும்.

>>>வானியல் இயற்பியலாளர் சுப்ரமணியன் சந்திரசேகரின் பிறந்தநாள்.

 இன்று - அக். 19 : இந்தியர் பெருமையை உலகம் அறியவைத்த தமிழகச் சாதனையாளர்களில் ஒருவரான வானியல் இயற்பியலாளர் சுப்ரமணியன் சந்திரசேகரின் பிறந்தநாள்.

* வானியல் இயற்பியலாளர், சுப்ரமணியன் சந்திரசேகர், பிரிக்கப்படாத அன்றைய இந்தியாவின் லாகூரில் அக்டோபர் 19, 1910-ல் பிறந்தார். அப்பா சுப்ரமணியன்! லாகூரில் ரயில்வேயில் ஆடிட்டராக இருந்தார். நன்றாக வயலின் வாசிப்பார். அம்மா சீதாலஷ்மி மெத்தப் படித்தவர். உலகப் புகழ்பெற்ற நாடக ஆசிரியர் இப்செனின் நூலைத் தமிழில் மொழிபெயர்த்தவர். 'அம்மாவின் தூண்டுதலே அறிவியல் மீதான எனது ஆர்வத்துக்குக் காரணம்’ என்பார் சந்திரசேகர்.

* இவரது மாமாதான் சர் சி.வி.ராமன். இரண்டு பெண் குழந்தைகளுக்குப் பிறகு பிறந்த ஆண் பிள்ளை என்பதால், சந்திரசேகருக்கு செல்லம் அதிகம். தன் பொம்மைகளை உடைத்துவிட்டு, சகோதரிகளின் பொம்மைகளைப் பிடுங்கிக்கொள்வார். வீட்டிலேயே ஆரம்பக் கல்வியைக் கற்றார். 11 வயதில் திருவல்லிக்கேணி, ஹிந்து உயர்நிலைப் பள்ளியில் சேர்ந்தார். படிப்பு ஆர்வத்தில், அடுத்த வருடப் பாடங்களை முன்னரே படித்துவிடுவார்.

* சென்னை மாநிலக் கல்லூரியில் இளங்கலை இயற்பியல் படித்தார். அப்போதுதான் 'குவான்டம் இயற்பியல்’ என்கிற புதிய துறையை நோக்கி இயற்பியல் பயணிக்க ஆரம்பித்து இருந்தது.அப்போது நோபல் பரிசு பெற்ற சோமர்ஃபீல்ட் (Sommerfeld) அவர்களைச் சந்தித்தது இவர் வாழ்வில் திருப்புமுனை.
* மாநிலக் கல்லூரியில் முதல் மாணவராகத் தேறினார் சந்திரசேகர். மேற்படிப்புக்கு இங்கிலாந்து செல்ல சிறப்பு ஸ்காலர்ஷிப் இவருக்காகவே ஏற்படுத்தப்பட்டு, கேம்ப்ரிட்ஜ் போனார். இந்தியாவில் இருந்து கேம்ப்ரிட்ஜ் நோக்கிக் கப்பலில் போகும்போதுதான் புகழ்பெற்ற 'சந்திரசேகர் எல்லை’ என்ற அறிக்கையை வெளியிட்டார். அப்போது அவர் வயது 20.
* நட்சத்திரங்களின் வாழ்நாளைப் பற்றி ஆய்வு செய்து, 'சூரியனின் நிறையைபோல 1.4 மடங்கு அதிக எடைகொண்ட நட்சத்திரங்கள், எரிபொருள் தீர்ந்ததும் மற்ற நட்சத்திரங்கள், வான்வெளியில் உள்ள இன்னபிறவற்றைத் தம்முள் இழுத்துக்கொள்ள முயற்சிக்கும்’ என அறிவித்தார். இதுவே 'சந்திரசேகர் எல்லை’ எனப்படுகிறது.
* இந்த ஆய்வுகளை உலகப் புகழ்பெற்ற வானியல் இயற்பியலாளர், ஆர்தர் எடிங்டன் (Arthur eddington) அடிப்படை அற்றது என ஏற்க மறுத்துவிட்டார். சந்திரசேகரின் கட்டுரையைச் சில அறிவியல் இதழ்களும் நிராகரித்தன. மனம் வருந்தினார் சந்திரசேகர். கேம்ப்ரிட்ஜ் படிப்பு முடிந்ததும் அமெரிக்கா சென்று, சிகாகோ பல்கலைக்கழகத்தில் இணைப் பேராசிரியர் ஆனார். தன் மரணம் வரையில் அங்கேயே இருந்தார்.
* தலைசிறந்த ஆசிரியர் எனப் பெயர் பெற்ற சந்திரசேகர், தன்னை மாணவர்கள் 'சார்’ என அழைக்கத் தடை விதித்தார். சந்திரா என்றே அழைக்கலாம் என அறிவித்தார். 'மாணவர்கள் அடிமைகள் இல்லை, அவர்கள் ஆசிரியர்களின் நண்பர்கள்’ என்பது அவர் கொள்கை. றீ200 மைல் தொலைவில் இருக்கும் ஒரு பல்கலைக்கழகத்தில் வெறும் இரண்டே மாணவர்களுக்குக் பாடம் நடத்தக் கொட்டுகிற பனியில் செல்வார். ''அந்த இரண்டு மாணவர்கள் எனக்கு மிகவும் முக்கியமானவர்கள்.'என்பார்.அவரின் நம்பிக்கையைக் காப்பாற்றிய அந்த மாணவர்கள் சந்திரசேகருக்கு முன்னமே 1957-ல் நோபல் பரிசு பெற்றனர். அவர்களின் பெயர் லீ மற்றும் யாங்.
* எடிங்டன் எதைத் தவறு என நிராகரித்தாரோ, அதை உலகம் 40 வருடங்கள் கழித்து ஏற்றுக்கொண்டது. அதற்கான நோபல் பரிசு 1983-ல் அறிவிக்கப்பட்டது. ஒரே ஒரு துறையில் தன் ஆர்வத்தை நிறுத்திக்கொள்ளாமல், பல்வேறு தளங்களில் ஆய்வுகள் செய்தவர். அவற்றை அற்புதமான நூல்களாகவும் வடித்தார். 1995 ஆகஸ்ட் 21-ல் மரணமடைகிற அன்றுகூடப் பாடம் நடத்திக்கொண்டு இருந்தார் சந்திரசேகர்.
* ''என்னைப்பற்றி சமகால மனிதர்கள் என்ன நினைக்கிறார்கள் என்று எனக்குக் கவலை இல்லை. வருங்கால சந்ததிகளுக்கு என் செயல்கள் நல்ல பலன்களைக் கொடுக்கும். இப்போது நான் செய்ய வேண்டியது, எனக்குள் இருக்கும் அறிவு ஒளியை, மனதை வேறு எதிலும் பறிகொடுக்காமல் காத்தலில்தான் உள்ளது'' என்றார்.

>>>தனியார் கல்லூரி நிர்வாகத்தை அரசே ஏற்கும் உத்தரவு ரத்து

"தனியார் கல்லூரி நிர்வாகத்தை அரசே ஏற்கும், கல்வித்துறையின் உத்தரவு ரத்து செய்யப்படுகிறது" என சென்னை உயர் நீதிமன்றத்தின் மதுரை கிளை உத்தரவிட்டது. மதுரை யாதவா கல்வி நிதி சங்க செயலாளர் நவநீதகிருஷ்ணன் தாக்கல் செய்த மனு: மதுரை யாதவா கல்லூரி செயலாளராக என்னை நியமித்தனர். அதற்கு, கல்லூரிக் கல்வி இணை இயக்குனர் 2009ல், ஒப்புதல் அளித்தார். இதை எதிர்த்து, கோபாலகிருஷ்ணன் மற்றும் சிலர் ஐகோர்ட்டில் மனு தாக்கல் செய்தனர். மனுக்களை உயர் நீதிமன்றம் தள்ளுபடி செய்தது. யாதவா கல்வி நிதி சங்கம் குறித்து, கண்ணன் என்பவர் பதிவுத்துறை ஐ.ஜி.,க்கு புகார் அளித்தார். ஐ.ஜி., அறிக்கை கோரினார். என்னை விசாரணைக்கு அழைத்தார். கல்லூரி நிர்வாகத்தில் பிரச்னை ஏற்படும் பட்சத்தில், அதை கல்லூரிக் கல்வி இணை இயக்குனர் நிர்வகிக்கலாம், என 1985 செப்.,2 ல் (ஜி.ஓ.,-எம்.எஸ்., 1021) கல்லூரி கல்வித்துறை இயக்குனர் உத்தரவிட்டுள்ளார். அதன்படி, மதுரை கல்லூரிக்கல்வி இணை இயக்குனர், எங்கள் கல்லூரி நிர்வாகத்தை ஏற்பதாக, பிப்.,28 ல் உத்தரவிட்டார். இது தனியார் கல்லூரி ஒழுங்குமுறைச் சட்டப்படி செல்லாது. செயலாளர் இல்லை எனில், கல்லூரி குழுதான் நிர்வகிக்க வேண்டும். கல்வித்துறையின் (1985) உத்தரவை ரத்து செய்ய உத்தரவிட வேண்டும். இவ்வாறு குறிப்பிட்டுள்ளார். நீதிபதி வினோத் கே.சர்மா முன், மனு விசாரணைக்கு வந்தது. மனுதாரர் வக்கீல் ஈ.வி.என்.சிவா ஆஜரானார். தமிழ்நாடு தனியார் கல்லூரி விதிகள்படி, ஆசிரியர்களுக்கு சம்பளம் வழங்கும் அதிகாரம் கல்லூரி செயலாளருக்கு உண்டு. இதை யாராலும் மாற்ற முடியாது. கல்வித்துறையின் (1985) மற்றும் தற்போது கல்லூரி கல்வி இணை இயக்குனரின் உத்தரவு எதேச்சதிகாரமானது. நிர்வாக விதிகளுக்கு புறம்பானது. நிர்வாகத்தில் தகராறு ஏற்படும் பட்சத்தில், மண்டல இணை இயக்குனர் நிர்வாக பொறுப்பை ஏற்கலாம். பிரச்னை முடிவுக்கு வந்தபின், பொறுப்புகளை ஒப்படைக்க வேண்டும். கல்லூரி கல்வித்துறையின் (1985) உத்தரவு ரத்து செய்யப்படுகிறது, என உத்தரவிட்டார்.

>>>மழைக்கால நோய்களில் இருந்து தப்புவது எப்படி?

வெயிலோ, மழையோ, குளிரோ, தட்பவெப்ப நிலைக்கு ஏற்ப, நமது உடல் தகவமைத்துக் கொள்ளும் இயல்புடையது. அதேபோல, அந்தந்த தட்பவெப்பத்திற்கேற்ப, வைரஸ், பாக்டீரியாக்களால் நோய்களும் அதிகமாக பரவ ஆரம்பிக்கும். தற்போது, வடகிழக்கு பருவமழை துவங்கி விட்டது. அதற்கு முன்பே, ஆங்காங்கே மழை கொட்டத் துவங்கி விட்டது. நோயின் முன்னோடியாக, "டெங்கு' காய்ச்சல் தமிழகம் முழுதும் பரவலாகி விட்டது. இதேபோல மழைக்காலத்தில், பல்வேறு நோய்களும் நம்மைத் தாக்கும். வெயில் காலத்தில் "எறும்பைப் போல' சுறுசுறுப்பாக செயல்படும் நாம், மழைக்காலத்தில் சோம்பல் நிலைக்கு சென்று விடுவோம். திடீர் மழையில் நனையும் போது சளி, காய்ச்சல் தொந்தரவு ஏற்படும். மழைக்கால நோய்கள், அதிலிருந்து நம்மை பாதுகாப்பது, நோய் வந்தால் எப்படி செயல்படுவதென,  டாக்டர்கள் ஆலோசனை வழங்க உள்ளனர்.மழைக்கால பொதுவான நோய்கள், அதற்கான ஆலோசனைகளை வழங்குகிறார், மதுரை அரசு மருத்துவக் கல்லூரி பேராசிரியர். மழைக்காலம், பனிக்காலம் என்றாலே அதிக சளி, மூச்சுதிணறல், இருமல் தொந்தரவு பரவலாக இருக்கும். நோயாளிகள் இதிலிருந்து தங்களை தற்காத்து கொள்வது அவசியம்.ஆஸ்துமா, காசநோய், நுரையீரல் நோய் உள்ளவர்கள் வெளியே செல்லும் போது, மழையில் நனையக் கூடாது. மழையில் நனைந்தால் இருமல், சளி, தலைவலி, காய்ச்சல், மூச்சு முட்டல் ஏற்படும். இருதய நோயாளிகள் மழை, அதிக குளிரில் செல்லக்கூடாது. அதிக குளிர், ரத்தத் தமனிகளை சுருங்கவைப்பதால், ஆபத்தில் முடியலாம். மாரடைப்பு மற்றும் வால்வு கோளாறு உள்ளவர்களுக்கு அடிக்கடி சளிப் பிடிக்கும் வாய்ப்பு உள்ளது. பக்கவாதம், மூளை தொடர்பான நோய்கள் இருந்தால், நோயை கூடுதலாக்கி விடும்.சர்க்கரை நோயாளிகள் மழைக் காலத்தில் உடற்பயிற்சி, நடைபயிற்சி செய்ய முடியாது. எனவே, ரத்த சர்க்கரை கூட வாய்ப்புள்ளது. அந்தநிலையில், உணவுக் கட்டுப்பாட்டை கட்டாயம் கடைப்பிடிக்க வேண்டும். அதிக குளிரில், அதிகாலையில் உடற்பயிற்சி, நடைப்பயிற்சி செய்யும் போது, மாரடைப்பு ஏற்பட வாய்ப்புள்ளது. தேங்கிய மழைநீர் மூலம் சிக்குன்குனியா, டெங்கு, பன்றி காய்ச்சல் வரலாம். பன்றி காய்ச்சல் கிருமிகள் (எச்1என்1) அதிக குளிர், மழை சீதோஷ்ணத்தில் அதிகமாக உற்பத்தியாகும். எனவே, சுற்றுப்புறத்தை தூய்மையாக வைக்க வேண்டும். பெண்கள், ஈரத்தலையுடன் இருந்தால், "சைனஸ்' தொல்லை ஏற்படும். வைரசால் கண்நோய் ஏற்படும் வாய்ப்புள்ளது.
குளிருக்கு அதிக டீ, காபி குடித்தால் ஆபத்து. பாதுகாப்பில்லாத குடிநீரால் மஞ்சள் காமாலை நோய் தாக்கலாம். கொதிக்க வைத்த வெதுவெதுப்பான நீரை குடித்தால், காலரா, வயிற்றுப் போக்கு ஏற்படுத்தும் கிருமிகளில் இருந்து நம்மை காப்பாற்றும். மழை பெய்யும் போது, சாக்கடை கழிவுநீரும் சேர்ந்துவிடும். தவிர்க்க முடியாமல் நடந்து வந்தாலும், உடனடியாக ஆடையை மாற்றி, கால்களை நன்கு கழுவ வேண்டும்.  மழையில் நனைந்த ஆடைகள் மூலம், தோல்நோய்கள் வரலாம். உடல் இயங்குவதற்கு தண்ணீர் அவசியம். குறைந்தது இரண்டு லிட்டர் தண்ணீர் குடிக்க வேண்டும்.  குளிர், மழைக் காலத்தில் உடலை வெதுவெதுப்பாக வைத்திருக்க, சிலர் அதிகமாக சிகரெட் புகைப்பர், மதுரை அருந்துவர். இவர்களுக்கு மாரடைப்பு, நுரையீரல், கல்லீரல் தொடர்பான நோய்கள் வரலாம்.  காப்பி, டீ அதிகமாக குடித்தால், வயிற்றுப் புண் ஏற்படும். சர்க்கரை நோயாளிகளின், கொழுப்புச்சத்து அதிகரிக்க காரணமாகிவிடும்.

>>>அக்டோபர் 19 [October 19]....

• அல்பேனியா - அன்னை தெரசா தினம்
• வானியல் இயற்பியலாளர் சுப்ரமணியன் சந்திரசேகரின் பிறந்தநாள்(1910)
• நியுயே - அரசியலமைப்பு தினம்(1974)
• மார்டின் லூதர், இறையியலுக்கான டாக்டர் பட்டம் பெற்றார்(1512)
• சோ ஓயு மலையின் உச்சி முதன் முறையாக எட்டப்பட்டது(1954)

>>>"லேப்டாப்' பெறுவதில் மாணவர்கள் அவதி

அரசு இலவச லேப்டாப் பெற தேவையான பிளஸ் 2 "ஒரிஜினல்' மதிப்பெண் சான்றுகளை, உயர் கல்வி நிறுவனங்கள் வழங்க மறுப்பதால், மாணவர்கள் அவதிப்படுகின்றனர். 2011-2012 கல்வியாண்டில் பிளஸ் 2 தேர்வு எழுதியவர்கள் தற்போது பொறியியல், மருத்துவம் உள்ளிட்ட கல்லூரி படிப்புகளில் சேர்ந்துள்ளனர். தற்போது அவர்களுக்கு லேப்டாப் வழங்கப்படுகிறது. பிளஸ் 2 மதிப்பெண் சான்று வழங்கியபோது பின்புறம் "லேப்டாப் பெறவில்லை' என தலைமையாசிரியர்களால் முத்திரையிட்டு வழங்கப்பட்டது. உயர் கல்வியில் சேர்ந்த போது அச்சான்றுகளை கல்வி நிறுவனங்களில் மாணவர்கள் ஒப்படைத்தனர். தற்போது இலவச லேப்டாப் பெற தலைமையாசிரியர்களால் முத்திரையிடப்பட்ட அந்த மதிப்பெண் சான்று தேவைப்படுகிறது. இவற்றை பெரும்பாலான கல்வி நிறுவனங்கள் வழங்க மறுக்கின்றன. சில நிறுவனங்களில் தாமதப்படுத்துகின்றனர். அதற்குள் "லேப்டாப்' வழங்கப்பட்டு விடுகிறது. இதனால், தகுதி இருந்தும் "லேப்டாப்' கிடைக்காமல் மாணவர்கள் அவதிப்படுகின்றனர். சி.இ.ஓ., நாகராஜமுருகன் கூறியதாவது: உயர் கல்வி நிறுவனங்களில் மதிப்பெண் சான்று பெறுவதில் சிக்கல் உள்ள மாணவர்கள், அந்த நிறுவனத்தில் இருந்து படித்ததற்கான சான்று பெற்றுவந்தால் "லேப்டாப்' வழங்க தலைமையாசிரியர்களுக்கு அறிவுறுத்தப்பட்டுள்ளது. தகுதியுள்ள அனைத்து மாணவர்களுக்கு "லேப்டாப்' கிடைக்க நடவடிக்கை எடுக்கப்படும், என்றார்.