>>>ஆர்.டி.இ.,: அவகாசம் நீட்டிப்பு

மத்திய அரசு 2009ம் கொண்டு வந்த ஆர்.டி.இ., எனப்படும் அனைவருக்கும் இலவச மற்றும் கட்டாயக் கல்வி என்ற சட்டத்தை, அமல்படுத்துவதற்கான அவகாசம், மேலும் 2 ஆண்டுகளுக்கு நீட்டிக்கப்பட்டுள்ளது.

ஆர்.டி.இ., சட்டம், நாட்டில் உள்ள 15 வயதுக்குட்பட்ட குழந்தைகள் அனைவருக்கும், இலவச கட்டாய அடிப்படை கல்வி கிடைப்பதை உறுதி செய்கிறது. இந்தியா முழுவதும் 13 லட்சம் துவக்கப் பள்ளிகள் உள்ளன. பள்ளி கட்டடங்கள், வகுப்பறைகள், நாற்காலிகள், குடிநீர், டாய்லெட், விளையாட்டு மைதானம் மற்றும் மாற்றுத் திறனாளிகளுக்கான வசதிகள் என ஒன்பது அடிப்படை வசதிகளை, நுõறு சதவீதம் அனைத்து பள்ளிகளிலும் நிறைவேற்றி இருக்க வேண்டும் எனவும்; ஆசிரியர்கள், தகுதித் தேர்வில் வெற்றி பெற்றிருக்க வேண்டும் எனவும் சட்டத்தில் குறிப்பிடப்பட்டுள்ளது.

மத்திய அரசு, இதை நிறைவேற்றுவதற்கு, நாடு முழுவதும் உள்ள பள்ளிகளுக்கு, 2013 மார்ச் 31ம் தேதி காலக்கெடு விதித்திருந்தது. இருப்பினும், இக்கெடுவுக்கள் பெரும்பாலான பள்ளிகள், அதை நிறைவேற்றவில்லை.

சமீபத்தில், நாடு முழுவதும் ஒரு தனியார் தொண்டு நிறுவனம் நடத்திய ஆய்வில், 95 சதவீத பள்ளிகள், இச்சட்டத்தில் குறிப்பிட்ட நடைமுறைகளை பின்பற்றவில்லை என தெரிவித்தது. நாட்டில் உள்ள 10 பள்ளிகளில் ஒன்றில் தான், குடிநீர் வசதி செய்யப் பட்டுள்ளதாகவும், ஐந்து பள்ளிகளில், இரண்டில் டாய்லெட் வசதியே இல்லை எனவும், ஏராளமான ஆசிரியர் பணியிடங்கள் காலியாக உள்ளதாகவும் ஆய்வு தெரிவித்தது.

இந்நிலையில் காலக்கெடு, மேலும் 2 ஆண்டுகளுக்கு நீட்டிப்பு செய்யப்பட்டுள்ளது. புதிய காலக்கெடுவாக, 2015 மார்ச் 31ம் தேதியை, மத்திய அரசு நிர்ணயித்துள்ளது.

>>>சித்தா படிப்புக்கு அனுமதியளிக்க ஐகோர்ட் உத்தரவு

"திருவிதாங்கூர் சித்த வைத்திய சங்கம் நடத்தும், சித்த மருத்துவக் கல்லூரிக்கு, சித்த மருத்துவப் பட்டப் படிப்புக்கு, மத்திய அரசு அனுமதியளிக்க வேண்டும்" என, சென்னை ஐகோர்ட் உத்தரவிட்டுள்ளது.

கன்னியாகுமரி மாவட்டம், புதுக்கடை அருகில், முஞ்சிறையில், ஏ.டி.எஸ்.வி.எஸ்., சித்த மருத்துவக் கல்லூரி உள்ளது. அகில திருவிதாங்கூர் சித்த வைத்திய சங்கம், இந்தக் கல்லூரியை நடத்துகிறது. 1905ம் ஆண்டு முதல், இந்தக் கல்லூரி செயல்படுகிறது. மருத்துவமனையும் இயங்குகிறது. 2001ம் ஆண்டு முதல், சித்த மருத்துவத்தில், பட்டப் படிப்பை (பி.எஸ்.எம்.எஸ்.,) நடத்தி வருகிறது.

இதற்கான அனுமதியை, மத்திய சுகாதாரத் துறை வழங்கி வந்தது. கடந்த ஆண்டு, மார்ச் மாதம், கல்லூரியை, இந்திய மருத்துவத்துக்கான மத்திய கவுன்சில் ஆய்வு செய்தது. "போதிய ஆசிரியர்கள் இல்லை; மருத்துவமனையில், உள்நோயாளி, புறநோயாளிகள் போதிய அளவில் இல்லை" என, சித்த மருத்துவப் பட்டப் படிப்புக்கு, அனுமதி வழங்க மறுத்து விட்டது.

ஆகஸ்ட் மாதம், மத்திய சுகாதாரத் துறை, இந்த உத்தரவை பிறப்பித்தது. இதை எதிர்த்து, சென்னை ஐகோர்ட்டில், ஏ.டி.எஸ்.வி.எஸ்., சித்த மருத்துவக் கல்லூரி சார்பில், மனுத் தாக்கல் செய்யப்பட்டது.மனுவை, நீதிபதி அரிபரந்தாமன் விசாரித்தார். மனுதாரர் சார்பில், மூத்த வழக்கறிஞர் டி.ஆர்.ராஜகோபாலன் ஆஜரானார்.

நீதிபதி அரிபரந்தாமன் பிறப்பித்த உத்தரவு: கல்லூரி மற்றும் மருத்துவமனையை, 60 ஆண்டுகளுக்கும் மேல், திருவிதாங்கூர் சித்த வைத்திய சங்கம் நடத்தி வருகிறது. இந்திய மருத்துவ மத்திய கவுன்சிலின் பரிந்துரைகளை, மத்திய சுகாதாரத் துறை ஏற்கவில்லை என்றால், புதிதாக ஆய்வு நடத்தி, அறிக்கை பெற்றிருக்கலாம்.

இந்தியாவின் தென்முனையில், கல்லூரி உள்ளது. ஒரு லாரியில் ஏற்றக்கூடிய அளவுக்கு, ஆவணங்களை எடுத்துக் கொண்டு, டில்லி வர வேண்டும், என, கூற முடியாது. மத்திய கவுன்சிலின் சான்றிதழை நம்பவில்லை என்றால், மீண்டும் ஆய்வு நடத்த உத்தரவிட்டிருக்கலாம். ஆனால், கல்லூரி தரப்பில் அனைத்து ஆவணங்களையும் எடுத்து வர தவறி விட்டது, என, மத்திய அரசு கூறியுள்ளது.

மத்திய கவுன்சிலின் வழக்கறிஞர், 25 ஆசிரியர்கள் இருந்தால் போதுமானது, என, கூறியுள்ளார்; ஆனால், கல்லூரியில், 27, ஆசிரியர்கள் உள்ளனர். இந்திய மருத்துவ முறையில், கல்வி போதிக்கப்படுகிறது. அலோபதி மருத்துவக் கல்லூரிகளை, இதனுடன் ஒப்பிடக்கூடாது.

எனவே, மத்திய சுகாதார அமைச்சகத்தின் கீழ் வரும், "ஆயுஷ்" துறையின் உத்தரவு ரத்து செய்யப்படுகிறது. 40 மாணவர்களை கொண்டு, சித்த மருத்துவத்தில் பட்டப் படிப்பு நடத்துவதற்கு, 2011-12 மற்றும் 2012-13ம் கல்வியாண்டுக்கு, உடனடியாக அனுமதி வழங்க வேண்டும். இவ்வாறு, நீதிபதி அரிபரந்தாமன் உத்தரவிட்டுள்ளார்.

>>>டி.இ.டி மறுதேர்வு முடிவை அறிய முடியாமல் ஏமாற்றம்

டி.இ.டி., மறுதேர்வு முடிவை, இணையதளத்தில் அறிய முடியாமல், தேர்வர்கள் ஏமாற்றம் அடைந்தனர். இடைநிலை ஆசிரியர் மற்றும் பட்டதாரி ஆசிரியர் பணியிடங்களுக்கான, டி.இ.டி., தேர்வு, ஜூலையில் நடந்தது. அத்தேர்வில் பங்கேற்ற, 6.67 லட்சம் பேரில், வெறும், 0.33 சதவீதம் பேர் மட்டுமே தேர்ச்சி பெற்றனர். இதனால், அக்டோபர், 14ம் தேதி, டி.இ.டி., மறுதேர்வு நடத்தப்பட்டது. இத்தேர்வு முடிவுகள், நேற்று முன்தினம் இரவு, டி.ஆர்.பி., இணையதளத்தில் (://trb.tn.nic.in/TET2012/02112012/status.asp) வெளியிடப்பட்டதாக, அறிவிக்கப்பட்டது. ஆனால் நேற்று, இத்தேர்வு முடிவை அறிய முடியாமல், லட்சக்கணக்கான தேர்வர்கள் ஏமாற்றம் அடைந்தனர். இதுகுறித்து, புதுச்சேரியைச் சேர்ந்த தேர்வர் ஒருவர் கூறுகையில், "தேர்வு முடிவு வெளியிடப்பட்ட தகவலை, நேற்று காலை, நாளிதழ் மூலம் அறிந்தேன். உடனே, என் தேர்வு முடிவை அறிய, டி.ஆர்.பி., இணையதளத்தை தொடர்பு கொண்டேன். பலமுறை முயன்றும், தேர்வு முடிவை அறிய முடியாததால், ஏமாற்றம் அடைந்தேன்" என்றார். டி.ஆர்.பி., நிர்வாகிகள் கூறுகையில், "நேற்று, ஒரே நேரத்தில், லட்சக்கணக்கானோர், வாரியத்தின் இணையதளத்தை தொடர்பு கொண்டதால், இந்த சிக்கல் ஏற்பட்டது. இந்த தொழில்நுட்ப சிக்கலை சரிசெய்யும் பணிகள் நடந்து வருகின்றன. இன்று, தேர்வர்கள், தங்கள் தேர்வு முடிவை, இணையதளத்தில் காணலாம். இவர்களுக்கான சான்றிதழ்கள் சரிபார்ப்பு பணி, வரும், 6ம் தேதி துவங்கும்" என்றனர்.

>>>ஏப்ரல் அல்லது ஜுனில் அடுத்த டி.இ.டி தேர்வு

"டி.இ.டி., மறுதேர்வு முடிவு, வெளியிடப்பட்ட நிலையில், தகுதி மதிப்பெண் குறைப்பிற்கு வாய்ப்பு கிடையாது" என, துறை வட்டாரங்கள், உறுதியாக தெரிவித்தன. அடுத்த டி.இ.டி., தேர்வு, ஏப்ரல் அல்லது ஜூனில் நடக்கும் எனவும், துறை அதிகாரிகள் தெரிவித்தனர்.

இடைநிலை ஆசிரியர் மற்றும் பட்டதாரி ஆசிரியர் பணியில் சேர வேண்டும் எனில், டி.இ.டி., எனப்படும், ஆசிரியர் தகுதி தேர்வில், குறைந்தபட்சம், 60 சதவீத மதிப்பெண்கள் பெற வேண்டும். 150 மதிப்பெண்களுக்கு நடக்கும் தேர்வில், 90 மதிப்பெண்கள் எடுத்தால், பணி நியமனத்திற்கு தகுதி பெறுகின்றனர்.

ஆனால், தேவையை விட, அதிகமானோர் தேர்ச்சி பெற்றால், மதிப்பெண் அடிப்படையில், பணி நியமனம் செய்யப்படுவர். ஜூலையில் நடந்த டி.இ.டி., தேர்வில், தேர்ச்சி பெறுவதே, குதிரைக் கொம்பாக இருந்தது. 6.67 லட்சம் பேர் எழுதியதில், வெறும், 2,448 பேர் மட்டுமே தேர்ச்சி பெற்றனர்.

இதனால், தேர்ச்சிக்குரிய மதிப்பெண்களை பெற்றாலே, வேலை உறுதி என்பதுதான், தற்போதைய நிலை. இந்நிலையில், தேர்ச்சி சதவீதம் குறைந்தால், ஆசிரியர்களை தேர்வு செய்வதில், பெரும் சிக்கல் எழும் நிலை ஏற்பட்டது.

இது தொடர்பாக, சட்டசபையில் பேசிய, பள்ளிக்கல்வி அமைச்சர் சிவபதி, "தேர்ச்சி சதவீதத்தின் நிலையைப் பொறுத்து, முதல்வர், உரிய நடவடிக்கை எடுப்பார்" என தெரிவித்தார். இதனால், தேர்ச்சி மதிப்பெண் குறைக்கப்படுமோ என்ற, எதிர்பார்ப்பு எழுந்தது. ஆனால், நேற்று வெளியான தேர்வு முடிவில், 3 சதவீதம் பேர் தேர்ச்சி பெற்றனர். "முதல் தாள் தேர்வில், தேவையை விட, 3,000 பேர் கூடுதலாகவும், இரண்டாம் தாள் தேர்வில், பற்றாக்குறை நிலை இருந்தாலும், தேர்ச்சி மதிப்பெண் குறைப்பு கிடையாது" என, டி.ஆர்.பி., வட்டாரங்கள் தெரிவித்தன.

இது குறித்து, துறை வட்டாரங்கள் மேலும் கூறியதாவது: இடைநிலை ஆசிரியர், 7,000 பேர் தேவை. ஆனால், 10 ஆயிரத்து, 397 பேர் தேர்ச்சி பெற்றுள்ளனர். பட்டதாரி ஆசிரியர், 20 ஆயிரம் பேர் தேவை. இதில், 8,849 பேர் மட்டுமே தேர்ச்சி பெற்றுள்ளனர்; இதில், பற்றாக்குறை உள்ளது.

எனினும், ஏப்ரல் அல்லது ஜூனில் நடக்கும், அடுத்த டி.இ.டி., தேர்வு மூலம், பற்றாக்குறை சரியாகிவிடும். எனவே, தகுதி மதிப்பெண்களை குறைக்கும் எண்ணம் இல்லை. இவ்வாறு, துறை வட்டாரங்கள் தெரிவித்தன.

>>>சென்னை பல்கலையில் 5 புதிய துறைகளுக்கு செனட் ஒப்புதல்

சென்னை பல்கலைக்கழகத்தில், பெண் கல்வி, சமூக சேவை உள்ளிட்ட, ஐந்து புதிய துறைகளுக்கு, செனட் கூட்டத்தில் ஒப்புதல் அளிக்கப்பட்டது.

சென்னை பல்கலையில், செனட் கூட்டம் நடந்தது. அதில் விவாதிக்கப்பட்ட முக்கிய அம்சங்கள் விவரம்: முதுகலை படிப்பில், 55 சதவீதம் மதிப்பெண் எடுத்தால் மட்டுமே, மாணவர்கள், பிஎச்.டி.,யில், சேர முடியும் என்ற விதி உள்ளது. இதை, 50 சதவீதமாக குறைக்க வேண்டும் என, செனட் உறுப்பினர்கள் தெரிவித்தனர்.

மாணவர்களின் ஆராய்ச்சி கட்டுரைக்கு, இந்திய பேராசிரியர், வெளிநாட்டு பேராசிரியர், மாணவரின் வழிகாட்டி ஆகிய மூவர் அடங்கிய குழு ஒப்புதல் அளிக்கும். இக்குழுவில், வெளிநாட்டு பேராசிரியர் இடம் பெற கூடாது என, ஒரு பிரிவினரும், இடம் பெற வேண்டும் என, மற்றொரு பிரிவினரும் நீண்ட விவாதத்தில் ஈடுபட்டனர். கடந்த, 2007ல், கொண்டாட வேண்டிய, சென்னை பல்கலை, நூற்றாண்டு நூலக விழா, தாமதமாக, 2012ல், கொண்டாடப்பட்டது குறித்து விவாதம் நடந்தது.

பல்கலையில், "நெட்வொர்க் சிஸ்டம் அண்ட் இன்பர்மேஷன் டெக்னாலஜி", "பயோ-இன்பர்மேஷன்", "மெட்ரியல் சைன்ஸ்", "சமூக சேவை", "பெண் கல்வி" ஆகிய, ஐந்து புதிய துறைகளை துவக்க, ஒப்புதல் வழங்கப்பட்டது. சென்னை பல்கலை, தொலைதூர கல்வி மூலம் கல்வி கற்க, வெளிநாடு மற்றும் இந்தியாவின் பல பகுதிகளில், கல்வி மையங்கள் உள்ளன. இவற்றில், துபாயில், "கேமஸ் எஜூகேஷனல் இன்ஸ்டிடியூட்" என்ற மையத்தில், 2008ல், கோடிக்கணக்கில் மோசடி நடந்துள்ளது. இதன் மேல் எடுக்கப்பட்ட நடவடிக்கை குறித்தும் விவாதம் நடந்தது.

எம்.எல்.ஏ.,க்கள் ஆப்சென்ட்: பல்கலை துறை தலைவர்கள், கல்லூரி முதல்வர்கள், பேராசிரியர்கள், எம்.எல்.ஏ.,க்கள் உள்ளிட்ட, 108 பேர், செனட் குழு உறுப்பினர்களாக உள்ளனர். இவர்களில், அ.தி.மு.க., எம்.எல்.ஏ.,க்கள் வெற்றிவேல், கலைராஜன், ராஜலட்சுமி, தி.மு.க., எம்.எல்.ஏ., ராஜா, தே.மு.தி.க., எம்.எல்.ஏ., அனகை முருகேசன், மா.கம்யூ., எம்.எல்.ஏ., சவுந்திரராஜன் ஆகிய ஆறு எம்.எல்.ஏ.,க்கள், பங்கேற்கவில்லை. மொத்தம், 108 பேரில், 66 பேர் மட்டுமே, செனட் கூட்டத்தில் பங்கேற்றனர்.

>>>காற்றில் பறக்கும் கட்டாயக்கல்வி சட்டம்: மாணவ, மாணவியர் அவதி

கட்டாயக் கல்விச் சட்டத்தில் அனைத்து பள்ளிகளிலும், சுகாதாரமான கழிப்பிட வசதி ஏற்படுத்துவது அவசியம் என, வலியுறுத்தப்பட்டிருந்தாலும், இன்னும் பெரும்பாலான அரசு பள்ளிகளில் மாணவ, மாணவியருக்கு முழுமையான கழிப்பிட வசதி செய்து தரப்படவில்லை.

பல்வேறு நிதிவசதி இருந்தும், பள்ளி தலைமை ஆசிரியர்கள் இதற்கான நடவடிக்கை எடுக்காமல் அலட்சியம் காட்டுவது, பெற்றோரை அதிர்ச்சியடைய செய்துள்ளது.

தமிழகத்தில், 5,000க்கும் மேற்பட்ட அரசு உயர்நிலை மற்றும் மேல்நிலைப் பள்ளிகளும், 34 ஆயிரத்துக்கும் மேற்பட்ட நடுநிலை மற்றும் துவக்கப் பள்ளிகளும் உள்ளன. இந்நிலையில், 2010 ஆகஸ்ட் மாதத்தில் தமிழகத்தில் கட்டாயக் கல்விச் சட்டம் அமல்படுத்தப்பட்டது.

இச்சட்டத்தில் ஒன்று முதல் எட்டாம் வகுப்பு வரையிலான அனைத்து குழந்தைகளுக்கும் கட்டாயமாக கல்வி வழங்கப்பட வேண்டும் என்பதோடு மட்டுமின்றி, அனைத்து குழந்தைகளுக்கும் சுகாதாரமான கழிப்பிட வசதி, குடிநீர் வசதி, வகுப்பறை வசதிகளையும் கட்டாயமாக உருவாக்கத் தர வேண்டும் என, உத்தரவிடப்பட்டுள்ளது.

கழிப்பிட விசயத்தில் உச்சநீதிமன்றமும் தலையிட்டு, மிக விரைவில் அனைத்து பள்ளிகளிலும் கழிப்பிடம் கட்டப்பட வேண்டும் என, வலியுறுத்தியுள்ளது. ஆனால், தமிழகத்தில் ஒரு சில ஆண்டுகளுக்கு முன்பிருந்தே, கழிப்பிட வசதியை ஏற்படுத்த தலைமை ஆசிரியர்கள் முன்வந்துள்ளனர்.

அனைவருக்கும் கல்வி இயக்ககம், அனைவருக்கும் இடைநிலைக்கல்வி இயக்ககம் ஆகியவற்றிலிருந்து கழிப்பிடம் கட்டுவதற்கான நிதியும் அரசுப்பள்ளிகளுக்கு ஒதுக்கீடு செய்யப்பட்டு வருகிறது. இதனால், 80 சதவிகித அரசு பள்ளிகளில் கழிப்பிட வசதி ஏற்படுத்தப்பட்டுள்ளது.

ஆனால், பெரும்பாலான பள்ளிகள் அதற்கு போதிய தண்ணீர் வசதி ஏற்படுத்தித்தராமல், உபயோகத்துக்கு பயன்படுத்த முடியாத நிலையில் வைத்துள்ளன. கட்டாயக்கல்விச்சட்டம் எந்த அளவுக்கு அமல்படுத்தப்பட்டுள்ளது என்பது குறித்த மனித உரிமைகள் குழு, மாவட்டந்தோறும் ஆய்வு நடத்தி வருகிறது. இதில் சேலம் மாவட்டம் தலைவாசல், ஆத்தூர் பகுதிகளில் உள்ள பள்ளிகளில் ஆய்வு நடத்தியது.

இங்கு பெரும்பாலான பள்ளிகளில் கழிப்பிட வசதி இல்லாமலும், கழிப்பிடம் இருந்தும் அதை உபயோகப்படுத்த முடியாத நிலையில் பராமரிப்பில் அலட்சியம் காட்டி வருவதையும் கண்டுபிடித்துள்ளது. கட்டாயக்கல்விச்சட்ட ஷரத்துகள் அமல்படுத்துவதில் பள்ளிகளில் அலட்சிய நிலையையும் சுட்டிக்காட்டி, மாவட்டக்கல்வி நிர்வாகத்தையும் கடுமையாக சாடியுள்ளது.

இதுகுறித்து கல்வித்துறை அலுவலர்கள் கூறியதாவது: அனைத்து பள்ளிகளுக்கும் குடிநீர் வசதிக்கு, தமிழ்நாடு வடிகால் வாரியத்தின் மூலம் இணைப்பு வழங்க அரசாணை உள்ளது. ஆனால், அவற்றை கழிப்பிடத்துக்கு பயன்படுத்த முடியாது. பெரும்பாலான பள்ளிகளில் கழிப்பிட வசதி இருந்தும், தண்ணீர் வசதி ஏற்படுத்தவில்லை. இதற்கு எஸ்.எஸ்.ஏ., ஆர்.எம்.எஸ்.ஏ., ஆகிய திட்டங்களில் நிதி இருந்தும், அவற்றை கொண்டு, செய்து தரத் தலைமை ஆசிரியர்கள் முன்வருவதில்லை.

இவற்றை மாவட்ட கல்வி அலுவலர்களும் கண்காணிப்பதில்லை. இதனால் தண்ணீர் இருந்தும், கழிப்பிடம் இருந்தும் பயன்படுத்த முடியாத நிலை பல பள்ளிகளில் உள்ளது. கழிப்பிடம் இல்லாமல் மாணவ, மாணவியர் படும் அவஸ்தையை நினைத்து பார்த்தாவது, பள்ளி தலைமை ஆசிரியர்களோ, பெற்றோர் ஆசிரியர் கழக நிர்வாகிளோ அவற்றை சீராக்க முன்வரவேண்டும். அரசு பள்ளிகளில் மாணவர் எண்ணிக்கை சரிய, இந்த அலட்சிய போக்கும் முக்கிய காரணம். இவ்வாறு அவர்கள் கூறினர்.

>>> கல்வி உரிமை சட்டம் 2013ல் முழுமையாக அமலாகும்: பல்லம் ராஜு

கல்வி உரிமை சட்டம், 2013ம் ஆண்டில் , முழுவதும் அமலாகும் என மத்திய மனித வள மேம்பாட்டுத்துறை அமைச்சர் எம்.எம்.பல்லம் ராஜூ கூறினார். ஆந்திர மாநிலம் கிழக்கு கோதாவரி மாவட்டம் வந்திருந்த எம்.எம்.பல்லம் ராஜூ, செய்தியாளர்களிடம் கூறியதாவது: மத்தியில் ஆளும் ஐக்கிய முற்போக்கு கூட்டணி அரசு கடந்த 2010ம் ஆண்டு கல்வி உரிமை சட்டத்தினை கொண்டு வந்தது. மேலும் கல்வித்துறை , தகவல் தொழிலநுட்ப கொள்கையை மேம்படுத்துவற்கான திட்டவரைவினை தயார் செய்யப்பட்டது. அதனடிப்படையில் 2013-ம் ஆண்டிற்குள் கல்வி உரிமை சட்டம் முழுவதும் அமல்படுத்த நடவடிக்கை எடுக்கப்படும் என்றார்.