மாநில நல்லாசிரியர் விருதுக்கு(Dr.Radhakrishnan Award ) 385 ஆசிரியர்கள் தேர்வு - விருது பெறுவோர் பட்டியல் இன்று வெளியாகும்...
மாநில நல்லாசிரியர் விருதுக்கு 385 ஆசிரியர்கள் தேர்வு - விருது பெறுவோர் பட்டியல் இன்று வெளியாகும்...
தமிழகத்தில் நிகழ் கல்வியாண்டில் ( 2021-2022 ) மாநில நல்லாசிரியர் விருதுக்கு தேர்வு பெற்றுள்ள 385 ஆசிரியர்களின் பட்டியல் மாவட்டங்களுக்கு அனுப்பி வைக்கப்பட்டுள்ளது. குடியரசு முன்னாள் தலைவர் டாக்டர் ராதாகிருஷ்ணன் பிறந்த நாளான செப் .5 - ஆம் தேதி பள்ளிக் கல்வித் துறையின் சார்பில் ஆசிரியர் தினவிழாவாக கொண்டாடப்பட்டு அந்த விழாவில் தொடக்க , நடுநிலை , உயர்நிலை , மேல்நிலைப் பள்ளிகளில் சிறப்பாகப் பணியாற்றும் ஆசிரியர்களைத் தேர்வு செய்து அவர்களுக்கு மாநில நல்லாசிரியர் விருதான ' டாக்டர் ராதாகிருஷ்ணன் நல்லாசிரியர் விருது வழங்கப்பட்டு வருகிறது. இந்த விருதுடன் ரூ.10 ஆயிரம் , வெள்ளிப் பதக்கம் ஆகியவை வழங்கப்படும்.
அந்த வகையில் நிகழ் கல்வியாண்டுக்கான சிறந்த ஆசிரியர்களைத் தேர்வு செய்ய மாவட்ட , மாநில அளவிலான குழுக்களை பள்ளிக் கல்வித்துறை நியமித்தது.
இதையடுத்து தொடக்க , நடுநிலைப் பள்ளிகளில் 171 ஆசிரியர்கள் ; உயர்நிலை , மேல்நிலைப் பள்ளிகளில் 171 ஆசிரியர்கள் ; மெட்ரிக் பள்ளி ஆசிரியர்கள் 37 பேர் , ஆங்கிலோ இந்தியப் பள்ளி ஆசிரியர்கள் 2 பேர் ; சமூகப்பாதுகாப்புத் துறை பள்ளி ஆசிரியர்கள் 2 பேர் ; மாற்றுத் திறனாளி ஆசிரியர்கள் இருவர் என மொத்தம் 385 ஆசிரியர்கள் டாக்டர் ராதாகிருஷ்ணன் நல்லாசிரியர் விருதுக்கு தேர்வு பெற்றுள்ளனர். இந்தப் பட்டியல் அனைத்து மாவட்ட முதன்மைக் கல்வி அலுவலர்களுக்கும் அனுப்பி வைக்கப்பட்டுள்ளது.
முதல்வர் வழங்குகிறார் :
இவற்றில் 5 ஆசிரியர்களுக்கு மட்டும் சென்னையில் வெள்ளிக்கிழமை நடைபெறவுள்ள விழாவில் முதல்வர் மு.க.ஸ்டாலின் விருதுகளை வழங்கவுள்ளார். எஞ்சிய ஆசிரியர்களுக்கு அந்தந்த மாவட்ட ஆட்சியர்கள் , மக்களவை , சட்டப்பேரவை உறுப்பினர்களால் ஓரிரு நாள்களில் விருதுகள் வழங்கப்படவுள்ளன . இது குறித்து கல்வித்துறை அதிகாரிகள் கூறியது : இதுவரை இல்லாத அளவுக்கு நிகழாண்டு இளைய தலைமுறை ஆசிரியர்கள் அதிகளவில் விருதுக்கு தேர்வு பெற்றுள்ளனர். புதுமையான கற்பித்தல் , கல்விக்கான செயலிகள் வடிவமைத்தல் , பள்ளிகளில் சுற்றுச் சூழலை மேம்படுத்துதல் , மாணவர் சேர்க்கையை உயர்த்துதல் போன்றவற்றில் சிறப்பாக செயல்பட்ட ஆசிரியர்கள் விருதுக்கு தேர்வு பெற்றுள்ளனர் என அவர்கள் தெரிவித்தனர்.
