>>>ஸ்காட்லாந்து - அருமையான சூழலில் வெளிநாட்டு படிப்பு

கடந்த பல ஆண்டுகளாகவே, உயர்கல்விக்கு வெளிநாட்டு மாணவர்களை ஈர்ப்பதில், ஸ்காட்லாந்து புகழ்பெற்று விளங்குகிறது. ஸ்காட்லாந்தின் எந்த பல்கலையில் படித்தாலும், சிறந்த அனுபவத்தை ஒரு மாணவரால் பெற முடியும்.

தனித்துவமான கலாச்சாரம், நல்ல இயற்கையமைப்பு மற்றும் சிறந்த பல்கலைக்கழகங்கள் உள்ளிட்ட பல அம்சங்கள், ஸ்காட்லாந்தை நோக்கி வெளிநாட்டு மாணவர்களை ஈர்க்கின்றன.

ஸ்காட்லாந்து சரியான இடமா?

உங்களின் வெளிநாட்டு கல்விக்கு ஸ்காட்லாந்து சரியான இடமா என்ற கேள்வி உங்களிடம் இருந்தால், அதற்கு பதில் ஆம் என்பதுதான். ஸ்காட்லாந்து பல்கலைக்கழகங்களிடமிருந்து கிடைக்கும் கல்வியால் உங்களுக்கு கிடைக்கும் நன்மை ஒருபுறமிருக்க, அந்நாட்டின் வலுவான பொருளாதாரமானது, உங்களுக்கு சிறந்த தொழில்துறை அறிவைக் கொடுக்கிறது.

நிதி, பாரம்பரிய மற்றும் புதுப்பிக்கத்தக்க ஆற்றல்கள், லைப் சயின்சஸ், மருத்துவ தொழில்நுட்பம், சுற்றுலா, படைப்பாக்க தொழில்துறை, எண்ணெய் மற்றும் எரிவாயு போன்றவை அந்நாட்டிலுள்ள முக்கியமான தொழில்துறைகள். ஸ்காட்லாந்தில், மாணவர்கள், cross - faculty படிப்பை மேற்கொள்ள ஊக்குவிக்கப்படுகிறார்கள். ஸ்காட்லாந்திலுள்ள ஒவ்வொரு பல்கலையும், ஆராய்ச்சி நடவடிக்கைகளுக்கு முக்கியத்துவம் கொடுப்பதால், இங்கே படிப்பவர்கள் பெறும் அனுபவம், அவர்களின் நீண்ட நல்வாழ்விற்கு துணைபுரிகிறது.

உயர்கல்வி அமைப்பு

ஸ்காட்லாந்தின் உயர்கல்வி அமைப்பானது, பிற ஐரோப்பிய நாடுகளின் நடைமுறைகளிலிருந்து மாறுபட்டுள்ளது. இந்நாட்டிலிருக்கும் மொத்தம் 21 உயர்கல்வி நிறுவனங்கள், சுய நிர்வாக உரிமையும், சுதந்திரமும், கற்பித்தல் மற்றும் ஆராய்ச்சிப் பணிகளில் மும்முரமாக ஈடுபடும் தன்மையும் கொண்டவை. டிகிரி மற்றும் இதர பட்டப்படிப்புகள், முற்றிலும் கல்வி நிறுவனம் சம்பந்தப்பட்டதே தவிர, ஸ்காட்லாந்து அரசாங்கம் சம்பந்தப்பட்டதல்ல.

பட்டம் வழங்குவதற்கு, ஸ்காட்லாந்து அதிகார அமைப்பினால் அங்கீகாரமளிக்கப்பட்ட பல்கலைகளின் விபரங்கள் www.dius.gov.uk என்ற இணையதளத்தில் கிடைக்கும். இளநிலை மற்றும் முதுநிலைப் படிப்புகள் அனைத்தும் போலோக்னோ அமைப்பினால் நிர்வகிக்கப்படுகின்றன. அந்நாட்டில், இளநிலை மற்றும் முதுநிலை அளவில் வழங்கப்படும் தகுதி நிலைகள், அந்நாட்டு உயர்கல்வி தகுதிகளுக்கான விதிமுறைகளின் கீழ் விவரிக்கப்பட்டுள்ளன.

சேர்க்கை விதிகள்

பொதுவாக, மாணவர் சேர்க்கை விதிமுறைகளை சம்பந்தப்பட்ட கல்வி நிறுவனங்களே நிர்ணயித்துக் கொள்கின்றன. ஒரு மாணவர், தான் ஒரு பாடத்தை தேர்ந்தெடுக்க பொருத்தமானவர்தானா? என்பதை தெரிந்துகொள்ள, பாட உள்ளடக்கத்தை கவனமாக படிக்க வேண்டும்.

சேர்க்கை நடைமுறைகளின்போது பின்பற்றப்பட வேண்டிய சில வழிமுறைகள் கீழே கொடுக்கப்பட்டுள்ளன,

* www.ucas.com என்ற இணையதளமானது, பலவிதமான பாடங்களைப் பற்றியும், அவற்றை வழங்கும் கல்வி நிறுவனங்கள் பற்றியும் விபரங்களை வழங்குகிறது.

* www.ucas.com இணையதளத்தில், ஆன்லைன் அப்ளிகேஷன் அமைப்பின் மூலம் விண்ணப்பிக்கலாம்.

* www.ucas.com மூலம் அப்ளிகேஷன் செயல்பாட்டை தெரிந்துகொள்ளலாம். உங்களின் விண்ணப்பம் ஏற்கப்பட்டதா அல்லது நிராகரிக்கப்பட்டதா என்ற விபரங்களையும் இத்தளத்தில் அறிந்து கொள்ளலாம்.

* உங்களின் விண்ணப்பம் ஏற்கப்பட்டுவிட்டால், சம்பந்தப்பட்ட பல்கலை, உங்களுக்கான முறையான வழங்கல் கடிதத்தை அனுப்பும்.

கல்வி செலவினம்

பட்டப்படிப்பு அளவில், ஒரு வெளிநாட்டு மாணவருக்கான கல்விச் செலவு, வருடத்திற்கு 9000 பவுண்டுகள் முதல் 20000 ஆகிறது.

அதேசமயம், கல்விக் கட்டணமானது, படிப்புக்கு படிப்பு, பல்கலைக்கு பல்கலை வேறுபடும். மருத்துவம், பொறியியல் மற்றும் மேலாண்மை படிப்புகளுக்கு, பிற படிப்புகளை விட அதிக செலவாகும். மாணவர் விசா பெர்மிட் பெறுவதற்கு முன்பாக, உங்களின் நிதி ஆதார நிலையை நிரூபிக்க வேண்டும்.

உதவித்தொகை

Saltire என்பது, மாணவர்களுக்கான மிக முக்கியமான உதவித்தொகையாகும். முதுநிலைப் படிப்பில் 1 வருட கல்விக் கட்டணத்தை சமாளிப்பதற்கான 2000 பவுண்டுகள் உதவித்தொகை இதன்மூலம் கிடைக்கிறது. இந்தவகை உதவித்தொகைகளைப் பெறுவதற்கு, மாணவர்களிடையே கடும் போட்டி நிலவுகிறது. இந்த உதவித்தொகை, இந்தியா, சீனா, அமெரிக்கா மற்றும் கனடாவைச் சேர்ந்த மணாவர்களுக்கு வழங்கப்படுகிறது.

Commonwealth scholarship, Fellowship plan and British Chevening scholarships(available only at post-graduate level) போன்றவை இதர சில முக்கிய உதவித்தொகைகளாகும். மேலும், ஒவ்வொரு பல்கலையும், தங்களிடம் சில குறிப்பிட்ட படிப்புகளில் சேரும் மாணவர்களுக்கு உதவித்தொகைகளை வழங்குகின்றன. இவைப் பற்றிய விபரம் அந்தந்த பல்கலை இணையதளங்களில் உள்ளது.

படிப்பின்போதான பணி

டிகிரி நிலையிலான படிப்பை(பவுண்டேஷன் அல்லது ஹையர்) மேற்கொள்கையில், வாரம் 20 மணிநேரங்கள் வரை பணிசெய்து, உங்களின் சில பொருளாதார தேவைகளை நிறைவுசெய்து கொள்ளலாம். அதேசமயம், படிப்பை முடித்தப்பிறகு, அந்நாட்டில் சிறந்த பணி வாய்ப்புகள் கிடைக்கும் என்பதற்கு உத்தரவாதம் கிடையாது.

ஆனால், ஸ்காட்லாந்து பல்கலையிலிருந்து பெற்ற பட்டமானது, உலகளவில் நல்ல மதிப்பை கொண்டிருப்பதால், உங்களுக்கான வேலை வாய்ப்பை பற்றி கவலை வேண்டியதில்லை.

>>>யு.ஜி.சி. விதிமுறை: திணறும் நிகர்நிலை பல்கலைக்கழகங்கள்

நாட்டில் உள்ள நிகர்நிலை பல்கலைக்கழகங்கள், பல்கலை மானியக் குழு பரிந்துரைத்த 2010ம் ஆண்டுக்கான விதிகளை பின்பற்ற முடியாமல் திணறி வருகின்றன. கடந்த ஆகஸ்ட் மாதம், யுஜிசி-யிடம் இருந்து நிகர்நிலைப் பல்கலைக்கழகங்களுக்கு ஒரு சுற்றறிக்கை அனுப்பப்பட்டது. அதில், 2010ம் ஆண்டு பிறப்பிக்கப்பட்ட விதிமுறைகளை அமல்படுத்தியது தொடர்பான விவரங்களை சமர்ப்பிக்கும்படி வலியுறுத்தப்பட்டுள்ளது. மேலும், பலமுறை இதுதொடர்பாக வலியுறுத்தப்பட்ட போதிலும் சில கல்வி நிறுவனங்கள் விதிமுறைகளை பின்பற்றுவதில் சுணக்கம் காட்டுவதாகவும் அதில் குறிப்பிடப்பட்டிருந்தது.

இந்த நிலையில், நாக் (NAAC) சார்பில் அனுப்பப்பட்ட சுற்றறிக்கையில், யுஜிசி பிறப்பித்த 2010ம் ஆண்டுக்கான விதிமுறைகளை பின்பற்றத் தவறும் கல்வி நிறுவனங்கள் மீது கடும் நடவடிக்கை எடுக்கப்படும் என எச்சரிக்கப்பட்டது. தேவை ஏற்பட்டால் சம்பந்தப்பட்ட கல்வி நிறுவனத்தின் அங்கீகாரத்தை ரத்து செய்யவும் தயங்க மாட்டோம் என அதில் எச்சரிக்கப்பட்டுள்ளது.

தமிழகத்தில் மொத்தமுள்ள 29 நிகர்நிலை பல்கலைக்கழகங்களில், யு.ஜி.சி.யால் பிறப்பிக்கப்பட்ட விதிமுறைகளை, 16 பல்கலைக்கழகங்கள் பின்பற்றவில்லை என்று கூறப்படுகிறது.

ஆனால், யு.ஜி.சி. பிறப்பித்த விதிமுறைகள் தொடர்பான வழக்கு உச்ச நீதிமன்றத்தில் நடைபெற்று வரும் நிலையில், இதுபோன்ற உத்தரவுகளை யு.ஜி.சி. மற்றும் நாக் பிறப்பிப்பது, நீதிமன்ற அவமதிப்புக்கு வழிவகுத்து விடும் என நிகர் நிலைப் பல்கலைக்கழக தலைவர் ஒருவர் கருத்து தெரிவித்துள்ளார். இந்த விவகாரம் பற்றி ஏற்கனவே குரல் கொடுத்த மத்திய மனிதவள மேம்பாட்டு அமைச்சகம், உச்ச நீதிமன்றத்தில் டான்டன் கமிட்டி விவகாரம் முடிவுக்கு வந்த பின்னரே, யுஜிசி விதிமுறைகள் தொடர்பாக இறுதி முடிவு எடுக்கப்படும் என தெரிவித்திருந்ததையும் அவர் குறிப்பிட்டார்.

நிகர்நிலைப் பல்கலைக்கழகங்களுக்கு ஆதரவளிக்கும் நிறுவனங்களைச் சேர்ந்த யாரும், அந்தப் பல்கலைக்கழகத்தின் துணைவேந்தர் பதவியை வகிக்கக் கூடாது என்று 2010ம் ஆண்டு யுஜிசி வெளியிட்ட விதிமுறையில் சுட்டிக்காட்டப்பட்டுள்ளது. நாட்டில் உள்ள பெரும்பாலான நிகர்நிலைப் பல்கலைக்கழகங்கள் ஒரு குறிப்பிட்ட குடும்பத்தால் மட்டுமே நிர்வகிக்கப்பட்டு வரும் நிலையில் இந்த உத்தரவு பல்வேறு சர்ச்சைகளை ஏற்படுத்தியது.

>>>மாணவியை தோல்வி அடைய செய்த விரிவுரையாளருக்கு கண்டனம்

செமஸ்டர் தேர்வில் தோல்வி அடைந்த மாணவிக்கு, தங்கப் பதக்கம் வழங்கியது முறையல்ல என, மாணவர் தொடர்ந்த வழக்கில், மாணவிக்கு சாதகமாகத் தீர்ப்பு வழங்கிய மும்பை ஐகோர்ட், மாணவியை, வேண்டுமென்றே தேர்வில் தோல்வி அடையச் செய்த, கல்லூரி விரிவுரையாளருக்கு கண்டனம் தெரிவித்தது.

மகாராஷ்டிர மாநிலம், நாக்பூரில் உள்ளது, நாக்பூர் பல்கலைக்கழகம். இரண்டு ஆண்டுகளுக்கு முன், இந்தப் பல்கலையில், ஜூஹி பாண்ட்கே என்ற மாணவி, எல்.எல். எம்., (சட்டப்படிப்பு) படித்தார். இவருக்கும், விரிவுரையாளர் நார்னவாரே என்பவருக்கும், கருத்து வேறுபாடு இருந்தது. இதனால், "போதுமான நாட்கள் வருகை இல்லை" எனக் கூறி, மாணவி ஜூஹியை, ஒரு செமஸ்டர் தேர்வை எழுத விடாமல் செய்தார், நார்னவாரே.

இதனால், ஜூஹி, அந்த செமஸ்டரில் தோல்வி அடைந்தார். இதை எதிர்த்து, பல்கலைக்கழக நிர்வாகத்தில், மாணவி முறையீடு செய்தார். சற்று கால தாமதமாக நடந்த விசாரணையில், விரிவுரையாளர் வேண்டுமென்றே, மாணவியை தேர்வு எழுத விடாமல் செய்தது தெரிய வந்தது. இதையடுத்து, மீண்டும் தேர்வு எழுதிய ஜூஹி, அதிக மதிப்பெண் பெற்று வெற்றி பெற்றார். அவரின் மொத்த மதிப்பெண், 1,129 ஆக இருந்தது.

இதற்கு முன்னதாக, அதிக மதிப்பெண் பெற்றவர் என்ற வகையில், தங்கப் பதக்கம் மற்றும் "அதிக மதிப்பெண் மாணவர் பட்டியலில்" முதலிடத்தைப் பெற்றார், மாணவர் முஷாஹித் அலி. அவர், 1,027 மதிப்பெண் பெற்றிருந்தார். ஜூஹியை விட, 102 மதிப்பெண் குறைவாகவே அவர் பெற்றிருந்த போதிலும், முதல் மாணவராக அறிவிக்கப்பட்டார்.

மறு தேர்வு எழுதி, ஜூஹி வெற்றி பெற்றதும், அவர் தான், "பல்கலையில் அதிக மதிப்பெண் பெற்றவர்' என, அறிவிக்கப்பட்டார்; தங்கப் பதக்கங்களும் பெற்றார். இதனால், அதிருப்தி அடைந்த மாணவர் முஷாஹித் அலி, மும்பை உயர் நீதிமன்றத்தில், தன்னையே முதல் மாணவராக அறிவிக்க வேண்டும் எனக்கோரி, வழக்குத் தொடர்ந்தார்.

இந்த வழக்கு, நீதிபதிகள், பூஷன் கவாய் மற்றும் சுனில் தேஷ்முக் ஆகியோரைக் கொண்ட, அமர்வு முன், விசாரணைக்கு வந்தது. மாணவரின் கோரிக்கையை, தள்ளுபடி செய்த நீதிபதிகள், "ஜூஹியே முதல் மாணவி என்பதற்கான தகுதிகளைக் கொண்டவர்; அதிக மதிப்பெண் பெற்றதற்காகவே, அவருக்கு தங்கப் பதக்கம் வழங்கப்பட்டுள்ளது" என்பதை உறுதி செய்தனர்.

மேலும், மாணவியை வேண்டுமென்றே தேர்வு எழுத விடாமல் செய்த, விரிவுரையாளர் நார்னவாரேக்கு, கடும் கண்டனம் தெரிவித்த நீதிபதிகள், அவர் மீது நடவடிக்கை எடுக்கவும், பல்கலை நிர்வாகத்திற்கு உத்தரவிட்டனர்.

>>>குரூப்- 4 தேர்வு முடிவை வெளியிட நீங்கியது தடை

குரூப்- 4 தேர்வு முடிவை வெளியிட விதிக்கப்பட்டிருந்த தடையை, சென்னை உயர் நீதிமன்றம் நீக்கியது. இதையடுத்து, இன்னும் ஓரிரு நாட்களில் குரூப் - 4 தேர்வுக்கான முடிவுகளை டி.என்.பி.எஸ்.சி. வெளியிடும் எனத் தெரிகிறது.

டி.என்.பி.எஸ்.சி., குரூப்- 4 தேர்வு, ஜூலை 7ம் தேதி நடந்தது. 10 ஆயிரத்து 718 பணியிடங்களுக்கு நடந்த தேர்வில், தமிழகம் முழுவதும் இருந்து 10 லட்சத்திற்கும் அதிகமானோர் தேர்வு எழுதினர். தர்மபுரி மாவட்டத்தில், தேர்வு எழுதிய சிலருக்கு, 200 கேள்விகளுக்குப் பதில், 150 கேள்விகள் மட்டுமே, கேள்வித் தாளில் இடம் பெற்றிருந்தன.

இதையடுத்து, உயர் நீதிமன்றத்தில், சிலர் மனுக்கள் தாக்கல் செய்தனர். மனுக்களை விசாரித்த நீதிமன்றம், "மறுஉத்தரவு வரும் வரை, தேர்வு முடிவை வெளியிடக் கூடாது" என உத்தரவிட்டது. விடைத்தாளை திருத்திக் கொள்ள, அனுமதித்தது. ஆகஸ்ட் 17ம் தேதி, இந்த இடைக்கால உத்தரவு பிறப்பிக்கப்பட்டது.

இவ்வழக்கு, நீதிபதி நாகமுத்து முன், நேற்று விசாரணைக்கு வந்தது. டி.என்.பி.எஸ்.சி. தரப்பில் ஆஜரான வழக்கறிஞர் நிறைமதி, "குறைபாடு உடைய, கேள்வித்தாளை வழங்கியதால், பாதிக்கப்பட்ட, 13 பேருக்கு, புதிதாக தேர்வு நடத்தப்பட்டது. அதில், மனுதாரர்களுக்கும், சந்தர்ப்பம் வழங்கப்பட்டது" என்றார்.

மனுதாரர் தரப்பில் வழக்கறிஞர் கே.பாலு, "தேர்வு நடத்தப்பட்டு விட்டதால், எங்களுக்கு மேற்கொண்டு எந்தப் பிரச்னையும் இல்லை" என்றார். இதையடுத்து, "குரூப் - 4 தேர்வு முடிவை வெளியிடக் கூடாது" என, ஆகஸ்ட் மாதம் பிறப்பித்திருந்த உத்தரவை நீக்கி, நீதிபதி நாகமுத்து உத்தரவிட்டார்.

>>>சான்றிதழ் சரிபார்ப்பு முடிந்தும் பணி கிடைக்காதவர்கள் குமுறல்

சிறப்பு ஆசிரியர் பணிக்கு, 10 மாதங்களுக்கு முன், சான்றிதழ் சரிபார்ப்பு பணி முடிந்த நிலையில், இதுவரை நியமனம் வழங்கப்படவில்லை.

அரசுப் பள்ளிகளில், 1,020 பட்டதாரி விளையாட்டு ஆசிரியர்கள் உட்பட, 1,500 சிறப்பு ஆசிரியர்களை நியமிக்க, 2011 டிசம்பரில், சான்றிதழ் சரிபார்ப்பு பணி நடந்தது. இப்பணி முடிந்து, 10 மாதங்களாகியும், பணி வழங்கப்படவில்லை.

ஆனால், கடந்த ஆண்டு சான்றிதழ் சரிபார்ப்பு பணி நடந்த, முதுகலை பட்டதாரிகளுக்கு, ஆசிரியர் பணி வழங்கப்பட்டுள்ளது. அதே போன்று, சிறப்பு ஆசிரியர் பணியிடங்களை நிரப்ப வேண்டும் என கோரிக்கை எழுந்துள்ளது.

ஆசிரியர் தேர்வு வாரிய அதிகாரி ஒருவர் கூறுகையில், "சான்றிதழ் சரிபார்க்கப்பட்ட பணியிடங்களுக்கு ஏற்படும் கூடுதல் செலவினங்கள் குறித்த விவரத்தை அரசு சேகரிக்கிறது. இந்த ஆண்டு இறுதிக்குள் சிறப்பு ஆசிரியர்கள் நியமிக்கப்படுவர்"  என்றார்.

>>>நவம்பர் இறுதியில் பிளஸ் 2 தனித்தேர்வு முடிவுகள்

பிளஸ் 2 தனித் தேர்வு நேற்று துவங்கியது. ஏற்கனவே நடந்த தேர்வுகளில், தோல்வி அடைந்த மாணவ, மாணவியர் மற்றும் ஜூன், ஜூலையில் நடந்த உடனடித் தேர்வில் தோல்வி அடைந்தோர், இத்தேர்வை எழுதுகின்றனர்.

மாநிலம் முழுவதும், 200க்கும் மேற்பட்ட மையங்களில், 50 ஆயிரத்து 500 பேர் எழுதுகின்றனர். சென்னையில், 11 மையங்களில் நடக்கும் தேர்வில், 6,533 பேர் எழுதுகின்றனர். இதன் முடிவுகள், அடுத்த மாதம் இறுதிக்குள் வெளியிடப்படும்.

>>>வனத்துறை பள்ளி மாணவர்களுக்கு பரிசு ரூ.3.50 லட்சம் தர அரசு அனுமதி

சுற்றுச்சூழல் மற்றும் வனத்துறையால் நிர்வகிக்கப்படும் பள்ளிகளில், 10ம் வகுப்பு மற்றும், பிளஸ் 2 படித்து, 2011-12ம் ஆண்டு அரசு தேர்வுகளில், வெற்றி பெற்ற மாணவர்களுக்கு பரிசளிக்க, 3.50 லட்சம் ரூபாய் ஒதுக்கப்பட்டுள்ளது. வனத் துறையால் நிர்வகிக்கப்படும் பழங்குடியினர் நலப் பள்ளிகளில், 10ம் வகுப்பு மற்றும் பிளஸ் 2 தேர்வுகளில் அதிக மதிப்பெண் பெறும் பெறும் மாணவ, மாணவியருக்கு பரிசுகள் வழங்கப்படுகின்றன. கடந்த கல்வியாண்டு முதல், அரசு பள்ளிகளில் பயின்று தேர்வில், முதல் மூன்று இடங்களை பெறுவோருக்கு இப்பரிசு வழங்கப்படுகிறது. பத்தாம் பகுப்பில் முதலிடம் பெறும் ஒரு மாணவர், ஒரு மாணவிக்கு, தலா, 25 ஆயிரம், இரண்டாம் இடம் பிடிப்போருக்கு, தலா, 20 ஆயிரம், மூன்றாம் இடம் பிடிப்போருக்கு, தலா, 15 ஆயிரம் ரூபாய் தரப்படும். இதே போல், பிளஸ் 2 தேர்வில் முதலிடம் பெறும் மாணவர், மாணவிக்கு, தலா, 50 ஆயிரம், 30 ஆயிரம், 20 ஆயிரம் ரூபாய், என்ற அடிப்படையில், பரிசு வழங்கப்படுகிறது.
வேலூர் மண்டலத்தில், வனத் துறை பள்ளிக்கு இவ்வாய்ப்பு இத்தடவை கிடைத்திருக்கிறது. இத்தடவை கூடுதலாக ஒரு மாணவி பரிசு பெறும் தகுதி பெற்றிருக்கிறார். அதனால், கூடுதல், 30 ஆயிரம் ரூபாய் வழங்க வேண்டும் என்ற வனத்துறை கோரிக்கையை அரசு ஏற்று, 3.50 லட்சம் ரூபாய்க்கு ஒப்புதல் அளித்து அரசாணை வெளியிடப்பட்டுள்ளது.