>>>டி.என்.பி.எஸ்.சி., அலுவலகம் பாரிமுனை இடத்திற்கு மாற்றம்

சென்னை, ஆயிரம் விளக்கு, கிரீம்ஸ் சாலையில் இயங்கி வரும் டி.என்.பி.எஸ்.சி., அலுவலகம், 15ம் தேதி முதல், பாரிமுனையில் உள்ள புதிய கட்டடத்தில் இயங்க உள்ளது. வணிக வரித் துறைக்குச் சொந்தமான கட்டடத்தில் இயங்கி வந்த தேர்வாணையத்திற்கு, பாரிமுனை, பல் மருத்துவக் கல்லூரிக்கு பக்கத்தில், புதிய கட்டடம் கட்ட, நடவடிக்கை எடுக்கப்பட்டது. ஆறு தளங்களுடன், 1.25 லட்சம் சதுர அடி பரப்பளவில், 20 கோடி ரூபாய் செலவில், பிரமாண்டமாகக் கட்டி முடிக்கப்பட்டது. இதை, கடந்த மாதம், 27ம் தேதி, முதல்வர் திறந்து வைத்தார். இதைத் தொடர்ந்து, தேர்வாணையத்தின் பல்வேறு பிரிவுகள், ஒவ்வொன்றாக, புதிய அலுவலகத்திற்கு மாற்றப்பட்டு, தற்போது அனைத்துப் பிரிவுகளும் மாற்றப்பட்டு விட்டன. எனவே, 15ம் தேதியில் இருந்து, புதிய இடத்தில், தேர்வாணையம் முழுமையாக இயங்க உள்ளது. குரூப்-2 தேர்வுக்கான, பணி நியமன ஒதுக்கீட்டு கலந்தாய்வு, புதிய இடத்தில், முதல் நிகழ்ச்சியாக நடக்கிறது. பாரிமுனை பஸ் நிலையத்திற்கு அருகிலும், கோட்டை ரயில் நிலையத்திற்கு மிக அருகிலும், தேர்வாணைய அலுவலகம் அமைந்துள்ளதால், வெளியூர்களில் இருந்து வரும் தேர்வர்கள், எளிதில் சென்று வரலாம்.

>>>அக்டோபர் 12 [October 12]....

• மல்லாவி அன்னையர் தினம்
• இந்திய தொழிலதிபர் கே.கே.பிர்லா பிறந்த தினம்(1918)
• ரிச்சர்ட் ஜான்சன் என்பவர் தமிழகத்தின் முதல் செய்திப்பத்திரிக்கையான மெட்ராஸ் கூரியர் என்ற வார இதழை வெளியிட்டார்(1785)
• கொலம்பஸ் தினம் முதன் முறையாக நியூயார்க்கில் கொண்டாடப்பட்டது(1792)
• சார்லஸ் மேகின்டொஸ், முதல் ரெயின்கோட்டை விற்பனை செய்தார்(1823)

>>>கேட் தேர்வுகள் தொடக்கம்: ஜனவரி 9ம் தேதி ரிசல்ட்

ஐஐஎம் போன்ற மேலாண்மை கல்வி நிறுவனங்களில் மாணவர்களை சேர்ப்பதற்காக நடத்தப்படும் கேட் தேர்வு இன்று தொடங்கி வரும் நவம்பர் 6ம் தேதி வரை மொத்தம் 21 நாட்கள் நடக்கிறது. இந்த தேர்வின் முடிவுகள் ஜனவரி 9ம் தேதி வெளியிடப்படும் என அறிவிக்கப்பட்டுள்ளது. நாடு முழுவதும் 2 லட்சத்து 14 ஆயிரத்திற்கும் அதிகமான மாணவ, மாணவிகள் இந்தத் தேர்வை எழுதுகின்றனர். இதற்காக நாடு முழுவதும் மொத்தம் 36 நகரங்களில் 61 மையங்களில் அமைக்கப்பட்டுள்ளன. காலையில் 10 மணிக்கு முதல்தாள் தேர்வு நடைபெறும் என்றாலும், பாதுகாப்பு சோதனைகளை பூர்த்தி செய்வதற்காக காலை 8.30 மணிக்கே தேர்வு மையத்தில் தேர்வர்கள் ஆஜராக வேண்டும் என வலியுறுத்தப்பட்டுள்ளது. பிற்பகல் நடைபெறும் 2ம் தாள் தேர்வு 3..15 மணிக்கு தொடங்கும். இதில் பங்கேற்கும் மாணவ, மாணவிகள் மதியம் 1.45 மணிக்கு மையத்தில் இருக்க வேண்டும். இந்த ஆண்டு கேட் தேர்வில் முதல்தாளில் Quantitative Ability, Data Interpretation தொடர்பான கேள்விகளும், 2ம் தாளில் Verbal Ability, Logical Reasoning தொடர்பான கேள்விகளும் இடம்பெறும் எனத் தெரிவிக்கப்பட்டுள்ளது. கேட் தேர்வை எந்தவித சிக்கலும் இன்றி சுமுகமாக நடத்துவதற்காக, தேர்வு நடைபெறும் மையங்களில் விரிவான ஆய்வுகள் நடத்தப்பட்டுள்ளதாக, இந்த ஆண்டுக்கான கேட் தேர்வை நடத்தும் கோழிக்கோடு ஐ.ஐ.எம் கல்வி நிறுவனம் தெரிவித்துள்ளது. கேட் தேர்வின் மூலம் ஐஐஎம் கல்வி நிறுவனங்களில் மாணவர்கள் சேர்க்கப்படக்கூடிய சில முதுநிலை மேலாண்மை பாடத்திட்ட விபரங்கள்: PGP, PGP - ABM, PGSEM, PGPPM, PGP - PGDM, PGP - PGDCM, EPGP, PGDHRM போன்ற படிப்புகள் திருச்சி, பெங்களூர் மற்றும் கோழிக்கோடு உட்பட, நாட்டில் மொத்தமுள்ள 13 ஐஐஎம்-களில் வழங்கப்படுகின்றன. மேலும் FPM (Fellow Programmes in Management) எனப்படும் முனைவர் பட்டத்திற்கு இணையான படிப்பானது, அகமதாபாத், பெங்களூர், கொல்கத்தா, இந்தூர், கோழிக்கோடு, லக்னோ, ராய்ப்பூர், ராஞ்சி, ஷில்லாங் மற்றும் திருச்சி ஆகிய இடங்களிலுள்ள ஐஐஎம் களில் வழங்கப்படுகிறது. கேட் 2012 தேர்வின் மதிப்பெண்களை, www.catiim.in என்ற வலைத்தளத்தில் 9 ஜனவரி, 2013 முதல் பார்க்கலாம். மதிப்பெண் அட்டையின் பிரிண்ட் அவுட் நகலை மாணவர்கள் கட்டாயம் வைத்திருக்க வேண்டும். இந்த கேட் 2012 மதிப்பெண் அட்டையானது, 31 டிசம்பர், 2013 வரை செல்லும். இந்த மதிப்பெண் அட்டையை 31 டிசம்பர், 2013 வரை, www.catiim.in என்ற இணையதளத்திலிருந்து பதிவிறக்கம் செய்து கொள்ளலாம்.

>>>அரசு துறைக்கு மானிய விலை சிலிண்டர் ரத்து: "வாட்' வரி சேர்த்து ரூ.1,110 ஆக நிர்ணயம்

அரசு மருத்துவமனை, மாணவர்கள் விடுதி, காவலர் பயிற்சி பள்ளி உள்ளிட்ட அரசு துறைகளுக்கு, மானிய விலையில், காஸ் சிலிண்டர்கள் வினியோகிக்கப்பட்டு வந்தது. தற்போது, மானியத்தை ரத்து செய்து, "வாட்' வரியுடன் சேர்த்து, விற்பனை செய்ய, ஏஜென்சிகளுக்கு, ஆயில் நிறுவனங்கள் உத்தரவிட்டுள்ளன. ஐ.ஓ.சி., - ஹெச்.பி., - பி.பி., ஆகிய, பொதுத்துறை ஆயில் நிறுவனங்கள், வீட்டு உபயோகத்திற்காக, 14.2 கிலோ எடையுள்ள, காஸ் சிலிண்டர்களையும், வணிக பயன்பாட்டிற்காக, 19 கிலோ எடையுள்ள, கமர்ஷியல் காஸ் சிலிண்டர்களையும் வினியோகம் செய்கின்றன. நடப்பு நிதியாண்டில், 1.87 லட்சம் கோடி ரூபாய் இழப்பை சந்தித்துள்ளதாக கூறிய, பொதுத்துறை ஆயில் நிறுவனங்கள், கடந்த மாதம், டீசல் விலையை உயர்த்தியது. அதோடு, ஒரு குடும்பத்திற்கு, ஆண்டுதோறும், ஆறு சிலிண்டர் மட்டுமே, மானிய விலையில் வழங்கப்படும் என, அறிவித்தது. அடுத்த கட்டமாக, ஒரு குடும்பத்திற்கு, கூடுதலாக மூன்று சிலிண்டர்களை, இரண்டாம் கட்ட மானியத்தில் வழங்குவதாக அறிவித்து, மூன்று சிலிண்டர்கள் விலையை, சிலிண்டருக்கு, 920.50 ரூபாய் என, ஆயில் நிறுவனங்கள் நிர்ணயம் செய்துள்ளன. சில நாட்களுக்கு முன், டொமஸ்டிக் சிலிண்டர் விலையும், 11 ரூபாய் உயர்த்தப்பட்டது. இதனால், ஆண்டு ஒன்றுக்கு, ஆறு சிலிண்டர்களை தலா, 401 ரூபாய் செலுத்தியும், அதற்கு மேல் வாங்கும் மூன்று சிலிண்டர்களை தலா, 920.50 ரூபாய் செலுத்தியும் வாங்க வேண்டிய நிர்பந்தம், வாடிக்கையாளர்களுக்கு ஏற்பட்டுள்ளது. தமிழகம் முழுவதும் உள்ள, எஸ்.சி., - எஸ்.டி., - எம்.பி.சி., மாணவர் விடுதி, காவலர் பயிற்சி பள்ளி, அரசு மருத்துவமனை, ஆரம்ப சுகாதார நிலையம், அங்கன்வாடி மையம் போன்ற, சில அரசு துறைகளுக்கு மட்டும், வணிக பயன்பாட்டில் இருந்து விலக்கு அளித்து, மானியத்துடன் கூடிய காஸ் சிலிண்டர்களை, ஆயில் நிறுவனங்கள் வினியோகம் செய்தன. இந்நிலையில், இவைகளுக்கான மானியமும், ரத்து செய்யப்பட்டுள்ளது. தற்போது, அரசு துறைகளுக்கு வினியோகிக்கும், 14.2 கிலோ காஸ் சிலிண்டர் விலையை, 1,057 ரூபாயாக உயர்த்தப்பட்டுள்ளது. அதோடு, 15 சதவீதம் வாட் வரி, 53 ரூபாய் சேர்த்து, 1,110 ரூபாய்க்கு வினியோகம் செய்ய, ஏஜென்சிகளுக்கு உத்தரவிடப்பட்டுள்ளது. ஆயில் நிறுவனங்களின் இந்த அதிரடி நடவடிக்கையால், இரு மடங்கு கூடுதல் கட்டணம் செலுத்தி, சிலிண்டர் வாங்க வேண்டிய நிர்பந்தம் ஏற்பட்டுள்ளது. இது, அரசு மருத்துவமனை, மாணவர் விடுதி, அங்கன்வாடி உள்ளிட்ட துறை அதிகாரிகளை, அதிர்ச்சியில் ஆழ்த்தி உள்ளது.

>>>இலவச மையத்தில் 76 பேர் குரூப் 4 தேர்வில் வெற்றி

விருதுநகரில் செயல்படும் அரசு ஊழியர்கள் சங்க இலவச பயிற்சி மையத்தில் படித்த 76 பேர், குரூப் 4 தேர்வில் தேர்ச்சி பெற்றுள்ளனர். விருதுநகரில் அரசு ஊழியர்கள் சங்கத்தின் சார்பில், போட்டித்தேர்வுகளுக்கான இலவச பயிற்சி மையம்செயல்படுகிறது. இங்கு அனைத்து போட்டி தேர்வுகளுக்கும், இலவச பயிற்சி வழங்கப்பட்டு வருகிறது. தற்போது வெளியிடப்பட்டுள்ள குரூப் 4 தேர்வில், இங்கு படித்த 76 பேர் தேர்ச்சி பெற்றுள்ளனர். அரசு ஊழியர்கள் சங்கத்தினரே பயிற்சியாளர்களாக உள்ளனர். இது வரை 405 பேர்,போட்டி தேர்வுகளில் தேர்வு செய்யப்பட்டு, பணிகளுக்கு சென்றுள்ளனர்.

>>>படிப்பில் பின்தங்கியுள்ள மாணவர்கள் மீது சிறப்பு கவனம்: மாநகராட்சி புது முயற்சி

மாநகராட்சி பள்ளிகளில், இந்த ஆண்டு பொதுத் தேர்வு எழுதவுள்ள, படிப்பில் மந்தமாக உள்ள, மாணவர்கள் மீது சிறப்புக் கவனம் செலுத்த, மாநகராட்சி முடிவு செய்துள்ளது. சென்னை மாநகராட்சி பள்ளிகளில், பொதுத் தேர்வு எழுதவுள்ள, 10ம் வகுப்பு மற்றும் பிளஸ் 2 மாணவர்களுக்கு, சிறப்பு வகுப்புகள் நடக்கின்றன.மேலும், இந்த ஆண்டு, அதிக மதிப்பெண் பெறும் 110 மாணவர்கள் தேர்வு செய்யப்பட்டு, அவர்கள் மாநில அளவில் சாதிக்கும் வகையில், பிரத்யேக ஆசிரியர்களை வைத்து சிறப்பு பயிற்சிகள் அளிக்கப்பட்டு வருகின்றன. அதேநேரம், மாநகராட்சி பள்ளிகள், இந்த ஆண்டு, 100 சதவீதம் தேர்ச்சி விகிதத்தை எட்டுவதற்காக, புதிய திட்டம் அறிமுகப்படுத்தப்பட்டுள்ளது. இந்த புதிய திட்டத்தை செயல்படுத்த, மதுரை மாநகராட்சி பள்ளிகளில் தேர்ச்சி விகிதத்தை அதிகப்படுத்திய, துணை தாசில்தார் பாலாஜி, சென்னை மாநகராட்சி பணிக்கு மாற்றப்பட்டு உள்ளார். காலாண்டு தேர்வு முடிந்துள்ள நிலையில், மாணவர்களின் கல்வித் திறனை மேம்படுத்துவது குறித்து, தலைமை ஆசிரியர்கள் பங்கேற்ற கலந்தாய்வு கூட்டம், ரிப்பன் மாளிகையில் நடந்தது. இன்னும் 10 நாட்களில், கவன குறைவுள்ள, கல்வித் திறனில் பின்தங்கி உள்ள மாணவர்களின் எண்ணிக்கை கண்டறியப்பட்டு, சிறப்பு முயற்சிகள் மேற்கொள்ளப்படும் என, மாநகராட்சி கல்வி அதிகாரிகள் தெரிவித்தனர். கடந்த ஆண்டு, பிளஸ் 2 அரசு பொதுத் தேர்வில், 84.8 சதவீதமும், 10ம் வகுப்பு தேர்வில், 86.9 சதவீதமும், மாநகராட்சி பள்ளி மாணவர்கள் தேர்ச்சி பெற்றிருந்தது குறிப்பிடத்தக்கது.

>>>முறைகேடின்றி ஆசிரியர் தகுதித் தேர்வு: வாரிய உறுப்பினர் தகவல்

"அக்., 14 ல் நடக்க உள்ள ஆசிரியர் தகுதித் தேர்வு, முறைகேடின்றி நடத்தப்படும்,'' என, ஆசிரியர் தேர்வு வாரிய உறுப்பினர் அறிவொளி கூறினார். ஏற்கனவே நடந்த தேர்வில் தோல்வி அடைந்தவர்களுக்கு, மீண்டும் வாய்ப்பளிக்கும் வகையில், தகுதித் தேர்வு நடக்கிறது. இத்தேர்வுக்கான ஏற்பாடுகள் குறித்து, அவர், மதுரை, சிவகங்கை உள்ளிட்ட மாவட்டங்களில் ஆய்வு நடத்தினார். சிவகங்கையில் அவர் கூறுகையில், ""ஏற்கனவே நடந்த தகுதி தேர்வில் வாய்ப்பு இழந்த, 6 லட்சத்து 55 ஆயிரத்து 243 பேர், புதிதாக விண்ணப்பித்த 20 ஆயிரத்து 43 பேர் தேர்வு எழுத உள்ளனர். குறைபாடு, முறைகேடின்றி தேர்வை நடத்த கல்வி அதிகாரிகளுடன் ஆலோசித்து வருகிறோம்,'' என்றார். முதன்மைக் கல்வி அலுவலர் ராதாகிருஷ்ணன் உடனிருந்தார்.