>>>பல்வேறு பல்கலை பாட திட்டங்களுக்கு அங்கீகாரம்

அண்ணாமலை பல்கலையில் உள்ள, ஒருங்கிணைந்த ஐந்து ஆண்டு, எம்.ஏ., படிப்பை, எம்.ஏ., ஆங்கிலத்திற்கு நிகரானது என, தமிழக அரசு அறிவித்துள்ளது.
உயர்கல்வித்துறை வெளியிட்ட அரசாணை: சிதம்பரம், அண்ணாமலை பல்கலையில், ஐந்து ஆண்டு, ஒருங்கிணைந்த, எம்.ஏ., ஆங்கிலம் மற்றும் தகவல் தொடர்பு படிப்பு படித்தவர்களின், வேலை வாய்ப்பு நலன் கருதி, அப்படிப்பை, எம்.ஏ., ஆங்கிலம் படிப்பிற்கு நிகரானது என, அரசு உத்தரவிடுகிறது.
கோவை அவினாசிலிங்கம் நிகர்நிலை பல்கலையில், எம்.ஏ., "அப்ளைடு சைக்காலஜி கவுன்சிலிங்' மற்றும் சென்னை பல்கலை வழங்கும் எம்.எஸ்சி., "அப்ளைடு சைக்காலஜி' ஆகிய படிப்புகள், முதுகலை சைக்காலஜி படிப்பிற்கு நிகரானது என, உத்தரவிடப் படுகிறது. இந்தப் படிப்பை முடித்தவர்கள், மருத்துவப் பணிகள் சேவைத் துறையில், நேரடியாக உதவி பேராசிரியர் - சைக்காலஜி பணியில் சேர, வழி செய்யப்படுகிறது.
அண்ணாமலை பல்கலை வழங்கும், ஐந்து ஆண்டு ஒருங்கிணைந்த, எம்.ஏ., "அப்ளைடு எகனாமிக்ஸ்' படிப்பு, எம்.ஏ., பொருளியல் படிப்பிற்கு நிகரானது. பாரதியார் பல்கலை வழங்கும், பி.எஸ்சி., "பிளான்ட் பயாலஜி மற்றும் பிளான்ட் பயோ-டெக்னாலஜி' படிப்பு, பி.எஸ்சி., தாவரவியல் படிப்பிற்கு நிகராக ஏற்றுக் கொள்ளப்படும்.
பாரதியார் பல்கலை வழங்கும், பி.ஏ., வரலாறு மற்றும் சுற்றுலா பட்டப் படிப்பு, பி.ஏ., வரலாறு பட்டத்திற்கு இணையானதாக, அரசு உத்தரவிடுகிறது. இதே பல்கலை மற்றும் அண்ணாமலை பல்கலையின், பி.லிட்., - தமிழ் படிப்பு, சென்னை பல்கலை வழங்கும் பி.லிட்., படிப்பிற்கு இணையானது. அண்ணாமலை பல்கலையின், எம்.ஏ., - எம்.எஸ்சி., "அப்ளைடு சைக்காலஜி' படிப்புகளை, எம்.ஏ., சைக்காலஜி படிப்பிற்கு இணையானது.
இவ்வாறு, அரசாணையில் கூறப்பட்டுள்ளது. மேற்கண்ட படிப்புகளை, அதிக மாணவ, மாணவியர் படித்திருப்பதால், அவர்களின் வேலை வாய்ப்புகளை கருத்தில் கொண்டு, தமிழக அரசு, இந்த நடவடிக்கையை எடுத்துள்ளது.

>>>ரூ.10 கோடி மதிப்பில் இலவச தங்குமிடம்

தமிழக அரசு சிவில் சர்வீஸ் பயிற்சி மையத்திற்கென, சென்னை, ராஜா அண்ணாமலைபுரத்தில், 10.14 கோடி ரூபாய் மதிப்பில் கட்டப்பட்ட கட்டடத்தை, முதல்வர் ஜெயலலிதா நேற்று திறந்து வைத்தார். ஆண்டு வருமானம், ஒரு லட்சம் ரூபாய்க்கு மிகாமல் உள்ள, எஸ்.சி., - எஸ்.டி., - எம்.பி.சி., - பி.சி., வகுப்பினருக்கு, இலவச தங்குமிடம், உணவு ஆகியவற்றுடன் அரசின் சிவில் சர்வீஸ் பயிற்சி மையத்தில் பயிற்சியளிக்கப்படுகிறது. இதுவரை, சென்னை அண்ணாநகரில், இந்த பயிற்சி மையம் இயங்கி வந்தது. ராஜா அண்ணாமலைபுரம், அண்ணா மேலாண்மை நிலைய வளாகத்தில், 76 அறைகள், மாற்றுத்திறனாளிகளுக்கான அறைகள், அனைவருக்கும் குளிர்சாதன வசதியுடன் கூடிய வகுப்பறை என, 10.14 கோடி ரூபாயில், நவீன வசதிகளுடன் கட்டப்பட்டு உள்ளன. ஒன்பது மாதங்களில், கட்டி முடிக்கப்பட்ட இக்கட்டடத்தை, முதல்வர் ஜெயலலிதா, நேற்று, "வீடியோ கான்பரன்சிங்' மூலம் திறந்து வைத்தார்.

>>>பத்தாம் வகுப்பு நேரடி தனி தேர்வர் விண்ணப்பங்கள்: ஆயிரக்கணக்கில் நிராகரிப்பு

தமிழகம் முழுவதும், இம்மாதம், 15ம் தேதி முதல், பத்தாம் வகுப்பு தனி தேர்வு துவங்க உள்ள நிலையில், எட்டாம் வகுப்பு முடித்துவிட்டு, நேரடியாக, 10ம் வகுப்பு தனி தேர்வுக்கு விண்ணப்பித்த, ஆயிரக்கணக்கான மாணவ, மாணவியரின் விண்ணப்பங்கள் நிராகரிக்கப்பட்டுள்ளன. அறிவியல் செய்முறை பயிற்சியில் பங்கேற்காததால், விண்ணப்பங்கள் நிராகரிக்கப்பட்டுள்ளதாக, தேர்வுத்துறை வட்டாரங்கள் தெரிவித்தன. ஜூன், ஜூலையில் நடந்த, உடனடித் தேர்வில் தோல்வி அடைந்த மாணவர் மற்றும் நேரடியாக, 10ம் வகுப்பு தேர்வெழுத விரும்பிய மாணவ, மாணவியர், இம்மாதம், 15ம் தேதி முதல் துவங்கும் தேர்வுக்கு விண்ணப்பித்தனர். இம்மாதம், 26ம் தேதி வரை நடக்கும் தேர்வில், 72 ஆயிரம் பேர் பங்கேற்கின்றனர்; 150 மையங்களில், தேர்வுகள் நடக்கின்றன.

செய்முறை தேர்வு அமல்:

கடந்த ஆண்டு வரை, மெட்ரிக்., - ஆங்கிலோ இந்தியன் மாணவ, மாணவியருக்கு மட்டுமே செய்முறைத் தேர்வு அமலில் இருந்தது. சமச்சீர் கல்வி அமலுக்கு வந்துவிட்டதால், அரசு மற்றும் அரசு நிதியுதவி பெறும் பள்ளிகளில் பயிலும், 10ம் வகுப்பு மாணவ, மாணவியருக்கு, அறிவியல் பாடத்தில், செய்முறைத் தேர்வு அமல்படுத்தப்பட்டுள்ளது. எழுத்து தேர்வுக்கு, 75 மதிப்பெண்கள், செய்முறை தேர்வுக்கு, 25 மதிப்பெண்கள் என, பிரிக்கப்பட்டுள்ளன. அதன்படி, நேரடியாக தனி தேர்வு எழுதும் மாணவ, மாணவியரும், அறிவியல் பாடத்தில் செய்முறை தேர்வில் பங்கேற்க வேண்டும். இதற்காக, தேர்வுத்துறை சார்பில் விண்ணப்பங்கள் வழங்கப்பட்டு, பதிவு செய்து கொள்ளும் தேர்வர்களுக்கு, செய்முறை தேர்வு குறித்த பயிற்சியும் அளிக்கப்படுகிறது. எட்டாம் வகுப்பு முடித்து, நேரடியாக, 10ம் வகுப்பு தேர்வை எழுத விரும்பும் தேர்வர்களுக்கு, தற்போது, செய்முறைத் தேர்வு பயிற்சி வகுப்பில் பங்கேற்பதற்கு, விண்ணப்பங்கள் வழங்கப்பட்டு வருகின்றன. இதை அறியாமல், தேர்வில் பங்கேற்பதற்கு, ஆயிரக்கணக்கான நேரடி தனி தேர்வர் விண்ணப்பித்துள்ளனர்.

நிராகரிப்பு:

தர்மபுரி மாவட்டத்தில், தமிழ் பாடத்துக்கு, 764 பேர், ஆங்கிலம், 1,363, கணிதம், 533, அறிவியல், 339, சமூக அறிவியல், 757 பேரும் விண்ணப்பித்தனர். தனி தேர்வுக்கு, நேரடியாக விண்ணப்பித்திருந்த பலர், நேற்று, தர்மபுரி, டி.இ.ஓ., அலுவலகத்திற்கு, "ஹால் டிக்கெட்' பெற வந்தனர். எஸ்.எஸ்.எல்.சி., தேர்வில் தோல்வி அடைந்து, மதிப்பெண் சான்றிதழ் நகலுடன், "ஆன்-லைன்' வழியாக விண்ணப்பித்தவர்களின் விண்ணப்பம் மட்டும் ஏற்றுக் கொள்ளப்பட்டது. எட்டாம் வகுப்பு தேர்ச்சி பெற்று, நேரடியாக, எஸ்.எஸ்.எல்.சி., தேர்வு எழுத விண்ணப்பித்தவர்களின் விண்ணப்பங்கள் நிராகரிக்கப்பட்டன. இதனால், மாணவ, மாணவியர், ஏமாற்றத்துடன், திரும்பிச் சென்றனர். இதேபோல், அனைத்து மாவட்டங்களிலும், கொத்து, கொத்தாக, பல ஆயிரக்கணக்கான விண்ணப்பங்கள் நிராகரிக்கப்பட்டுள்ளன. இரு நாளில், தேர்வு துவங்க உள்ள நிலையில், விண்ணப்பங்கள் நிராகரிக்கப்பட்டதால், மாணவ, மாணவியர் அதிர்ச்சி அடைந்துள்ளனர்.

விளக்கம்:

விண்ணப்பங்கள் நிராகரிப்பு குறித்து, தேர்வுத்துறை இயக்குனரக வட்டாரங்கள், நேற்று மாலை கூறியதாவது: நேரடி தனி தேர்வர், மார்ச் மாதம் நடக்கும் தேர்வில் மட்டுமே பங்கேற்க முடியும். அனைத்து வகை, 10ம் வகுப்பு மாணவ, மாணவியருக்கும், அறிவியலில் செய்முறைத் தேர்வு அமல்படுத்தப்பட்டுள்ளது. எனவே, நேரடி தனி தேர்வர், ஆறு மாதங்களுக்கு முன், செய்முறை பயிற்சி வகுப்பில் பங்கேற்க பதிவு செய்ய வேண்டும். இந்த வகை தேர்வர், மார்ச்சில் நடக்கும் தேர்வுக்கு மட்டுமே அனுமதிக்கப்படுவர். ஜூன், ஜூலையில் நடக்கும் உடனடித் தேர்வு, அக்டோபரில் நடக்கும் தனித் தேர்வில் அனுமதிக்கப்பட மாட்டார்கள். இது தெரியாமல், செய்முறை பயிற்சி வகுப்பிற்கு பதிவு செய்யாத நேரடி தனி தேர்வர், விண்ணப்பித்துள்ளனர். இப்படிப்பட்ட மாணவர்களின் விண்ணப்பங்கள் நிராகரிப்பதைத் தவிர, வேறு வழியில்லை. எத்தனை ஆயிரம் விண்ணப்பங்கள் நிராகரிக்கப்பட்டுள்ளன என்ற விவரம், தற்போது தெரியவில்லை. இவ்வாறு தேர்வுத்துறை வட்டாரங்கள் தெரிவித்தன.

>>>டி.இ.டி., தகுதித் தேர்வு - வெற்றி ரகசியங்கள்

நாளை டி.இ.டி., மறு தகுதித் தேர்வு நடக்க உள்ளது. இதில் வெற்றி பெற சில ஆலோசனைகள்:

* நீங்கள் தேர்ந்தெடுத்திருக்கும் மொழிப் பாடமான தமிழையும், விருப்பப் பாடமான, அறிவியல் அல்லது சமூக அறிவியல், விடைத்தாளில் அதற்கென ஒதுக்கப்பட்டுள்ள இடத்தில், நிழலிட்டு காட்டுவது அவசியம்.

* மறுதேர்வு எழுதுவோருக்கு, புதிய பதிவெண் வழங்கப்பட்டுள்ளது. இதை கவனத்தில் கொள்ளவும்.

* தேர்வு மையங்கள் அமைந்துள்ள பள்ளிகள், அதே பெயரில் கிளைகளை கொண்டிருப்பதால், மையம் எது என்பதை முதல் நாளே உறுதி செய்யுங்கள்.

* போட்டோ இல்லாமல் ஹால் டிக்கெட் வந்திருந்தால், அரசிடம் பதிவு பெற்ற அலுவலரிடமிருந்து பெறப்பட்ட, போட்டோ ஒட்டிய, தற்காலிக அடையாள அட்டையை எடுத்துச் செல்லுங்கள்.

* விடைத்தாளில், ஒன்றன் பின்ஒன்றாக விடையளிப்பதே நல்லது. தெரிந்த வினாக்களுக்கு முதலில் விடையளித்து, தெரியாதவற்றுக்கு பின்னர் விடையளிக்கலாம் என, நினைப்பது சரியல்ல; விடைத்தாள், ஓ.எம்.ஆர்., தாளாக இருப்பதால், கவனக் குறைவாக, வரிசை மாறிவிட வாய்ப்புண்டு; எல்லா விடைகளுமே தவறாகும் அபாயம் நிகழலாம்.

* வினாக்களின் ஆங்கில வடிவத்தையும் படிப்பது அவசியம். வினாக்கள், ஆங்கிலத்தில் தயார் செய்யப்பட்டு, பின்னரே தமிழில் மொழி பெயர்க்கப்படுகின்றன.

* வினாத்தாள் தொகுப்பு, அனைத்து விருப்பப் பாடங்களையும் உள்ளடக்கியதாகத் தரப்படுகிறது. சமூக அறிவியல், அறிவியல் வினாக்களை கவனித்து தேர்ந்தெடுக்க வேண்டும். சமூக அறிவியல், அறிவியலில் சில பாடங்கள் ஒன்றோடொன்று தொடர்புடையதாக இருப்பதால், விருப்பப் பாட வினாப் பிரிவைத் தேர்ந்தெடுப்பதில், கடந்த தேர்வில் சிலர் குழம்பினர்.

* கணித வினாவுக்கு, முழுக் கணக்கையுமே செய்து பார்க்க வேண்டியதில்லை. கொடுக்கப்பட்டுள்ள, "ஆப்ஷன்'களில், வினாவுக்கு சற்றும் பொருந்தாத இரண்டு விடைகளை, "டெலிஷன் மெத்தடு' - நீக்கல் முறையில் நீக்கிட வேண்டும். மீதமுள்ள இரண்டு, "ஆப்ஷன்'களில் எது சரி எனக் கண்டுபிடிக்க, சில, "ஸ்டெப்ஸ்'கள் போட்டால் போதும். நெருக்கமான விடையைத் தேர்ந்தெடுத்து எழுதிவிட்டு, அடுத்த வினாவுக்கு சென்று விடலாம்.

* நேர மேலாண்மை அவசியம். ஒரே கேள்விக்கு விடையளிக்க நீண்ட நேரம், யோசிக்காதீர்.

>>>அக்டோபர் 13 [October 13]....

• சர்வதேச இயற்கை பேரிடர் தினம்
• தாய்லாந்து தேசிய காவல்துறை தினம்
• சர்வதேச நேரம் கணக்கிடும் இடமாக கிரீன்வீச் தேர்வு செய்யப்பட்டது(1884)
• வெள்ளை மாளிகைக்கான அடிக்கல் வாஷிங்டன் டிசியில் இடப்பட்டது(1792)
• துருக்கி தலைநகர் இஸ்தான்புல் நகரில் இருந்து அங்காராவுக்கு மாற்றப்பட்டது(1923)

>>>அரசு/நகராட்சி மேல்நிலைப்பள்ளித் தலைமையாசிரியர் பதவி உயர்வு கலந்தாய்வு 15-10-2012 அன்று நடைபெற உள்ளது...[Government/Municipal Higher Secondary School HeadMaster Promotion Counselling on 15-10-2012]...

அரசு/நகராட்சி மேல்நிலைப்பள்ளித் தலைமையாசிரியர் பதவி உயர்வுக்கான கலந்தாய்வு சம்பந்தப்பட்ட முதன்மைக் கல்வி அலுவலகங்களில் 15-10-2012 அன்று காலை 10 மணியளவில் ஆன்லைன் வழியாக நடைபெறவுள்ளது. இதற்கான பள்ளிக்கல்வி இயக்குநரின் செயல்முறைகள் மற்றும் முதுகலை ஆசிரியர்/உயர்நிலைப்பள்ளித் தலைமையாசிரியர் ஒருங்கிணைந்த முன்னுரிமைப்பட்டியல் வெளியிடப்பட்டுள்ளது.

>>>பள்ளிக்கல்வி இயக்குநரின் செயல்முறைகள்... [School Education Director's Proceedings]

>>>மேல்நிலைப்பள்ளித் தலைமையாசிரியர் பதவி உயர்வுக்கான முதுகலை ஆசிரியர்/உயர்நிலைப்பள்ளித் தலைமையாசிரியர் ஒருங்கிணைந்த முன்னுரிமைப்பட்டியல்....

>>>வங்கிகளில் வசூலாகாத கல்விக் கடன் அதிகரிப்பு

கடந்த, 10 ஆண்டுகளாக, பொதுத்துறை வங்கிகள் வழங்கும் கல்விக் கடன் அதிகரித்து வருகிறது. அதேபோன்று, வசூலாகாத கல்விக் கடனும் உயர்ந்து வருகிறது. குறிப்பாக, தமிழ்நாடு, கேரளா போன்ற மாநிலங்களில், பொதுத்துறை வங்கிகள் வழங்கிய கல்விக் கடனில், 15 சதவீதத்திற்கு அதிகமான தொகை, வசூலாகாமல் உள்ளது. வளர்ச்சி விகிதம்: கடந்த 2003-04 முதல் 2011-12ம் நிதியாண்டு வரை, பொதுத் துறை வங்கிகளின் கல்விக் கடன், ஒட்டுமொத்த அளவில், 35 சதவீத ஆண்டு வளர்ச்சி விகிதத்தை கண்டு வந்துள்ளது. இதே காலத்தில், வங்கித் துறையின் கடன் வளர்ச்சி, 23 சதவீதமாக இருந்தது என்பது குறிப்பிடத்தக்கது. "கல்விக் கடன் பிரிவின் வளர்ச்சியே, வங்கிகளின் சொத்து மதிப்பு குறைவதற்கும் வழி வகுத்துள்ளது" என, எஸ்பிரிட்டோ சான்டோ செக்யூரிட்டீஸ் நிறுவனத்தின் ஆய்வாளர் சாய்கிரண் புலவர்த்தி தெரிவித்தார். பொதுவாகவே, கல்விக் கடன் என்பது, உத்தரவாதமற்றதாகவே வங்கித் துறையில் கருதப்படுகிறது. பட்டம் பயின்ற மாணவர்கள், துவக்கத்தில் குறைந்த ஊதியத்தையே பெறுகின்றனர். இதனால், அவர்கள் கல்விக் கடனுக்காக திரும்ப செலுத்தும் தொகையும் குறைவாக உள்ளது.

நிதி பற்றாக்குறை: இது, வங்கிகள் கல்விக் கடன் அளிப்பதற்கும், கடனை திரும்ப பெறுவதற்கும் உள்ள இடைவெளியை அதிகமாக்கி, நிதிப்பற்றாக்குறைக்கு வழி வகுக்கிறது. கடந்த 2007-08ம் நிதியாண்டு நிலவரப்படி, வங்கிகள் வழங்கிய கல்விக் கடனில், மொத்த வசூலாகாத கடன், 2 சதவீதமாக இருந்தது. இது, சென்ற 2011-12ம் நிதியாண்டில், 6 சதவீதமாக உயர்ந்துள்ளது. மத்திய அரசின், 2004-05ம் நிதியாண்டிற்கான பட்ஜெட் உரையில், நிதி அமைச்சர் ப.சிதம்பரம், வங்கிகளின் கல்விக் கடனை ஊக்குவிக்கும் வகையில் பல்வேறு சலுகைகளை அறிவித்தார். இதையடுத்து, வங்கிகள் கல்விக் கடன் வழங்குவதில் தீவிரம் காட்டி வந்தன. இந்த வகையில், அதிக அளவில் கல்விக் கடன் வழங்குவதில், தென்னிந்தியாவை சேர்ந்த தமிழகம், கேரளா, கர்நாடகா, ஆந்திரா ஆகிய நான்கு மாநிலங்கள் முன்னணியில் உள்ளன. நடப்பு 2012ம் ஆண்டு, மார்ச் கடைசி நிலவரப்படி, பொதுத் துறை வங்கிகளின் மொத்த கல்விக் கடனில், மேற்கண்ட நான்கு மாநிலங்களின் பங்களிப்பு 56 சதவீதமாக உள்ளது. தென்னிந்தியாவை சேர்ந்த, பெரும்பாலான பொதுத் துறை வங்கிகளின் மொத்த கடனில், கல்விக் கடன் அதிக பங்களிப்பைக் கொண்டுள்ளது. சென்ற 2011-12ம் நிதியாண்டில், தென்மாநிலங்களை சேர்ந்த பொதுத்துறை வங்கிகளின் மொத்த கடனில், கல்விக் கடன், 2.55 சதவீதமாக இருந்தது. அதே சமயம், இந்திய அளவில், பொதுத்துறை வங்கிகளின் மொத்த கடனில், ஒட்டுமொத்த கல்விக் கடன், சராசரியாக 1.17 சதவீதம் என்ற அளவிற்கே உள்ளது. கடந்த சில மாதங்களாக, கல்விக் கடன் பிரிவின் சொத்து மதிப்பு குறித்து, பல வங்கிகள் கவலை தெரிவித்து வருகின்றன. அதே சமயம், வங்கிகள் கல்விக் கடன் வழங்க, மறுக்கும் வங்கிகள் குறித்த புகாரின் எண்ணிக்கை அதிகரித்திருப்பதாக ரிசர்வ் வங்கி தெரிவித்துள்ளது.

மாநில அரசுகள்: இதையடுத்து, வங்கிகள் மற்றும் கல்விக் கடன் பெறுவோர் சந்திக்கும் பிரச்னைகள் குறித்தும், அவற்றுக்கான தீர்வுகள் பற்றியும் மத்திய, மாநில அரசுகளுடன் ரிசர்வ் வங்கி ஆலோசனை நடத்தி வருகிறது. மாணவர்கள் சுலபமாக கல்விக் கடன் பெறும் வகையில், வட்டிச் சலுகை, கடன் உறுதி திட்டம் போன்ற நடவடிக்கைகளை மத்திய, மாநில அரசுகள் எடுத்து வருகின்றன. இத்திட்டங்களால், தென்னிந்தியாவை சேர்ந்த இந்தியன் பேங்க், இந்தியன் ஓவர்சீஸ் பேங்க், ஸ்டேட் பேங்க் ஆப் திருவாங்கூர், ஆந்திரா பேங்க், கனரா பேங்க் மற்றும் ஸ்டேட் பேங்க் ஆப் மைசூர் ஆகிய வங்கிகள், மிகப் பெரிய அளவில் பயனடையும் என, எதிர்பார்க்கப்படுகிறது.

வங்கிகள் வழங்கிய கல்விக்கடன் விபரங்கள்

ஸ்டேட் பேங்க் ஆப் இந்தியா - ரூ.12,566 கோடி
கனரா வங்கி - ரூ.3,948 கோடி
பஞ்சாப் நேஷனல் வங்கி - ரூ.3,309 கோடி
இந்தியன் வங்கி - ரூ.3,222 கோடி
இந்தியன் ஓவர்சீஸ் வங்கி - ரூ.2,469 கோடி
சிண்டிகேட் வங்கி - ரூ.2,270 கோடி
ஸ்டேட் பேங்க் ஆப் திருவாங்கூர் - ரூ.2,263 கோடி
பேங்க் ஆப் இந்தியா - ரூ.2,193 கோடி
பேங்க் ஆப் பரோடா - ரூ.1,872 கோடி
யூனியன் பேங்க் ஆப் இந்தியா - ரூ.1,860 கோடி
ஆந்திரா வங்கி - ரூ.1,516 கோடி

இந்த விபரங்கள் மார்ச், 2012 நிலவரப்படியானவை.