>>>பழைய பாடத்திட்டத்தில் தேர்வு - பெரியார் பல்கலை வாய்ப்பு

பெரியார் பல்கலையில், ஐந்தாண்டுகளுக்கும் மேலாக தேர்ச்சி பெறாத நிலுவைத் தாள்களை வைத்திருக்கும் மாணவ, மாணவியருக்கு, மீண்டும் பழைய பாடத்திட்டத்திலேயே தேர்வெழுத, தற்போது வாய்ப்பளிக்கப்பட்டு உள்ளது. பெரியார் பல்கலை சார்பில் வெளியிடப்பட்ட அறிக்கை: பெரியார் பல்கலை இணைவு பெற்ற கல்லூரி களில், கலை மற்றும் அறிவியல் பட்டப்படிப்பு படித்து, வெளிச்சென்ற மாணவர்கள், தேர்ச்சி பெறாத நிலுவைத் தாள்களை, ஐந்தாண்டுகள் படிப்புக் காலத்துக்குள் முடிக்க வேண்டியது வழக்கம். இவ்வாறு, படிப்பு ஆண்டு, ஐந்தாண்டுகள் நிறைவடைந்த நிலையில் உள்ளவர்களுக்கும், அதற்கு முந்தைய ஆண்டில் பயின்று தேர்ச்சி பெறாத நிலுவைத் தாள் வைத்திருக்கும் மாணவர்களுக்கும், தற்போது இறுதியாகப் படித்த பாடத்திட்டத்திலேயே தேர்வெழுத வாய்ப்பு வழங்கப்பட்டு உள்ளது. பூர்த்தி செய்யப்பட்ட விண்ணப்பங்கள், டிச., 14ம் தேதிக்குள், பெரியார் பல்கலைக்கு வந்து சேர வேண்டும். விண்ணப்பங்களை தாங்கள் பயின்ற கல்லூரியிலேயே பெற்று, பூர்த்தி செய்து, முதல்வர் வாயிலாக அனுப்ப வேண்டும். இதற்கான கால அட்டவணை மற்றும் தேர்வு மைய விவரம் பின்னர் தெரிவிக்கப்படும்.

>>>கலை-அறிவியல் கல்லூரி மாணவர்களுக்கு சிறப்பு பயிற்சிகள்

மாநில திறன் மேம்பாட்டுத் திட்டத்தின் கீழ், 20 ஆயிரம் கல்லூரி மாணவர்களுக்கு, மென் திறன்கள் மற்றும் வேலை வாய்ப்புத் திறன்கள் தொடர்பாக பயிற்சியளிக்க திட்டமிடப்பட்டுள்ளது. கலை மற்றும் அறிவியல் கல்லூரிகளில் படிக்கும், மூன்றாமாண்டு மாணவர்களுக்கு, மொத்தம் 235 மணி நேரங்கள் பயிற்சியளிப்பது இத்திட்டத்தின் நோக்கம். இதன்மூலம், கல்லூரி படிப்பை முடித்து வெளிவரும் மாணவர்கள், ஐ.டி, ஐ.டி.இ.எஸ், சில்லறை வர்த்தகம் மற்றும் விருந்தோம்பல் துறைகளில் பணிவாய்ப்புகள் பெறுவது எளிதாக்கப்படும். தகவல் தொடர்பு திறன்கள், ஆங்கில உச்சரிப்பு மற்றும் இலக்கணம், வாடிக்கையாளர் சேவை திறன்கள், பி.சி அப்ளிகேஷன்ஸ், சட்டச்சு திறன்கள், நேர்முகத் தேர்வுக்கு தயாராதல் போன்ற அம்சங்கள் இப்பயிற்சி திட்டத்தில் அடங்கும். இவைத்தவிர, ஐ.டி.இ.எஸ், சில்லறை வர்த்தகம் மற்றும் விருந்தோம்பல் போன்ற குறிப்பிட்ட துறைகளுக்கு தேவையான திறன் வளர்ப்பு பயிற்சிகளிலும் கவனம் செலுத்தப்படும். இப்பயிற்சி திட்டத்தை செயல்படுத்துவது தொடர்பாக, அனுபவம் வாய்ந்த தனியார் நிறுவனங்களுடன் ஒப்பந்தம் மேற்கொள்ளப்பட்டுள்ளது. தேர்ந்தெடுக்கப்படும் கல்வி நிறுவனங்கள், மாநிலம் முழுவதுமுள்ள 62 கலை மற்றும் அறிவியல் கல்லூரிகளுடன் இணைந்து செயல்படும். இந்த தனியார் நிறுவனங்கள் சிறப்பாக செயல்படுவதற்கான ஒத்துழைப்பை, மாநில அரசின் கல்லூரி கல்வித்துறை வழங்கும். கல்லூரி இறுதியாண்டில், 6 முதல் 7 மாதங்கள் வரை நீடிக்கும் இந்த பயிற்சிகள், வாரத்திற்கு தோராயமாக 8 மணிநேரங்கள் வரை வழங்கப்படும். இத்தகைய பயிற்சிகள், கிராமப்புறங்களிலிருந்தும், தமிழ் வழியில் கல்விக் கற்றும் வரும் மாணவர்களுக்கு, பேருதவியாக இருந்து, அவர்களின் ஆங்கில மொழித்திறனை மேம்படுத்த உறுதுணையாக இருக்கும். பயிற்சியளிக்கும் தனியார் நிறுவனங்களின் வேலைவாய்ப்பு உதவிக் குழுவானது, ஐ.டி. ஐ.டி.இ.எஸ், சில்லறை வணிகம் மற்றும் விருந்தோம்பல் துறை நிறுவனங்களிடம் தொடர்பை ஏற்படுத்திக் கொண்டு, மாணவர்களின் வேலை வாய்ப்புகளை உறுதிசெய்யும் விதமாக பணியாற்றும். படிப்பு மற்றும் பயிற்சிகளை முடித்த மாணவர்களுக்கான வேலைவாய்ப்பு முகாம்கள், சென்னை, மதுரை, கோவை, திருச்சி, திருநெல்வேலி, சேலம் மற்றும் வேலூர் ஆகிய 7 இடங்களில் நடத்தப்படும். இதன்மூலம், மாநிலத்தின் பல்வேறு பகுதிகளிலுள்ள மாணவர்கள் எளிதாக கலந்துகொள்ள வழியேற்படும். மாநில அரசின் இந்த புதிய திட்டத்தை, கல்வியாளர்கள் பலர் வரவேற்றுள்ளனர்.

>>>ஜி.ஆர்.இ தேர்வின் நுணுக்கங்களை அறியுங்கள்

ஜி.ஆர்.இ. தேர்வானது உலகளவில் முக்கியத்துவம் வாய்ந்த தேர்வாக இருப்பதால், அதில் தேர்ச்சிபெற ஏராளமானோர் முயலும் நிலையில், தேர்வைப் பற்றி அடிக்கடி எழும் பலவிதமான கேள்விகளும், அதற்கான பதில்களும் இங்கே கொடுக்கப்பட்டுள்ளன.

1. ஜி.ஆர்.இ ரிவைஸ்டு ஜெனரல் டெஸ்ட் என்றால் என்ன?

இளநிலை அளவிலான ஒரு பட்டப்படிப்பை மேற்கொள்வதற்கு, ஒரு மாணவர் எந்தளவிற்கு தயாராகவும், தகுதியாகவும் உள்ளார் என்பதை அளவிடுவதற்காக இத்தேர்வு நடத்தப்படுகிறது. முதுநிலைப் பட்டப் படிப்புகளுக்கான கல்வி நிறுவனங்களில் சேர, உங்களுக்கான அதிக வாய்ப்புகளை ஏற்படுத்தி தரும் ஒரு தேர்வாகும் இது.

உலகெங்கிலும், முதுநிலைப் பட்டப் படிப்புகளை வழங்கிவரும் ஆயிரக்கணக்கான கல்வி நிறுவனங்கள், GRE Revised General Test  மதிப்பெண்களை ஏற்றுக்கொள்கின்றன மற்றும் 1000க்கும் மேற்பட்ட வணிகப் பள்ளிகள், தங்களின் MBA மற்றும் பிறவகை வணிகப் படிப்புகளில் மாணவர்களை சேர்த்துக்கொள்ள இத்தேர்வு மதிப்பெண்களை கணக்கிடுகின்றன.

முதுநிலைப் பட்டப் படிப்பை ஒரு மாணவர் வெற்றிகரமாக முடிப்பதற்கான திறன்கள் இருக்கிறதா என்பதை இந்த GRE Revised General Test சோதிக்கிறது. Verbal reasoning, Quantitative reasoning, Critical thinking, Analytical writing போன்ற அம்சங்கள் அவற்றில் அடங்கும்.

>>>குரூப்-2: இரண்டாம் கட்ட கலந்தாய்வு துவங்கியது

குரூப்-2 தேர்வில் தேர்வானவர்களில், நேர்முகத் தேர்வு அல்லாத, 3,220 பணியிடங்களை நிரப்புவதற்கான, இரண்டாம் கட்ட கலந்தாய்வு, நேற்று துவங்கியது. குரூப்-2 நிலையில், 6,000க்கும் அதிகமான பணியிடங்களை நிரப்புவதற்கு, தேர்வு செய்யப்பட்ட விண்ணப்பதாரரில், நேர்முகத் தேர்வு உடைய, 3,000 பணியிடங்களை நிரப்ப, கடந்த மாதம், டி.என்.பி.எஸ்.சி., அலுவலகத்தில், பணி ஒதுக்கீட்டு கலந்தாய்வு நடந்தது.
இதைத் தொடர்ந்து, நேர்முகத் தேர்வு அல்லாத, 3,220 பணியிடங்களை நிரப்ப, நேற்று கலந்தாய்வு துவங்கியது. டிச., 1ம் தேதி வரை, தொடர்ந்து கலந்தாய்வு நடக்கிறது. ஒவ்வொரு நாளும், கலந்தாய்வில் பங்கேற்க அழைக்கப்பட்டுள்ளவர்களின் விவரங்கள், தேர்வாணைய இணையதளத்தில் (www.tnpsc.gov.in) வெளியிடப்பட்டு உள்ளன. அதன்படி, விண்ணப்பதாரர்கள், கலந்தாய்வில் பங்கேற்க வேண்டும் என, தேர்வாணைய செயலர் விஜயகுமார் கேட்டு கொண்டுள்ளார்.

>>>அனுமதி பெறாத பாடப்பிரிவால் மாணவர்களுக்கு சிக்கல்

திருவள்ளுவர் பல்கலைக்கழகத்தில் அனுமதி வாங்காமல், ஜவகர் கல்லூரியில் துவங்கப்பட்ட புதிய பாடப்பிரிவால், மாணவர்கள் கல்வி கற்பதில் சிக்கல் ஏற்பட்டுள்ளது.

நெய்வேலி ஜவகர் கல்வி கழகத்தின் கீழ், ஜவகர் அறிவியல் கல்லூரி கடந்த, 25 ஆண்டுகளாக செயல்பட்டு வருகிறது. இங்கு இளநிலை, முதுகலையில், தமிழ், ஆங்கிலம், வணிகவியல், பொருளியல், வேதியியல் உள்ளிட்ட பாடப்பிரிவுகளில், ஆயிரத்திற்கும் மேற்பட்ட மாணவர்கள் படிக்கின்றனர்.

நுழைவுத் தேர்வு: கல்லூரியில், இந்தாண்டு புதிதாக கணித துறையில், எம்.பில்., பாடப்பிரிவு துவங்க முடிவெடுக்கப்பட்டது; மாணவர்கள் சேர்க்கையும் நடந்தது. 25க்கும் மேற்பட்ட மாணவர்கள், எம்.பில்., பாடப்பிரிவில் நுழைவுதேர்வு எழுதினர். இதில், 15க்கும் மேற்பட்ட மாணவர்கள் தேர்வு செய்யப்பட்டனர்; கல்வி கட்டண தொகையையும் செலுத்தியுள்ளனர்.

இந்நிலையில், வகுப்புகள் துவங்கப்படவில்லை. மாணவர்கள் கல்வி கட்டண தொகையும் திரும்பி தரப்படவில்லை. மற்ற கல்லூரிகளில், செப்டம்பர் மாதத்தில் வகுப்புகள் துவங்கப்பட்ட நிலையில், ஜவகர் கல்லூரியில், எம்.பில்., வகுப்புகள் துவங்கப்படவில்லை. கல்வி கட்டணம் செலுத்தியும், வகுப்பு ஆரம்பிக்கப்படாததால், எதிர்காலம் பாழாகும் என, மாணவர்களும், பெற்றோரும் அச்சப்பட்டனர். கல்வி நிர்வாகத்திடம் முறையிட்டனர்.

அனுமதி அவசியம்: இந்நிலையில், மாணவர்கள் சேர்க்கை விவரங்களை ஜவகர் கல்லூரி, திருவள்ளுவர் பல்கலைக் கழகத்திற்கு அனுப்பியுள்ளது. "புதிய வகுப்புகள் துவங்க வேண்டும் என்றால், அங்கீகரிக்கப்பட்ட பல்கலைக்கழகத்தில் அனுமதி வாங்க வேண்டும். வகுப்பு துவங்குவதற்கு, விண்ணப்பிக்காத நிலையில், எப்படி மாணவர்கள் சேர்க்கை நடத்தினீர்கள் என, விளக்கம் அளிக்க வேண்டும்" என, திருவள்ளுவர் பல்கலைக்கழகம், கல்லூரி நிர்வாகத்திற்கு கேட்டுள்ளது.

இதுகுறித்து, கல்லூரி வட்டாரங்கள் கூறியதாவது: கல்லூரி முதல்வர், உரிய காலத்தில் திருவள்ளுவர் பல்கலைக்கழகத்திற்கு விண்ணப்பம் செய்யாததாலும், கல்லூரி பேராசிரியர்கள், எம்.பில்., நெறியாளர்களுக்கான தகுதி, பல்கலைக் கழகத்திலிருந்து, முன்கூட்டியே பெறாததாலும், எம்.பில்., வகுப்பு துவங்குவதில் சிக்கல் ஏற்பட்டுள்ளது.

இதனால், மாணவர்களின் ஓராண்டு கல்வி பாதிக்கப்பட்டுள்ளது. கல்வி கட்டணம் செலுத்திய மாணவர்களை, மற்ற கல்லூரியில் சேர்க்க கல்லூரி நிர்வாகம் நடவடிக்கை எடுக்க வேண்டும். இவ்வாறு அவர்கள் தெரிவித்தனர்.

வலியுறுத்தல்: கல்லூரி முதல்வர் சந்திரசேகரனிடம் கேட்டபோது, "இது குறித்து நான் எந்த விளக்கமும் அளிக்க முடியாது; கல்லூரி நிர்வாகம் மட்டுமே பதிலளிக்க முடியும்,&'&' என்றார். அனுமதி பெறாமல் பாடப்பிரிவை துவங்கிய கல்லூரி நிர்வாகத்தின் மீது நடவடிக்கை எடுப்பதோடு, பாதிக்கப்பட்ட மாணவர்களின் நலன் காக்க, உயர்கல்வித்துறை நடவடிக்கை எடுக்க வேண்டுமென, மாணவர்கள் வலியுறுத்தியுள்ளனர்.

>>>"ஸ்லெட்' தேர்வு முடிவு எப்போது?

"கல்லூரி ஆசிரியர் பணியிடங்களுக்கான தேர்வு, விரைவில் அறிவிக்கப்படவுள்ளதால், "ஸ்லெட்' தேர்வு முடிவுகளை உடனடியாக வெளியிட வேண்டும்' என்ற, கோரிக்கை எழுந்துள்ளது. பல்வேறு பாடப்பிரிவுகளில் முதுகலை பட்டம் பெற்றவர்கள், கல்லூரிகளில் பேராசிரியர் பணியில் சேர, மாநில அளவிலான தகுதித்தேர்வு (ஸ்லெட்) அல்லது தேசிய அளவிலான தகுதித்தேர்வில் (நெட்) தேர்ச்சி பெற வேண்டும் என, பல்கலை மானியக்குழு (யு.ஜி.சி.,) விதிமுறை வகுத்துள்ளது. அதன்படி, மத்திய, மாநில அரசுகள், பல்கலைக்கழகங்கள் மூலம் தகுதித்தேர்வு நடத்தி வருகின்றன. நடப்பு கல்வியாண்டுக்கான, "ஸ்லெட்' தேர்வு, கோவை பாரதியார் பல்கலை மூலம் நடத்தப்பட்டது. மாநிலம் முழுவதும், 62 ஆயிரம் பேர் விண்ணப்பித்தனர். 76 மையங்களில், அக்., 7ம் தேதி தேர்வு நடந்தது; 51 ஆயிரத்து 500 பேர் பங்கேற்று, 27 பாடப்பிரிவுகளில் தேர்வு எழுதினர். தேர்வு முடிவு, ஒரு மாதத்துக்குள் வெளியிடப்படும் என, அறிவிக்கப்பட்டது. ஆனால், இதுவரை வெளியிடப்படவில்லை. கல்லூரி ஆசிரியர் தேர்வுக்கான அறிவிப்பு விரைவில் வெளியாகும் என, தமிழ்நாடு ஆசிரியர் தேர்வு வாரியம் தெரிவித்துள்ள நிலையில், "ஸ்லெட்' தேர்வில் தேர்ச்சி பெற்றிருந்தால் மட்டுமே, ஆசிரியர் தேர்வுக்கான விண்ணப்பத்தை பெற முடியும். எனவே, "ஸ்லெட்' தேர்வு முடிவை உடனடியாக வெளியிட வேண்டும் என, தேர்வெழுதியோர் வலியுறுத்தியுள்ளனர்.

தேர்வு அதிகாரி ஒருவர் கூறுகையில், "பல்கலை மாணவர் சேர்க்கை, தேர்வு போன்ற வழக்கமான பணிகளுக்கு இடையே, "ஸ்லெட்' தேர்வு விடைத்தாள் திருத்த வேண்டியுள்ளதே, தாமதத்துக்கு காரணம். கம்ப்யூட்டர் பிரிவில் விடைத்தாள் திருத்தும் பணிகள் மும்முரமாக நடந்து வருகின்றன. விரைவில், தேர்வு முடிவுகள் வெளியிடப்படும்' என்றார்.

>>>24 ஆயிரம் பேருக்கு வேலை தேர்வாணய தலைவர் தகவல்

"இந்தாண்டு இறுதிக்குள், 24 ஆயிரம் பேர் பணியமர்த்தப்பட உள்ளனர்,'' என, டி.என்.பி.எஸ்.சி., தலைவர் நட்ராஜ் கூறினார்.சென்னை பல்கலைக்கழக, மேலாண்மை கல்வி துறை சார்பில், "மனித வள மேலாண்மை தற்போதைய முன்னேற்றம்' குறித்த கருத்தரங்கம், மயிலாப்பூரில் உள்ள சவேரா ஓட்டலில் நடந்தது. கருத்தரங்கை துவக்கி வைத்து, தமிழ்நாடு அரசு பணியாளர் தேர்வாணைய தலைவர் நட்ராஜ் பேசியதாவது:

மனித வளத்தை மேம்படுத்தும் வகையில், நடவடிக்கைகள் எடுக்க வேண்டும். ஆனால், நிறுவனங்களில் உள்ள மனித வள மேம்பாட்டு அலுவலர்கள், ஊழியர்களின் குறைகளை மட்டும் கூறுபவர்களாக உள்ளனர். புதிதாக சிந்திப்பவர்களாகவும், வேலை பார்ப்பவர்களோடு சேர்ந்து, குழுவாகவும் செயல்படுவதில்லை. அனைத்து துறைகளில் இருக்கும் மனித வள அதிகாரிகள் மிக திறமையுடன் செயல்படுவர்களாக இருக்கும் பட்சத்தில், வேலை பார்ப்பவர்களும் தங்களுடைய பொறுப்பை உணர்ந்து செயல்படுவர்.

செப்டம்பர், 30ம் தேதி நடைபெற்ற வி.ஏ.ஓ., தேர்வு முடிவுகள், இம்மாதம் இறுதிக்குள் வெளியிடப்படும். குரூப்-2 தேர்வு வினாத்தாள் வெளியானதால், நவ., 4ல் மறுதேர்வு நடத்தப்பட்டது. இதற்கான தேர்வு முடிவுகள், வரும்       டிச., 15க்குள் வெளியிடப்படும்.

அரசு பணியாளர் தேர்வாணைய வரலாற்றில் முதன் முறையாக, ஓராண்டுக்குள், 24,400 பேர் பணியமர்த்தப்பட உள்ளனர். குரூப்-1 காலி பணியிடங்கள் எண்ணிக்கை குறித்த விவரங்களை, அரசு துறைகளிடம் கேட்டுள்ளோம். அவர்கள் தரும் பட்சத்தில், காலியிடங்களின் எண்ணிக்கை அதிகரிக்க வாய்ப்புள்ளது.இவ்வாறு, நட்ராஜ் பேசினார்.நிகழ்ச்சியில், உயர் கல்வி துறை செயலர் ஸ்ரீதர், சென்னை பல்கலைக்கழக பதிவாளர் (பொறுப்பு) கோடீஸ்வர பிரசாத், பேராசிரியர்கள், மாணவர்கள் என, 200க்கும் மேற்பட்டோர் கலந்து கொண்டனர்.