>>>டி.இ.டி.,யில் வெற்றி பெற்றும் சோதனை: மாணவிகள் கண்ணீர்

மதுரை அரசு மீனாட்சி மகளிர் கல்லூரி வழங்கிய பட்டப்படிப்பு சான்றிதழ் ஏற்கப்படாததால், ஆசிரியர் தகுதி தேர்வில் வெற்றி பெற்றும், வேலை கிடைக்காமல் 20 மாணவியர் போராடுகின்றனர்.

இங்கு பி.ஏ., ஆங்கில இலக்கியம், 1999ல் "தொடர்பியல் ஆங்கிலம்" என பெயர் மாற்றப்பட்டது. இதில் பட்டம் பெற்ற மாணவிகள், 2012ல், டி.ஆர்.பி., நடத்திய போட்டி தேர்வுகளில் வெற்றி பெற்று, சான்றிதழ் சரிபார்ப்புக்கு சென்றனர். அப்போது, "தொடர்பியல் ஆங்கிலத்துக்கு" அரசு அங்கீகாரம் பெறாமல் இருந்தது. இந்த பட்டப்படிப்பை டி.ஆர்.பி., நிராகரித்தது.

மாணவியர் பல போராட்டங்களுக்கு பின், நவம்பர் 27ல், அரசு அங்கீகாரம் வழங்கப்பட்டது. ஆனாலும்,பட்டப்படிப்பு சான்றிதழ்களை டி.ஆர்.பி., ஏற்காததால், 20 மாணவிகள் வாழ்க்கை கேள்விக் குறியாகியுள்ளது.

பாதிக்கப்பட்ட திவ்யபிரியா, புனிதா (மதுரை), லட்சுமி (தேனி), திவ்யா (ராமேஸ்வரம்), முத்துப்பிரியா (சிவகாசி) கூறுகையில், "பி.ஏ., சேரும் போது "ஆங்கில இலக்கியம்" என கல்லூரி நிர்வாகம் தெரிவித்தது. பட்டம் பெற்ற போது தான் "தொடர்பியல் ஆங்கிலம்" என தெரிந்தது. கல்லூரி நிர்வாகத்திடம் கேட்ட போது "பட்டபடிப்பு பெயர் தான் மாறியுள்ளதால் ஒன்றுமில்லை," என கூறிவிட்டது. கருணை அடிப்படையில் எங்களுக்கு அரசு பணி வழங்கவேண்டும்," என்றனர்.

"அரசு கல்லூரியில் "பட்டப்படிப்பின்" பெயர் மாற்றப்பட்டு, 11 ஆண்டுகள் அங்கீகாரம் பெறவில்லை. அங்கு படித்தவர்களுக்கு அரசு வேலை கிடைக்கும் போது பிரச்னை ஏற்பட்டுள்ளது. "இணையான சான்றிதழ் பெற்றால் பரிசீலிக்கப்படும்" என்று, தெரிவித்த டி.ஆர்.பி.,யும், அந்த படிப்புக்கு அங்கீகாரம் கிடைத்த பிறகும், "பட்டப்படிப்பு" சான்றிதழை நிராகரித்தது யார் குற்றம்," என பெற்றோர் குமுறினர்.

>>>தட்டச்சர் பணி இடங்களுக்கு கலந்தாய்வு துவங்கியது

தமிழக அரசின், பல்வேறு துறைகளில், 3,405 தட்டச்சர் பணியிடங்களை நிரப்புவதற்கான, சான்றிதழ் சரிபார்ப்பு கலந்தாய்வு,டி.என்.பி.எஸ்.சி., அலுவலகத்தில், நேற்று துவங்கியது. சமீபத்தில் நடந்து முடிந்த குரூப்-4 தேர்வு மூலம், 10 ஆயிரம் பேர், பல்வேறு பணிகளுக்கு தேர்வு செய்யப்பட்டனர். இவர்களில், ஒவ்வொரு பிரிவாக, சான்றிதழ் சரிபார்ப்பு மற்றும் துறை ஒதுக்கீட்டு ஆணை வழங்கும் நிகழ்ச்சி நடந்து வருகிறது. சுருக்கெழுத்தர் தட்டச்சர்களுக்கு, துறை ஒதுக்கீட்டு ஆணை வழங்கப்பட்டதை அடுத்து, 3,405 தட்டச்சர் பணியிடங்களை நிரப்புவதற்கான கலந்தாய்வு, தேர்வாணைய அலுவலகத்தில், நேற்று துவங்கியது. தினமும், 500 பேர் வீதம் அழைக்கப்பட்டு, கலந்தாய்வு நடத்தப்படுகிறது. இந்தப் பணிகள் முடிந்ததும், 5,657 இளநிலை உதவியாளர் பணியிடங்களை நிரப்புவதற்கான கலந்தாய்வு, இம்மாதம், 17ம் தேதி முதல் நடக்கிறது.

>>>ஆசிரியர் பற்றாக்குறை: அரசு பள்ளியை பூட்டிய மக்கள்

ஆசிரியர் பற்றாக்குறையை கண்டித்து திண்டுக்கல், காசம்பட்டி ஊராட்சி ஒன்றிய துவக்கப் பள்ளியை கிராம மக்கள் பூட்டினர்.

இப்பள்ளியில், கடந்த கல்வியாண்டில் 450 மாணவர்கள்,ஆறு ஆசிரியர்கள் இருந்தனர். தற்போது, 150 மாணவர்களுக்கு இரு ஆசிரியர்கள் மட்டுமே உள்ளனர். இவர்களில் தலைமை ஆசிரியை அமுதாதேவி மருத்துவ விடுப்பில் உள்ளார். 4 மாதமாக, ஒரு ஆசிரியை மட்டும் பணிக்கு வருவதால், கற்பித்தல் பணி முடங்கியது. இதனால் அதிருப்தியடைந்த மக்கள் நேற்று பள்ளியை பூட்டினர்.

இதுகுறித்து உதவி தொடக்க கல்வி அலுவலர் முத்தம்மாள் கூறுகையில், "இப்பள்ளிக்கு அயல் பணியாக 3 ஆசிரியர்கள் நியமிக்கப்படுவர். பள்ளி இன்று திறக்க நடவடிக்கை எடுக்கப்படும்" என்றார்.

>>>மீன்வள பல்கலைக்கு முதல் துணைவேந்தர் நியமனம்

நாகப்பட்டினத்தில் புதிதாக துவக்கப்படும், மீன்வள பல்கலைக்கழகத்தின் முதல் துணைவேந்தராக, எம்.சி. நதீஷா, நியமிக்கப்பட்டுள்ளார். இவர், மூன்றாண்டுகளாக, இப்பதவியில் இருப்பார்.

மீன் வளத்தை மேம்படுத்த, அத்துறையில் நவீன தொழில் நுட்பங்களை அறிமுகப்படுத்த வேண்டிய அவசியம் உள்ளது. புதிய தொழில்நுட்பங்களை புகுத்த வேண்டுமெனில், மீன் வளக்கல்வியை மேம்படுத்த வேண்டியுள்ளது.

இதை கருத்தில் கொண்டு, நாகப்பட்டினத்தில், பனங்குடி மற்றும் நாகூர்முட்டம் கிராமங்களில், 85 ஏக்கர் நிலப்பரப்பில், மீன்வளப் பல்கலைக்கழகம் அமைக்கப்பட்டு வருகிறது. இந்த பல்கலைக்கழகத்தின் முதல் துணை வேந்தராக, அப்பல்கலைக்கழகத்தின் சிறப்பு அதிகாரியான, எம்.சி. நதீஷா, நியமிக்கப்பட்டுள்ளார்.

>>>"ஆரம்ப கல்வி மிக முக்கியமானது சீர்திருத்தங்கள் கொண்டு வர வேண்டும்' - அப்துல்கலாம்

"ஆரம்பக்கல்வி மிகவும் முக்கியமானது. இதில், தேவையான சீர்திருத்தங்கள் கொண்டுவரப்பட வேண்டும்,'' என, முன்னாள் ஜனாதிபதி அப்துல்கலாம் வலியுறுத்தினார்.
மாணவ, மாணவர்களின் கேள்விகளுக்கு, முன்னாள் ஜனாதிபதி அப்துல்கலாம், உற்சாகமாக பதில் அளித்தார்.

மாணவர்களின் கேள்விகளும், கலாம் அளித்த பதில்களும்:

சரண்யா: சீனாவில் உள்ள பல்கலைக்கு சென்று பேசினீர்களே... அங்குள்ள கல்வித்தரம் திருப்தி அளிக்கிறதா?
சீனா வேறு; நாம் வேறு. அவர்களுக்கு ஒரு லட்சியம்; நமக்கும் ஒரு லட்சியம். அங்கு, தொழில்நுட்ப முன்னேற்றம் உள்ளது. 2020ம் ஆண்டில், இந்தியாவும் வளர்ந்த நாடாக மாறும்.

முகமது முஸ்தபா: தற்போதைய கல்வி முறை சிறப்பாக உள்ளதா; மாற்றம் தேவையா?
தற்போதைய கல்வி முறை, ஆரம்பக்கல்வி, இடைநிலைக்கல்வி, மேல்நிலைக்கல்வி என, மூன்று நிலைகளில் உள்ளன. இதில், ஆரம்ப கல்வியில், சீர்திருத்தங்கள் கொண்டுவர வேண்டும். இந்த நிலை, மிகவும் முக்கியமானது. படைப்புத்திறனை உருவாக்கக்கூடிய வகுப்புக்கள், ஆசிரியர்கள் மிகவும் தேவை. இந்த வகை வகுப்புகளும், ஆசிரியர்களும் இருந்தால், ஆரம்பக்கல்வி மிகச்சிறப்பாக இருக்கும்.

ஹெலன் சோனியா: சரித்திரம், ஆங்கிலம், மொழிப்பாடப்பிரிவுகளை மாணவர்கள் ஆர்வம் இல்லாமல் படிக்கின்றனர். மற்ற பாடங்களைப்போன்று, இந்த பாடங்களையும், ஆர்வமுடன் படிக்க என்ன செய்யலாம்?
நானும் தமிழ் வகுப்பில் தான், பத்தாம் வகுப்பு வரை படித்தேன். பாடத்தில் ஆர்வம் ஏற்படுவது, சம்பந்தபட்ட ஆசிரியர் மற்றும் அவரின் கற்பிக்கும் விதத்தை பொறுத்தது இருக்கும். படைப்புத்திறன் மிக்க ஆசிரியர்கள் இருந்தால், ஆர்வம் தானாக வரும்.

தினகரன்: விரைவில் உலகம் அழியும் என்ற ரீதியில், நாளிதழ் ஒன்றில் செய்தி படித்தேன். இது உண்மையா?
சந்திரசேகரன் சுப்பிரமணியன், சந்திரயானைக் கண்டுபிடித்தார்; நோபல் பரிசு பெற்றார். அவர் ஆய்வின்படி, இந்த பூமியும், சூரியனும், 10 பில்லியன் ஆண்டுகள் வரை சுற்றிக் கொண்டே இருக்கும். கவலை வேண்டாம். ஏற்கனவே, 5 பில்லியன் ஆண்டுகள் சுற்றிவிட்டன. இன்னும், 5 பில்லியன் ஆண்டுகள் மீதம் இருப்பதால், இப்போதைக்கு கவலை வேண்டாம்.

வினிதா: நாட்டு மக்களின் வாழ்க்கைத்தர வேறுபாடு, மலைக்கும், மடுவுக்குமாக உள்ளது. ஏழை, ஏழையாகவே இருக்கிறான்; பணக்காரர் பணக்காரராகவே இருக்கின்றனர். இந்த ஏற்றத்தாழ்வு குறையுமா?
இந்தியாவில், 6 லட்சம் கிராமங்கள் உள்ளன. 75 சதவீத மக்கள் அங்கு வசிக்கின்றனர். இந்த ஏற்றத்தாழ்வு, வேறுபாடுகள் எல்லாம், 10 ஆண்டுகளில் குறையும். இவ்வாறு கலாம் பதில் அளித்தார்.

>>>அரசு பொறியியல் கல்லூரிகளில் காலி பணியிடங்களை நிரப்ப ஒப்புதல்

அரசு பொறியியல் கல்லூரிகளில் காலியாக உள்ள, 151 உதவி பேராசிரியர் பணியிடங்களை நிரப்புவதற்கான ஒப்புதலை, தமிழக அரசு வழங்கியுள்ளது.

தமிழகத்தில் உள்ள அரசு பொறியியல் கல்லூரிகளில், 154 உதவி பேராசிரியர் பணியிடங்கள் காலியாக இருந்தன. இதையடுத்து, தொழிற்கல்வி கமிஷனர், இப்பணியிடங்களை தேர்வு மூலம் நிரப்புமாறு, ஆசிரியர் தேர்வு வாரியத்திற்கு பரிந்துரைத்தார். இந்தாண்டு பிப்ரவரி மாதம், இதற்கான அறிவிப்பை ஆசிரியர் தேர்வு வாரியம் வெளியிட்டு, ஏப்ரல் மாதம், 22ம் தேதி தேர்வை நடத்தி முடித்தது. அரசு பொறியியல் கல்லூரிகளில், 14 துறைகளின் கீழ் காலிப்பணியிடங்களுக்கு தேர்வுகள் நடத்தப்பட்டன. இந்த தேர்வு முடிவுகள் வெளியிடும் வேளையில், வழக்கு தொடரப்பட்டதை கருத்தில் கொண்டு, தற்காலிகமாக தேர்வு செய்யப்பட்டுள்ள, 151 பேருக்கு, பணி நியமன ஆணை வழங்கும்படி தொழிற்கல்வி கமிஷனருக்கு அரசு உத்தரவிட்டுள்ளது. இதற்கான அரசாணை, நேற்று வெளியிடப்பட்ட நிலையில், இந்த பணி நியமன ஆணையானது, சென்னை ஐகோர்ட்டின், இறுதித்தீர்ப்பிற்கு கட்டுப்பட்டது என்றும் தெரிவிக்கப்பட்டுள்ளது.

>>>ஐ.ஏ.எஸ்., தேர்வில் மாற்றம் யு.பி.எஸ்.சி., பரிந்துரை

ஐ.ஏ.எஸ்., - ஐ.பி.எஸ்., அதிகாரிகளை தேர்வு செய்வதற்கு நடத்தப்படும், சிவில் சர்வீஸ் தேர்வில் மாற்றம் கொண்டு வர, மத்திய பணியாளர் தேர்வாணையம் அரசுக்கு கருத்து தெரிவித்து உள்ளது,'' என , மத்திய பணியாளர் துறை, இணை அமைச்சர் நாராயணசாமி தெரிவித்தார்.

ராஜ்யசபாவில், அவர் எழுத்துப்பூர்வமாக அளித்த பதிலில் கூறியதாவது:சிவில் சர்வீசஸ் தேர்வில், மாற்றம் கொண்டு வருவது தொடர்பாக, யு.ஜி.சி.,யின் முன்னாள் தலைவர் பேராசிரியர், அருண் எஸ்.நிகவேகர் தலைமையில் கமிட்டி அமைக்கப்பட்டது. இக்கமிட்டி, தற்போது நடைமுறையில் உள்ள பிரதான தேர்வில், சர்வதேச நிலைமைகளை அடிப்படையாக கொண்டு மாற்றங்களை கொண்டு வரவேண்டும் என்பது உட்பட, பல்வேறு பரிந்துரை களை அளித்துள்ளன. இந்த பரிந்துரைகள் குறித்து, அரசு எவ்வித முடிவும் எடுக்கவில்லை. இவ்வாறு, அவர் கூறினார்.