>>>பேரீச்சம் பழத்தின் நன்மைகள்...

 

குழந்தைகள் முதல் பெரியவர்கள் வரை அனைவரும் விரும்பி சாப்பிடும் பழம். பேரீச்சம் பழத்தில் ஏராளமான நன்மைகள் உள்ளன. இரும்புசத்து அதிகம் உள்ள பேரீச்சம் பழம் நோய் எதிர்ப்பு சக்தி வாய்ந்தது. வைட்டமின் மற்றும் மினரல் நிறைந்த இந்த பழம் நரம்பு தளர்ச்சியை போக்கும். புரதச்சத்து, நார்ச்சத்து, கால்சியம் உள்ளிட்ட சத்துக்கள் நிரம்பியுள்ள பேரிட்சம் பழங்கள் புற்றுநோய் வராமல் தடுக்கும்.

கண்பார்வை தெளிவடைய

வைட்டமின் ‘ஏ’ குறைவினால்தான் கண்பார்வை மங்கலாகும். இதைக் குணப்படுத்த பேரீச்சம் பழமே சிறந்த மருந்தாகும். மாலைக் கண் நோயால் பாதிக்கப் பட்டவர்கள், பேரீச்சம் பழத்தை தேனுடன் கலந்து ஊறவைத்து சாப்பிட்டு வந்தால் உடலுக்குத் தேவையான எல்லா சத்துக்களும் கிடைக்கும். இதனால் கண் பார்வைக் கோளாறுகள் நீங்கும்.

பெண்களுக்கு:

பொதுவாக பெண்களுக்கு அதிக கால்சியம் சத்தும், இரும்புச் சத்தும் தேவை. மாதவிலக்கு காலங்களில் ஏற்படும் உதிரப் போக்கால் இத்தகைய சத்துக்கள் குறைகின்றன. இதை நிவர்த்தி செய்யவும், ஒழுங்கற்ற மாத விலக்கை ஒழுங்கு படுத்தவும் பேரீச்சம் பழம் மருந்தாகிறது. மெனோபாஸ் அதாவது 45 வயது முதல் 52 வயது வரை உள்ள காலகட்டத்தில் மாதவிலக்கு முழுமையடையும். அப்போது பெண்களின் எலும்புகள் பலவீனமாக இருக்கும். மேலும் கை, கால் மூட்டுகளில் வலி உண்டாகும். இதனை சரிசெய்ய, பேரீச்சம் பழத்தை பாலில் கலந்து கொதிக்க வைத்து பாலையும், பழத்தையும் சேர்த்து சாப்பிட்டு வந்தால் உடல் என்றும் ஆரோக்கியமாக இருக்கும்.

ஆண்களுக்கு:

ஆண்களுக்கு ஆண்மைத் தன்மையை அதிகரிக்க தேனுடன் பேரீச்சம்பழம் பெரிதும் உதவுகிறது. பார்வை குறைபாடை போக்கி பார்க்கும் திறனை அதிகரிக்கும். கெட்ட கொழுப்பை குறைக்கும் தன்மை உள்ளது. இனிப்பு சுவையுள்ளதால் இந்த பழத்தை குழந்தைகள் விரும்பி சாப்பிடுவார்கள். குழந்தைகள் முதல் பெரியவர்கள் வரை அனைவருக்கும் நன்மை அளிக்கும் பேரிட்சம் பழத்தை தினமும் சாப்பிட்டு வந்தால் உடல் நலம் பெறும். தூசு இல்லாத சுத்தமான பேரீச்சம் பழத்தைதான் வாங்கி சாப்பிட வேண்டும்...!

>>>"இசைத் தூண்கள்"...!.

 

உலக அதிசயப்படியலில் இடம்பெறாத தமிழர்களின் கட்டிடக்கலை மற்றும் பொறியியல் அதிசயமான " இசைத் தூண்கள் " !!.

இந்த இசைத்தூண்களானது ஒரு நீளமான பாறையை வெட்டி எடுத்து, அதிலிருந்து ஏழு தனித்தனி சிறிய தூண்களாக வடித்துள்ளனர், இந்த ஒவ்வொரு சிறிய தூண்களை தட்டினால் "சப்தஸ்வரங்கலான"  "ச,ரி,க,ம,ப,த,நி " என்ற தனித்தனி ராகங்களை அது இசைக்கின்றது ! . சில பெரிய தூண்களை சுற்றி இடம் பெற்றுள்ள சிறிய தூண்களில் ஐம்பத்தி மூன்று தனித்தனி ராகங்களை இசைக்கின்றது !! .இதில் பெரிய தூணில் கர்நாடக சங்கீதமும்., அதை சுற்றியுள்ள சிறிய தூண்களில் " மிருதங்கம், கடம், சலங்கை, வீணை,மணி " போன்ற இசைக்கருவிகளின், இசையை தருகின்றது !! அப்படி என்றால் ஒவ்வொரு கல்லையும் ஒவ்வொரு பதத்திற்கு இழைத்திருந்தால் தான் இப்படி இது வேறு வேறு ஒலிகளில் இசைக்கும் ! இதை தட்டுவதால் நம் விரல்களுக்கு எந்த வலியும் ஏற்படுவதில்லை,உண்மையான இசை ஞானம் உள்ளவர்கள் இதை தட்டினால் இசைக்கருவியில் இருந்து வரும் இசையை விட மிக துல்லியமாக இது இசைக்கின்றது !.சரி இது எதற்காக பயன்பட்டது ? அந்தக்காலத்தில் இருந்த இசைக்கலைஞ்சர்கள் இதை கோயில் விழாக்களின் போது, ஒரு இசைக்கருவியை கூட பயன்படுத்தாமல், இந்த தூண்களை வைத்தே இசைத்துள்ளனர் ! .இது போன்றவை உலகில் எந்த இடத்திலும் இல்லை என்பது நமக்கு இன்னும் சிறப்பை சேர்க்கின்றது !.இந்த இசைத்தூண்களை "மிடறு" என்று அழைத்தார்கள். இது எப்படி வேலை செய்கின்றது ? ஒவ்வொரு தூண்களில் இருந்து வரும் சப்தமும், ஒவ்வெரு விதமான " அலைகற்றையை " உருவாக்குகின்றது !.எந்த தொழில் நுட்பமும் இல்லாத அந்த காலத்தில் இது எப்படி சாத்தியமானது ? இந்திரா காந்தி அணுஆராய்ச்சி விஞ்ஞானி ( கல்பாக்கம் ) திரு."அனிஷ் குமார் " என்பவரும் அவருடன் பணிபுரியும் சிலரும் இதில் ஒளிந்துள்ள " இயற்பியல்" அதிசயத்தை முதன்முதலாக தூண் வாரியாக ஆராய்ந்தனர், தூண்களின் வடிவமைப்பு மற்றும் இந்த தூண்களில் இருந்து எழும் ஒலியை பதிவுசெய்து அளவிடுவது. "In situ metallography " (used to find out in-service degradation of critical components of process plants operating under high temperature/ high pressure/ corrosive atmosphere) ( ஒரு பொருளின் நுண்ணிய வடிவமைப்பு மற்றும் நுண்ணிய ஓசையை அளக்கும் முறை ) என்ற புதிய தொழில் நுட்பத்தைக்கொண்டு ஆராய்ந்ததில் இந்த தூண்களானது " தன்மைக்கேற்ப மாறும் ஒரு நிலையான அதிசய திடப்பொருள் " என தெரிய வந்தது !!. " spectral analysis "என்ற ஆராய்ச்சிப்படி இந்த தூண்களில் வரும் இசையானது " தன்மைக்கேற்ப இசைந்து கொடுக்கும் அலைக்கற்றயினால் " சப்தம் உருவாவதாக தெரிவிக்கின்றது !.சப்தம் உருவாவதே ஒரு அதிசயமான விஷயம் என்பது ஒருபுறம் இருக்க, இது எப்படி ஒரு விரலால் தட்டினாலே இசை எழுகின்றது ? .நினைவில் கொள்ளுங்கள் நாம் சுத்தியலை கொண்டு அடிக்கப்போவதில்லை, இதற்கு தேவை வெறும் ஒரே ஒரு விரல் ! .இசை என்பது காற்றை உள்வாங்கி ஒலியாய் வெளிப்படும் ஒரு முறை ,ஆனால் இந்த தூண்களுக்குள் காற்று உள்ளே நுழைந்து இசையை உருவாக்குவதற்கென ஒரு சிறு துவாரதைக்கூட உருவாக்கவில்லை ! இதைப்பற்றின ஆராய்ச்சிக்கு இந்த " இசைத்தூண்கள் " ஆயிரம் ஆண்டுகளுக்கு மேல் வெறும் ஆச்சர்யத்தை மட்டுமே பதிலாய் தந்து கொண்டிருக்கின்றது ! அடுத்த ஜென்மம் என்ற ஒன்று இருக்கின்றதா என தெரியவில்லை ! அப்படியே இருந்தாலும் மனிதர்களாக பிறப்போமா என தெரியவில்லை ? அதுவும் குறிப்பாக இப்படிப்பட்ட சிறப்பு வாய்ந்த தமிழ்நாட்டில் பிறப்போமா என்பது தெரியாதது ! ஆகையால் தாமதப்படுத்தாமல் இதுபோன்ற இடங்களுக்கு சென்று நம் முன்னோர் செய்த அதிசயங்களை கண்டு களியுங்கள் , இது போன்ற நம் பெருமைகளை உலகறிய செய்யுங்கள் இப்படிப்பட்டவர்கள் வழியில் வந்த நாம் புதிதாக எதுவும் உருவாகவில்லை என்றாலும் அவர்கள் தந்த மொழியையும், கலாச்சாரத்தயுமாவது கட்டிக்காப்போம் !தேடல் தொடரும்...

படத்தில் உள்ளது நெல்லையப்பர் கோவிலின் இசை தூண். ஆனால் இதை போன்ற இசை தூண்கள் மதுரை மீனாக்ஷி அம்மன் கோவில், ஆழ்வார் திருநகரி பெருமாள் கோவில், சுசீந்திரம் கோவில் போன்ற பல தமிழக மற்றும் தென் இந்திய கோவில்களில் காணலாம்.

>>>டிசம்பர் 15 [December 15]....

நிகழ்வுகள்

• 1256 - மொங்கோலியப் பேரரசன் குலாகு கான் அலாமுட் (இன்றைய ஈரானில்) என்ற இடத்தைக் கைப்பற்றி அழித்தான்.
• 1799 - முற்றிலும் உள்ளூர் மக்களைக்கொண்ட முதலாவது ஆங்கில செமினறி கொழும்பில் அமைக்கப்பட்டது.
• 1864 - அமெரிக்க உள்நாட்டுப் போர்: அமெரிக்கப் படைகள் கூட்டமைப்புப் படைகளை டென்னசியில் முற்றாகத் தோற்கடித்தனர்.
• 1891 - ஜேம்ஸ் நெய்ஸ்மித் கூடைப்பந்தாட்டத்தை முதன் முதலாக அறிமுகப்படுத்தினார்.
• 1905 - அலெக்சாண்டர் புஷ்கினின் கலாசாரப் பழமைகளைப் பேணும் பொருட்டு சென் பீட்டர்ஸ்பேர்க்கில் புஷ்கின் மாளிகை அமைக்கப்பட்டது.
• 1914 - முதலாம் உலகப் போர்: சேர்பிய இராணுவம் பெல்கிரேடை மீண்டும் கைப்பற்றியது.
• 1914 - ஜப்பானில் மிட்சுபிஷி நிலக்கரிச் சுரங்கத்தில் ஏற்பட்ட வெடி விபத்தில் 687 பேர் கொல்லப்பட்டனர்.
• 1941 - பெரும் இன அழிப்பு: உக்ரேனின் ஆர்க்கிவ் நகரில் 15,000 யூதர்கள் நாசிகளினால் சுட்டுக் கொல்லப்பட்டனர்.
• 1960 - மன்னர் மகேந்திரா நேபாளத்தின் அரசைக் கலைத்து நாட்டின் முழு அதிகாரத்தையும் தனதாக்கிக் கொண்டார்.
• 1965 - த சவுண்ட் ஒஃப் மியூசிக் திரைப்படம் வெளியானது.
• 1967 - ஒகையோவில் ஒகையோ ஆற்றிற்கு மேலே செல்லும் வெள்ளிப் பாலம் உடைந்து வீழ்ந்ததில் 46 பேர் கொல்லப்பட்டனர்.
• 1970 - சோவியத் ஒன்றியத்தின் வெனேரா 7 விண்கலம் வெள்ளி கோளின் மேற்பரப்பில் மெதுவாக இறங்கிய முதலாவது கலமாகும். இதுவே வேறொரு கோளின் மீது இறங்கிய முதலாவது விண்கலமாகும்.
• 1970 - தென் கொரியப் பயணிகள் கப்பல் கொரிய நீரிணையில் மூழ்கியதில் 308 பேர் கொல்லப்பட்டனர்.
• 1978 - மக்கள் சீனக் குடியரசை அங்கீகரிப்பதாகவும் தாய்வானுடனான உறவுகளைத் துண்டிப்பதாகவும் அமெரிக்க அதிபர் ஜிம்மி கார்ட்டர் அறிவித்தார்.
• 1994 - இணைய உலாவி நெட்ஸ்கேப் நவிகேட்டர் 1.0 வெளியிடப்பட்டது.
• 1995 - ஈழத் தமிழருக்கு ஆதரவு தெரிவித்து திருச்சியில் "அப்துல் ரவூஃப்" என்பவர் தீக்குளித்து இறந்தார்.
• 1997 - தஜிகிஸ்தான் விமானம் ஒன்று ஐக்கிய அரபு அமீரகத்தின் ஷார்ஜா விமானநிலையத்திற்கு அருகில் வீழ்ந்து நொருங்கியதில் 85 பேர் கொல்லப்பட்டனர்.
• 1997 - தென் கிழக்கு ஆசியாவை அணுவாயுதமற்ற பகுதியாக அறிவிக்கும் உடன்படிக்கை பாங்கொக்கில் கையெழுத்திடப்பட்டது.
• 2001 - பீசாவின் சாயும் கோபுரம் 11 ஆண்டுகளின் பின்னர் மீண்டும் திறக்கப்பட்டது.
• 2006 - கிழக்குப் பல்கலைக்கழக உபவேந்தர் கலாநிதி சிவசுப்பிரமணியம் ரவீந்திரநாத் கொழும்பில் இனம் தெரியாத ஆயுததாரிகளினால் கடத்தப்பட்டார்.

பிறப்புக்கள்

• 37 - நீரோ மன்னன், ரோமப் பேரரசன் (இ. 68)
• 1832 - அலெக்சாந்தர் கஸ்டவ் ஈபல், பிரெஞ்சுப் பொறியியலாளர் (இ. 1923)
• 1852 - ஹென்றி பெக்கெரல், நோபல் பரிசு பெற்ற பிரெஞ்சு இயற்பியலாளர் (இ. 1908)
• 1936 - சோ. ந. கந்தசாமி, தமிழறிஞர்
• 1971 - ஜீவ் மில்க்கா சிங், இந்திய கோல்ஃப் விளையாட்டு வீரர்

இறப்புகள்

• 1675 - ஜொஹான்னெஸ் வெர்மீர், நெதர்லாந்து நாட்டு ஓவியர் ஆவார் (பி. 1632)
• 1950 - சர்தார் வல்லபாய் பட்டேல், இந்திய அரசியல் தலைவர் (பி. 1875)
• 1966 - வால்ட் டிஸ்னி, கார்ட்டூன் ஓவியர் (பி. 1901)

>>>மருத்துவ பட்டமேற்படிப்பு நுழைவுத் தேர்வு விண்ணப்பங்கள் வரவேற்பு

"மருத்துவ பட்ட மற்றும் பட்டய மேற்படிப்புகளுக்கான நுழைவுத் தேர்வுக்கு, இம்மாதம், 22ம் தேதிக்குள் விண்ணப்பிக்க வேண்டும்' என, மருத்துவக் கல்வி மாணவர் சேர்க்கை தேர்வுக் குழு செயலர், சுகுமார் தெரிவித்துள்ளார்.
அவர் வெளியிட்டுள்ள செய்திக்குறிப்பு: எம்.டி., - எம்.எஸ்., - எம்.சி.எச்., உள்ளிட்ட மருத்துவ பட்ட மேற்படிப்புகள் மற்றும் பட்டய படிப்புகளில், 2013 - 14ம் ஆண்டிற்கான, மாணவர் சேர்க்கை நுழைவுத் தேர்வு, ஜன., 27ம் தேதி நடக்கிறது.
இதில் பங்குபெற விரும்பும் மருத்துவ மாணவர்கள், அதற்கான விண்ணப்பத்தை, இம்மாதம், 21ம் தேதி வரை, இணையதளத்தில், பதிவிறக்கம் செய்துக் கொள்ளலாம்.
பூர்த்தி செய்யப்பட்ட விண்ணப்பங்களை, உரிய ஆவண நகல்களுடன், இம்மாதம், 22ம் தேதிக்குள், மருத்துவக் கல்வி இயக்ககத்திற்கு அனுப்ப வேண்டும். இவ்வாறு, செய்திக்குறிப்பில் தெரிவிக்கப்பட்டுள்ளது.

>>>8 லட்சம் மாணவர்கள் பிளஸ் 2 தேர்வு எழுதுகின்றனர் : தற்காலிக அட்டவணையும் தயார்

பிளஸ் 2 பொதுத்தேர்வை எழுதும் மாணவ, மாணவியரின் எண்ணிக்கையை, தேர்வுத்துறை இயக்குனரகம், இறுதி செய்தது. 8 லட்சம் மாணவ, மாணவியர், பொதுத்தேர்வில் பங்கேற்கின்றனர். மார்ச் 1 அல்லது 4ம் தேதியில், தேர்வை துவக்கும் வகையில், தற்காலிக தேர்வு அட்டவணையை தயாரித்து, அரசின் ஒப்புதலுக்கு, தேர்வுத்துறை அனுப்பியுள்ளது.
பிளஸ் 2 பொதுத்தேர்வு, ஆண்டுதோறும், மார்ச் முதல் வாரத்தில் துவங்கும். முந்தைய தேர்வு, மார்ச், 8ல் துவங்கி, 30 வரை நடந்தது. வரும் மார்ச்சில், பொதுத்தேர்வை நடத்துவதற்கான ஏற்பாடுகளை, தேர்வுத்துறை, மும்முரமாக செய்து வருகிறது.
தேர்வெழுதும் மாணவ, மாணவியரின் எண்ணிக்கை குறித்த புள்ளி விவரங்களை, நவம்பர் இறுதிக்குள் தர வேண்டும் என, ஏற்கனவே, தேர்வுத்துறை கூறியிருந்தது.

கூடுதலாக 46 ஆயிரம் பேர் : அதன்படி, மாவட்ட வாரியாக, மாணவ, மாணவியரின் விவரங்கள் அடங்கிய பட்டியல்கள் பெறப்பட்டு, தற்போது, இறுதி செய்யப்பட்டுள்ளதாக, துறை வட்டாரங்கள் தெரிவித்தன. அதன்படி, எட்டு லட்சம் மாணவ, மாணவியர், பிளஸ் 2 தேர்வை எழுதுகின்றனர். முந்தைய தேர்வை, 7.56 லட்சம் பேர் எழுதினர். வரும் தேர்வை, கூடுதலாக 46 ஆயிரம் பேர் எழுதுகின்றனர். அறிவியல் பிரிவு மாணவ, மாணவியருக்கு, பிப்ரவரி இரண்டாவது வாரத்தில், செய்முறைத் தேர்வு துவங்கி விடும். அதற்கு, இன்னும் ஒன்றரை மாதங்களே உள்ளதால், அதற்கான முன்னேற்பாடுகள் நடந்து வருகின்றன.
குறிப்பாக, செய்முறை தேர்வில் பங்கேற்பவர்களுக்கு, பதிவெண்கள் வழங்க வேண்டும். இதே எண்களைத் தான், எழுத்து தேர்விலும், மாணவ, மாணவியர் பயன்படுத்துவர். எனவே, ஜனவரியில், பொங்கல் பண்டிகை முடிந்ததும், அறிவியல் பிரிவு மாணவர்களுக்கு, பதிவெண்கள் விவரம், அந்தந்த பள்ளிகளில் அறிவிக்கப்பட உள்ளது. செய்முறைத் தேர்வில், நான்கு லட்சம் மாணவர்கள் பங்கேற்பர் என, கூறப்படுகிறது. இவர்களின் எண்ணிக்கை குறித்த விவரங்கள் வெளியிடப்படவில்லை.

தற்காலிக அட்டவணை : இதற்கிடையே, தேர்வுக்கான தற்காலிக அட்டவணையை, தமிழக அரசின் பார்வைக்கு, தேர்வுத்துறை அனுப்பி உள்ளது. மார்ச் 1 அல்லது 4 ல் இருந்து, தேர்வை துவக்கும் வகையில், அட்டவணை தயாரிக்கப்பட்டுள்ளதாக, துறை வட்டாரங்கள் தெரிவித்தன. அரசின் ஒப்புதல் கிடைத்ததும், அட்டவணை குறித்து, அனைத்து மாவட்ட முதன்மை கல்வி அதிகாரிகளின் கருத்து கேட்கப்படும். தேர்வு காலத்தில் விழாக்களோ அல்லது விடுமுறை நாட்களோ அல்லது மாணவருக்கு இடையூறு ஏற்படுத்தும் வகையில் ஏதாவது உள்ளதா என, கண்டறிந்து கருத்துக்களை தெரிவிப்பர்.
அதனடிப்படையில் மாற்றங்கள் இருந்தால், திருத்தம் செய்யப்பட்டு, தேர்வு அட்டவணை இறுதி செய்யப்படும். அதன்பின், மீண்டும் அரசின் ஒப்புதல் பெற்று, அதிகாரப்பூர்வமாக, மாணவ, மாணவியருக்கு அறிவிக்கப்படும். மார்ச் 1ம் தேதி, வெள்ளிக்கிழமை வருவதால், இந்த தேதியில் இருந்து துவங்கும் அட்டவணை இறுதியாவதற்கு, அதிக வாய்ப்புகள் இருப்பதாக, துறை வட்டாரங்கள் தெரிவித்தன.

10ம் வகுப்பு நிலை என்ன? : பத்தாம் வகுப்பு பொதுத்தேர்வை எழுதும் மாணவ, மாணவியரின் விவரங்கள், பள்ளிகள்தோறும் சேகரிக்கப்பட்டு, கல்வி மாவட்ட அளவில் பொறுப்பில் உள்ள பள்ளிகளிடம், "சிடி'க்களாக வழங்க, தேர்வுத்துறை உத்தரவிட்டுள்ளது. மாணவ, மாணவியரின் புகைப்படங்களுடன், அவர்கள் பிறந்த தேதி, முகவரி, பெயர், எழுதும் பாடங்கள் உள்ளிட்ட அனைத்து விவரங்களுடன், "சிடி'க்கள் தயாரிக்கப்பட்டுள்ளன. வரும், 20 தேதிக்குள், தேர்வுத்துறை தெரிவிக்கும் தேதியில், சம்பந்தபட்ட "சிடி'க்களை, பொறுப்பு மையங்களில் ஒப்படைக்க வேண்டும் என, தெரிவிக்கப்பட்டுள்ளது.

பள்ளி ஆசிரியர் ஒருவர் கூறியதாவது: ஒவ்வொரு பள்ளிகளிலும், மாணவர்கள் விவரங்கள் அடங்கிய "சிடி'க்கள் தயாராக உள்ளன. மாணவரின் பெயர், தலைப்பு எழுத்துக்களில், பெரும்பாலும் தவறுகள் வருகின்றன. மாணவர்கள், உயர் கல்விக்கு செல்லும்போது, பல்வேறு பிரச்னைகள் வருகின்றன. எனவே, மாணவர்கள் விவரங்கள் அடங்கிய படிவத்தில், மாணவர்களிடம் கையெழுத்து வாங்கியுள்ளோம். தயாராக உள்ள, "சிடி'க்களை, தேர்வுத்துறை தெரிவிக்கும் தேதியில், குறிப்பிட்ட மையங்களில் வழங்குவோம். இவ்வாறு, அவர் தெரிவித்தார்.

>>>பள்ளிகளில் "தர மதிப்பீடு முறை' குழப்பம்:

மாணவர்கள் தவிப்பு!தமிழக பள்ளிக் கல்வித் துறையில் 1-ம் வகுப்பு முதல் 8-ம் வகுப்பு வரை நடைமுறைப்படுத்தப்பட்டுள்ள "தர மதிப்பீடு முறை'யில் (கிரேடு சிஸ்டம்) நிலவும் குழப்பத்தால், தங்கள் திறனை மேம்படுத்த முடியாமல் மாணவர்கள் தவிக்கும் நிலைக்கு தள்ளப்பட்டுள்ளனர். மாணவர்களின் கல்வித் தரத்தை அறிய முடியாமல் பெற்றோரும் குழப்பத்திற்கு ஆளாகியுள்ளனர்.

"தர முறை' திட்டம்: பல்வேறு தடைகளுக்கு இடையே 10-ம் வகுப்பு வரை சமச்சீர் கல்வி முறை நடைமுறைப்படுத்தப்பட்டுள்ளது. இக்கல்வி முறைக்கு மாணவர்கள், ஆசிரியர்கள் உள்ளிட்ட அனைத்து தரப்பினர் மத்தியிலும் வரவேற்பு கிடைத்துள்ளது.

அதேசமயம், பள்ளிகளில் தற்போது 8-ம் வகுப்பு வரை அறிமுகம் செய்யப்பட்டுள்ள "தர மதிப்பீடு முறை' திட்டத்தில் பல்வேறு குழப்பங்கள் நிலவுவதாக புகார்கள் எழுந்துள்ளன. ஏற்கனவே, சிபிஎஸ்இ பாடத் திட்டத்தில் இந்த மதிப்பீடு முறை, நடைமுறையில் இருக்கிறது. இதை அடிப்படையாக வைத்து, தமிழக கல்வித் துறையின்கீழ் உள்ள பள்ளிகளில் தேர்வு முறையிலும் தரமதிப்பீடு முறை அறிமுகம் செய்யப்பட்டது.

இது மாணவர்களின் சிந்தனை ஆற்றல் வளர்வதற்கு சிறிதும் பயனில்லாத திட்டம் என்று பெரும்பாலான ஆசிரியர்கள் கருத்து தெரிவிக்கின்றனர்.

மாணவரின் மதிப்பீட்டு அட்டையில் குழப்பம்: தற்போது, தமிழகம் முழுவதும் பள்ளிகளில் 1-ம் வகுப்பு முதல் 8-ம் வகுப்பு வரையிலான மாணவ, மாணவியரின் காலாண்டு, அரையாண்டு, முழு ஆண்டு மதிப்பீட்டு அட்டையில், கற்றல் வெளிப்பாடுகள் என பாடங்களுக்கு மதிப்பெண்களுக்கு பதிலாக "ஏ' முதல் "இ' வரையிலான குறியீடுகளாக குறிப்பிடப்படுகின்றன.

இதில், முதல் பக்கத்தில் வாழ்க்கைத் திறன்கள், மனப்பான்மைகளும்-மதிப்புகளும், நன்னலம் என்ற தலைப்பில் யோகா, முழு உடற்பயிற்சி, பாட இணைச் செயல்பாடுகள் ஆகியவற்றுக்கு பருவம் 1 முதல் 3 வரை தனித்தனி தர மதிப்பீடு குறியீடுகள் பதிவு செய்யப்படுகின்றன. அட்டையின் பின் பக்கத்தில் கல்விசார் பகுதிகள் என பாடங்களில் மாணவ, மாணவியர் எடுத்துள்ள மதிப்பெண்களுக்கு தரமதிப்பீடு குறியீடுகள் பதிவு செய்யப்படுகின்றன. இதில், குறியீடுகளுக்கான மதிப்பெண் குறித்த விவரம் குறிப்பில் சுட்டிக்காட்டப் படவில்லை. இதனால், மாணவர்களின் மதிப்பெண்கள் விவரத்தை பெற்றோர் அறிவதில் குழப்பம் ஏற்படுகிறது. மாணவர்களுக்கே கூட, தங்களின் மதிப்பெண் விவரம் குறிப்பாகத் தெரிய வாய்ப்பில்லாத நிலை இருக்கிறது.

மேலும், மாணவர்களுக்குள் பாடங்களை கற்பதில் போட்டி மனப்பான்மை குறைய வாய்ப்புள்ளதாகவும் கூறப்படுகிறது. குறிப்பிட்ட 10 மதிப்பெண்களுக்குள் எந்த மதிப்பெண் பெற்றாலும், ஒரே தரக்குறியீடு கொடுக்கப்படுவதால், மாணவர்களுக்குள் கற்றலில் போட்டி மனப்பான்மை குறைவது மேம்பாட்டுக்கு உகந்ததில்லை என, மூத்த ஆசிரியர்கள் கருத்து தெரிவித்தனர்.

மேற்படிப்புகளுக்கு சிக்கல்: பள்ளிக் கல்வித் துறையில் 10-ம் வகுப்பு பொதுத் தேர்வில் மாணவர்கள் எடுக்கும் மதிப்பெண்கள் அடிப்படையில், பிளஸ் 1 வகுப்பில் பிரிவுகள் ஒதுக்கப்படுகின்றன. அதேபோன்று, பிளஸ் 2 பொதுத் தேர்வில் மாணவர்கள் எடுக்கும் மதிப்பெண்கள் அடிப்படையில், மருத்துவம், பொறியியல் உள்ளிட்ட உயர் கல்வி வாய்ப்புகள் கிடைக்கின்றன. அதிலும், கலந்தாய்வுகளில் 1 மதிப்பெண் குறைந்தால் கூட விருப்பப்பட்ட பிரிவுகள் கிடைக்காமல் போவதற்கு வாய்ப்புள்ளது.

இந்நிலையில், பள்ளிகளில் 1-ம் வகுப்பு முதல் 8-ம் வகுப்பு வரை மதிப்பெண்களுக்கு பதில், அதாவது 10 மதிப்பெண்களுக்கு ஒரு தர குறியீடு அடிப்படையில் தேர்வுகளை சந்திக்கும் பெரும்பாலான மாணவர்களுக்கு, 10-ம் வகுப்பு, பிளஸ் 2 வகுப்பு பொதுத்தேர்வுகளுக்கு செல்லும் போது, போதிய உந்துதல் இல்லாமல் போவதற்கு வாய்ப்புள்ளது. இதன் மூலம் பெரும்பாதிப்பை சந்திக்க வேண்டிய இக்கட்டான நிலைக்கு மாணவர்கள் தள்ளப்படும் நிலை உள்ளதாகக் கல்வியாளர்கள் தெரிவிக்கின்றனர்.

"உரிய நடவடிக்கை எடுக்க வேண்டும்'

இந்த தர மதிப்பீடு முறையில், பருவம் 1-ல் படித்த பாடங்களை பருவம் 2-ல் படிக்க வேண்டியதில்லை. இந்த 2 பருவங்களிலும் படித்த பாடங்களை 3-ம் பருவத்தில் படிக்க வேண்டியதில்லை என்ற முறையில் பாடத்திட்டம் வகுக்கப்பட்டிருப்பது மட்டுமே ஓரளவு மாணவர்களுக்கு பயனுள்ளதாக இருக்கும் என கல்வித்துறை அதிகாரி ஒருவர் தெரிவித்தார்.

அந்த அதிகாரி மேலும் கூறுகையில்,"மாணவர்களை கல்லூரி பாடத்திட்டங்களுக்கு இணையான முறையில், பருவமுறையில் பாடத்திட்டங்கள் வகுப்பதில் தவறில்லை.

தேர்வுகளில் புகுத்தப்பட்டுள்ள கற்றல் வெளிப்பாடு முறையில் பின்பற்றப்படும் தர மதிப்பீடு முறை மாணவர்களின் கல்வித்தரத்தை மேம்படுத்த உதவாத நிலை இருக்கிறது. அதேசமயம், பள்ளிகளில் பணியாற்றும் ஆசிரியர்களுக்கு சிபிஎஸ்இ பள்ளிகளுக்கு இணையான பயிற்சி மற்றும் ஆசிரியர்களின் ஈடுபாடு இருக்கும் பட்சத்தில் இந்த தர மதிப்பீடு முறை பயனுள்ளதாக அமையலாம். இதற்குத் தேவையான நடவடிக்கையை மேற்கொண்ட பின்னரே, தர மதிப்பீடு முறைத் திட்டத்தை நடைமுறைப்படுத்துவது சிறந்தது.

தர குறியீட்டுக்கான மதிப்பெண் விவரத்தை, மாணவரின் மதிப்பீட்டு அட்டையில் (ரேங்க் கார்டு) குறிப்பாகத் தெரிவிக்க வேண்டியதும் அவசியம். அடுத்தாண்டு முதல் 9-ம் வகுப்பு வரை, இத்திட்டத்தை விரிவுபடுத்துவதற்கு முன், தர மதிப்பீடு முறையில் உள்ள குழப்பங்களுக்குத் தீர்வுகாண பள்ளிக் கல்வித் துறை உயர் அதிகாரிகள் உரிய நடவடிக்கை எடுக்க வேண்டும், என்றார்.

>>>மாணவர்களிடம் தன்னம்பிக்கையை வளர்க்க வேண்டும் ஆசிரியர்களுக்கு முதல்வர் அறிவுரை

 

"மாணவர்களை இந்த படிப்பு தான் படிக்க வேண்டும் என்று பெற்றோர் கட்டாயப்படுத்தக் கூடாது. ஆசிரியர்கள், மாணவர்களிடையே எந்த சவாலையும் எதிர்கொள்ளும் வகையில், தன்னம்பிக்கையை வளர்க்க வேண்டும்,'' என்று, முதல்வர் ஜெயலலிதா தெரிவித்தார்.

முதுகலை பட்டதாரி, பட்டதாரி மற்றும் இடை நிலை ஆசிரியர்கள் என, 20 ஆயிரத்து 920 ஆசிரியர்களுக்கான பணி நியமன ஆணை மற்றும், 92 லட்சம் பள்ளி, மாணவ, மாணவியருக்கான நலத்திட்ட உதவிகள் வழங்கும் விழா, சென்னை நந்தனம், ஒய்.எம்.சி.ஏ., மைதானத்தில் நேற்று நடந்தது.விழாவில் பங்கேற்ற முதல்வர் ஜெயலலிதா, 36 ஆசிரியர்களுக்கான பணி நியமன ஆணைகளையும், பள்ளிக்குழந்தைகள் சிலருக்கு, விலையில்லா காலணிகள், சீருடைகள், கணித உபகரணப்பெட்டிகள், வண்ண பென்சில்கள், புத்தகப்பை உள்ளிட்டவற்றையும் வழங்கினார்.

விழாவில், முதல்வர் ஜெயலலிதா பேசியதாவது: இன்றியமையாத தன்மை வாய்ந்த கல்வியை அனைவரும் கற்க வேண்டும்; கல்லாதவர்களே இல்லாத மாநிலமாக தமிழகத்தை ஆக்க வேண்டும் என்ற அடிப்படையில், கல்விக்காக பல்வேறு சலுகைகள் வழங்கப்பட்டு வருகிறது.

பள்ளிகளின் உட்கட்டமைப்பு வசதிகளை மேம்படுத்த, 1,660 கோடி ரூபாய் செலவில் பணிகள் நடக்கின்றன. இந்தாண்டு பள்ளிக் கல்வித்துறைக்கு, 15,000 கோடி ரூபாய் ஒதுக்கப்பட்டுள்ளது. ஒன்றரை ஆண்டுகளில், 26 ஆயிரத்து 220 ஆசிரியர்கள் பணியமர்த்தப்பட்டுள்ளனர்.ஆசிரியர் நியமனத்துக்கான தகுதித் தேர்வு, இரண்டுமுறை நடத்தப்பட்டு, தகுதியின் அடிப்படையில் தேர்வு செய்யப்பட்டு பணி நியமன ஆணை வழங்கப்படுகிறது.

ஆசிரியர் பணி என்பது அறப்பணி; தன்னலமற்ற சேவைப்பணி; ஆசிரியர் பணியை விட சீரிய பணி எதுவும் இல்லை. ஆசிரியர் பணி, வெறும் கல்வியை மட்டும் போதிப்பதல்ல; ஒழுக்கம், பண்பு, ஆன்மீகத்தை மாணவ, மாணவியரிடையே எடுத்துச் சொல்லும் பணி.எந்த ஒரு தொழிலிலும், தன்னிடம் வேலை செய்பவர், தன்னை விட வளர்ச்சி பெறுவதை, எந்த முதலாளியும் விரும்ப மாட்டார். ஆனால், தன்னிடம் படிக்கும் மாணவர் புகழ் பெறுவதை, அறிஞர் ஆவதை ஆசிரியர்கள் கண்டு இன்புறுவர்.

மாணவர்கள் ஆற்றலை, ஆர்வத்தை ஊக்கப்படுத்துவது ஆசிரியர் பணி. மாணவர்களின் ஆர்வத்தை ஊக்கப்படுத்துபவர்கள் ஆசிரியர்கள். இப்படிப்பட்ட பொறுப்புள்ள பணியை நீங்கள் மேற்கொண்டு, அறிவுசார் சமுதாயத்தை உருவாக்க வேண்டும்.எந்த சவால்களையும் எதிர்கொள்ளும் திறமையை மாணவர்களிடத்தில் உருவாக்கி, தன்னம்பிக்கையை ஏற்படுத்த வேண்டும். ஆசிரியர், பாடத்தை கற்பிக்கும் விதம், மாணவ- மாணவியரை ஈர்க்கும் வகையில், அவர்கள் புரிந்து கொள்ளும் வகையில், செய்முறை விளக்கத்துடன் கூடியதாக அமைய வேண்டும்.

ஆசிரியர், மாணவர், பெற்றோர் என்பது ஒரு முக்கோண வடிவம். இதில் முக்கிய பங்கு வகிப்பவர்கள் ஆசிரியர்கள் தான். அதே சமயத்தில், பெற்றோரும் பிள்ளைகளை பள்ளிகளுக்கு அனுப்பி விட்டதாலேயே, தங்கள் முடிந்துவிட்டதென நினைக்கக்கூடாது. பிள்ளைகளை உயர்த்த, உறுதுணையாக பெற்றோர் இருக்க வேண்டும். இந்த படிப்புதான் படிக்க வேண்டும் என்று, அவர்களை கட்டாயப்படுத்தக் கூடாது. ஆர்வமாக படிக்க விரும்பும் படிப்பில், அடைகிற வெற்றியை, ஆர்வமில்லா படிப்பில் அடையமுடியாது.

படிக்கும் ஆர்வத்தை, பிள்ளைகளிடையே ஏற்படுத்தும் அதே சமயத்தில், அவர்கள் விருப்பத்திற்கேற்ற பாடத்தை படிக்க அனுமதித்தால், அனைத்து மாணவ- மாணவியருக்கும் வெற்றி உறுதி.இவ்வாறு அவர் பேசினார்.

விழாவிற்கு, பள்ளிக்கல்வித்துறை அமைச்சர் சிவபதி முன்னிலை வகித்தார். அமைச்சர்கள், தலைமைச் செயலர் தேபேந்திரநாத் சாரங்கி, பள்ளிக் கல்வி செயலர் சபீதா, ஆசிரியர் தேர்வு வாரிய தலைவர் சுர்ஜித் கே.சவுத்ரி உள்ளிட்டோர் பங்கேற்றனர்.

போக்குவரத்து நெரிசலின்றி முடிந்த விழா

சென்னையில் நேற்று பல விழாக்கள் நடந்ததை ஒட்டி, போக்குவரத்து பாதிக்காத வகையில், நடவடிக்கைகள் மேற்கொள்ளப்பட்டன. சென்னை, ஒய்.எம்.சி.ஏ., மைதானத்தில் நடந்த விழாவில், பட்டதாரி ஆசிரியர்கள், அவர்களது குடும்பத்தினர் மற்றும் கட்சியினர் என, 40 ஆயிரத்திற்கும் மேற்பட்டோர் பங்கேற்றனர். விழா நடந்த பகுதி, அண்ணாசாலைக்கு அருகாமையில் இருந்ததால், விழாவிற்கு வரும் வாகனங்களால், கடுமையான போக்குவரத்து நெரிசல் ஏற்படும் நிலை இருந்தது.

இதையறிந்த போலீஸ் கமிஷனர் ஜார்ஜ், நேற்று முன்தினமே, விழா நடைபெறும் மைதானத்திற்கு பின்புறமாக, கூவம் ஆற்றை ஒட்டி, போக்குவரத்திற்கு அதிகம் பயன்படாமல் இருந்த சாலையை கண்டறிந்தார். அந்த வழித்தடத்தில், வாகனங்களை வெளியேற்ற வேண்டும் என, போக்குவரத்து போலீசாருக்கு உத்தரவு பிறப்பித்தார். ஒய்.எம்.சி.ஏ., மைதானத்தில் நிறுத்தப்பட்டிருந்த, 1,000 வாகனங்களும், ஒரே நேரத்தில் வெளியேற அனுமதிக்காமல், 50 மற்றும் 100 வாகனங்களாக, படிப்படியாக போலீசார் வெளியேற்றினர்.

போக்குவரத்து முக்கியத்துவம் வாய்ந்த அண்ணாசாலையில், வாகனங்கள் மணிக்கணக்கில் நெரிசலில் சிக்காமல் சென்றதால், பொதுமக்களின் பாராட்டை போலீசார் பெற்றனர். இதுகுறித்து போலீஸ் கமிஷனர் ஜார்ஜ் கூறியதாவது:
வெளி மாவட்டங்களில் இருந்து, 40 ஆயிரத்திற்கும் மேற்பட்டோர், ஒரே நேரத்தில், வாகனங்களில் சென்னைக்குள் நுழையும் போது, கண்டிப்பாக நெரிசல் ஏற்படும். அதனால், விழாவிற்கு வரும் வாகனங்களை காலை, 7:00 மணிக்குள் மைதானத்திற்குள் கொண்டு சென்று, வழக்கமான சோதனைகளை முடித்தோம்.

அதேபோல், விழா முடிந்ததும், மதிய உணவு நேரத்தில், வாகனங்கள் கொஞ்சம் கொஞ்சமாக, அண்ணாசாலையை தவிர்த்து, பிற சாலைகளின் வழியாக வெளியேற்றப்பட்டன. இதனால், நெரிசல் தவிர்க்கப்பட்டது. 1,500 போலீசார் பாதுகாப்பு பணியில் ஈடுபடுத்தப்பட்டனர்.