சென்னை, லயோலா கல்லூரிக்கு, ஐந்து ஆண்டு வரையறை செய்து, சிறுபான்மை
அந்தஸ்து வழங்கி, உயர்கல்வித் துறை பிறப்பித்த உத்தரவை, சென்னை ஐகோர்ட்
ரத்து செய்தது.
சென்னை, நுங்கம்பாக்கத்தில் உள்ள,
லயோலா கல்லூரியின் (தன்னாட்சி) செயலர், தாக்கல் செய்த மனு: லயோலா கல்லூரி,
1925ல் துவங்கப்பட்டு, 1978ல், தன்னாட்சி அந்தஸ்து பெற்றது. சென்னைப்
பல்கலைக்கழகத்தின், இணைப்பு பெற்றுள்ளது; சிறுபான்மை கல்வி நிறுவனம் என,
அரசும் அங்கீகரித்துள்ளது.
கிறிஸ்தவ மதத்தைச் சேர்ந்த கல்லூரி என்றாலும், ஜாதி, இனம், மதம், மொழி
அடிப்படையில், யாருக்கும் அனுமதி மறுப்பதில்லை. கடந்த, 1998ல்
பிறப்பிக்கப்பட்ட அரசாணையைத் தொடர்ந்து, சிறுபான்மை கல்லூரி என
அங்கீகரித்து, அரசிடம் இருந்து தனியாக உத்தரவு பெறும்படி, கல்லூரிக் கல்வி
இயக்குனரகம் வற்புறுத்தியது.
இதையடுத்து, ஒவ்வொரு ஆண்டுக்குமாக, சிறுபான்மை அந்தஸ்து வழங்கி, உயர்
கல்வித்துறை உத்தரவிட்டது. பின், 2007 - 2012 வரை, ஐந்து ஆண்டுகளுக்கு,
சிறுபான்மை அந்தஸ்து வழங்கி, உயர் கல்வித் துறை உத்தரவிட்டது. இப்படி,
குறிப்பிட்ட ஆண்டுகளுக்கு வரையறை செய்து, சிறுபான்மை அந்தஸ்து வழங்கிய
உத்தரவை, ரத்து செய்ய வேண்டும். இவ்வாறு, மனுவில் கூறப்பட்டுள்ளது.
மனுதாரர் சார்பில், வழக்கறிஞர் ஐசக் மோகன்லாலும், அரசு தரப்பில்,
கூடுதல் அரசு பிளீடர் சஞ்சய்காந்தியும் ஆஜராயினர். இந்த மனு மீது நீதிபதி
பால் வசந்தகுமார் பிறப்பித்த உத்தரவு: சிறுபான்மை கல்வி நிறுவனத்துக்கு
வழங்கிய, சிறுபான்மை அந்தஸ்தை, அவ்வப்போது புதுப்பிக்க வேண்டுமா என்ற
விஷயத்தை, ஏற்கனவே ஒரு வழக்கில் உயர் நீதிமன்றம் முடிவு செய்துள்ளது.
அதில், சிறுபான்மை அந்தஸ்து வழங்கப்பட்டு விட்டால், அவ்வப்போது
புதுப்பிக்க தேவையில்லை என, கூறப்பட்டுள்ளது. ஆசான் மெமோரியல் அசோசியேஷன்
தொடுத்த வழக்கில், உயர்நீதிமன்றம் பிறப்பித்த உத்தரவில், "அரசு வழங்கிய,
சிறுபான்மை அந்தஸ்து செல்லும். ஒரு கல்வி நிறுவனம், அதன் விதிகளுக்கு
முரணாக செயல்பட்டால், அந்த கல்வி நிறுவனத்தில் மாற்றம் ஏற்பட்டால், அதற்கு
நோட்டீஸ் அனுப்பி, புதிய உத்தரவை, சட்டப்படி பிறப்பிக்கலாம்" எனக்
கூறியுள்ளது.
எனவே, ஏற்கனவே பிறப்பிக்கப்பட்ட உத்தரவுகள், இந்த வழக்குக்கும்
பொருந்தும். மனுதாரரின் கோரிக்கை ஏற்கப்படுகிறது. இவ்வாறு, நீதிபதி
உத்தரவிட்டுள்ளார்.
